左邊是面，右邊是底；外表看來幾好，但內裡‧‧‧
今日整左2個蛋糕，其中一個〝天使豆腐戚風蛋糕〞 勁失敗，唔知點解中間唔熟，個組織仲好實，外型睇落好似擲鐵餅的〝鐵餅〞~真係激死我。我記得之前聽朋友講過戚風蛋糕好難整，但又睇到好多Blog友都整到，再加上我買左個天使模好耐一次都未用過，所以今次開封試下，結果係 〝徹底失敗〞 。
其實，倒入模後都有些疑惑，因為大家都係6吋模，點解我的只是蛋糕模一半，與書的不相同。
最後我 〝心心不憤〞之下 ，致電給朋友問下，用 手蛋打器 和 電動打蛋器 係咪一樣~朋友話係，其實係蛋白蛋糕，整時要怏手，因為沒有用乳化劑，是靠本身的空氣膨脹。但係點解我睇本書有時用 手蛋打器，有時又用電動打蛋器，因為你唔可以攪太多，攪得太多會〝榻〞、〝實〞，哎呀！我唔記得拎手蛋打器，所以有時用橡皮刮 ，有時用筷子，有時用 電動打蛋器，仲要有時熄左電動打蛋器攪，總之就勁攪 ，今次我真係〝拎黎攪〞~天作孽，猶可恕、自作孽，不可活，嗚~嗚~嗚。 入焗爐前已覺有些問題。 焗完都幾靚丫，冇咩問題。 唉！睇下都唔熟既。
天使豆腐戚風蛋糕
食譜來自：專業糕點製作
材料：(6吋戚風模)
豆腐 (Soft Bean Curd) 55克
沙律油 (Vegetable Oil) 25克
麵粉 (Plain Flour) 50克
粟粉 (Cornstarch) 10克
蛋白 (Egg) 125克
砂糖 (Granulated Sugar) 45克
* 我用橄欖油代替沙律油；用3隻蛋白117克，比原食譜少了8克蛋白。
做法：
1.
麵粉、粟粉同篩，備用。
2.
豆腐攪滑。(手打蛋器)
3.
加入沙律油拌勻。(手打蛋器)
4.
蛋白打起。(電動打蛋器)
5.
加入砂糖。(電動打蛋器)
6.
打至挺身。(電動打蛋器)
7.
取1/3蛋白，加入豆腐內，拌勻。(用手打蛋器)
8.
加入麵粉及粟粉，拌勻。(用手打蛋器)
9.
將餘下的蛋白分兩次加入，拌勻。
10. 注入戚風蛋糕模內，鋪平，放入170度的焗爐內，焗約20-25分鐘。
