涼拌小秋耳 (內附食譜)

今日提早慶祝母親節，我寫好左個餐單，然後搵大家幫手預備。

今日小王子下午校隊要田徑訓練，所以尋日返左娘家安排好一切，今日一來到就可以馬上煮。

其實，前日我已在家整定好一啲食物，其中一樣是〝涼拌小秋耳〞。

秋耳係上星期係山姆買的〝有機東北小秋耳 (黑木耳)〞，一大包內有6小包，每小包仲有Zipper，咁樣保存就方便好多。

我在廚房時，娣婦問我〝涼拌小秋耳〞點整，佢話阿B好鍾意食。

我上網搵過資料，秋耳係黑木耳一種，由於秋天採收，所以稱戚「秋木耳」。

涼拌小秋耳

材料：

秋耳 (黑木耳)    30克

調味料：

糖                        1湯匙

鎮江香醋            3茶匙

魚露                    3茶匙

蠔油                    3茶匙

豉油                    1.5茶匙

蒜蓉                    2茶匙

辣椒                    1/2隻

麻油                    適量

做法：

1.         秋耳浸至軟身，然後浸洗至乾淨。

2.         煲水至滾熄火，放入秋蓋上缹蓋浸2分鐘。

3.         隔去水份，放涼。

4.         加入所有調味料(除麻油)，撈勻，試味。

5.         最後加入麻油，放入雪櫃，即成。

古早味糖葫蘆 (內附食譜)

前幾日整〝草莓季巴斯克乳酪蛋糕 Basque cheesecake〞剩下的士多啤梨和藍莓，所以又整冰糖葫蘆，不過試另一食譜。

製作過程：

• 我冇細砂，所以用左砂糖。
• 我見糖煮到160度都未有琥珀色，所以繼續煮到約177度。
• 我忘記了關火糖仍會繼續煮，所以最終糖深色左。
• 天氣凍糖好快凝固，所以又要加熱，就更加深色。

古早味糖葫蘆

食譜來自：https://www.youtube.com/watch?v=M7-tvitG7QU

材料：此食譜約可做12~16支

細砂糖                300克

水                        120克

新鮮草莓            適量

新鮮蕃茄            適量

做法：

1.         用竹籤串起新鮮草莓或新鮮蕃茄。

2.         鍋內加入水和細砂糖，用小火煮，但不要攪動。

3.         糖煮到160度，即是琥珀色就關火。

l   煮糖大概是120度的時候會起大泡泡。

l   糖大概煮到160度的時候它會呈琥珀金黃色，這就代表糖漿煮好。

l   有些食譜不加水直接下去煮，口感會比較偏脆硬的。

l   這食譜加水口感會比較酥脆一點點。

l   氣泡逐漸變大，溫度介於110-120度。

l   開始有淡淡琥珀色溫度可能已經接近1150度，也有淡淡的焦糖香氣出來，這時候快好。

4.         拿一串沾上糖漿，稍微濾一下，再沾多次糖漿。

l   小心糖漿不要滴到手，因為非常會燙。

l   將糖葫蘆插上保利龍或烘焙紙。

5.         可以準備一盆冰水，淋好的時候把它泡進冰水，它會馬上變硬。

豆沙煎餅 (內附食譜)

尋晚約左同學仔們一齊賞月，而且大家都自家製食物一同分享。

今晚又約左追月，由於晏晝出左街，所以我就整簡單一點。

回家後休息左一陣就開工，就整〝豆沙煎餅〞。

之前覺得食譜皮多餡少，所以由原本4個變8個，當然餡份量都要增加。

大家都鍾意食，係個豆沙餡甜左啲。

餡係在烘焙店買，因為我懶得煮。

我搵下有冇少甜版的豆沙，下次就完美了。

豆沙煎餅  

材料：  

紅豆沙茸       160克  

澄麵粉                30克

糯米粉                150克

白砂糖                50克

清水                    150毫升

生油                    1湯匙

做法：

1.       豆沙餡分8份，每份20克。

2.       澄麵粉、糯米粉同篩入盆中拌勻。

3.       清水與糖一起入鍋煮至糖溶，再把糖滾水沖入粉中，加入一湯匙生油，用叉子攪拌成軟滑粉團。  

4.       在工作檯上灑下少許乾糯米粉，把粉糰取出放在工作檯上，搓揉成長條圓形，分切成8等份。

5.       取一份粉糰搓圓，好像包湯丸的包入豆沙餡，再把收口揉合。  

6.       把包了餡的粉糰用掌心輕輕壓薄。  

7.       燒熱平底煎鍋下少油，放下煎餅以中慢火煎至兩面金黃香脆即成。

北海道頂級濃厚班戟 (內附食譜)

之前係街市用積分換的，都幾個月前，而家先的起心去整。 

好在當時我有影低做法，唔係日文唔識睇。

下次一次過倒粉漿，因為煎一塊都要6分30秒太耐了。

製作過程：

• 我用1/3杯粉漿整到4塊。
• 我整左4塊，得第一塊係最靚。
• 第一塊後繼續煎，點知第2塊就燶左啲，之後改最小火又唔上色兼好似唔熟，所以應該每次都要重覆2-5步驟，就好浪費時間。

包裝盒和袋上都有寫做法，但係日文。

北海道頂級濃厚班戟

材料：

北海道頂級濃厚班戟粉                 1包 (150克)

雞蛋                                                 1隻

牛奶                                                 90毫升

做法：

1.          先將雞蛋、牛奶攪混，再加入1包班戟粉攪混。

2.          先以中火加熱平底鍋，鍋熱後放到廚房毛巾上稍微冷卻，再調至慢火。

3.          把粉漿放到平底鍋上。

4.          蓋上鍋蓋加熱約3分30秒。

5.          看到粉漿面變乾及開始有小泡時將粉漿反轉再煎3分鐘即成。

涼伴雲耳八爪魚粒 (內附食譜)

我買八爪魚粒係諗住整我最鍾意的〝章魚小丸子〞，可惜小王子和老公都唔食。

我要想辦法幹掉它，無謂擺係到咁耐。

現在天氣熱，見街市有雲耳，咁就夾埋一齊整個涼伴菜喇！

雖然我喜歡食酸的，但老公唔喜歡，所以呢個只係微微酸的。

我的份量只係參考，大家可隨個人喜歡加、減。

涼伴雲耳八爪魚粒

材料：

八爪魚粒               108克 (未解凍)

雲耳                       132克

調味料：

味醂                       1湯匙

鰹魚汁                   2湯匙

鎮江香醋               1湯匙

辣椒                       1隻

做法：

1.          八爪魚粒放入滾水中，浸2分鐘，盛起備用。

l   火不要開。

l   八爪魚粒不用解凍，直接從雪櫃取出，放入滾水中。

2.          雲耳滾水烚2分鐘，盛起備用。

l   需要火開。

3.          八爪魚粒和雲耳倒在一起，隔去水份。

l   隔水時，我會放入雪櫃，反正都是凍食。

4.          待水份瀝乾，用調味料撈勻。

5.          放入雪櫃醃一晚，即可享用。

煎薄罉 Fried Chinese Pancake (內附食譜)

小王子話要食酒樓的〝煎薄罉〞好耐，原本上星期六整，但有事冇整到。

今日就動手做作為小王子的晚餐。

之前小王子提意我整個汁來點，我話呢個唔駛汁㗎！

而且又話要加其他餡料，我都覺忠於傳統好一點。

小王子好鐘意食，一個人差不多食左一塊。

鹽的份量可能可以減，因為老公話有點鹹，話唔知是否係火腿鹹。

小王子話唔鹹，我都覺得有一點點鹹，但我接受到，大家都話好食。

製作過程：

• 胡椒粉冇落。
• 食譜的青葱應該是京蔥，我用左普通的蔥，即是街市買菜送果啲蔥。
• 我用24cm的平底鍋煎到2塊。
• 熟火腿用左御品皇四方形的，只是2塊己有48克，就用2塊夠了。
• 我的五香粉有粒粒，所以我隔左一次粉漿，順便隔埋粉粒。

煎薄罉 Fried Chinese Pancake

食譜來自：https://www.youtube.com/watch?v=XOACRgxnj8w

粉漿材料：2件薄罉

粘米粉                  30克

麵粉                      80克

雞蛋                      1隻

清水                      140毫升

餡料：

熟火腿                   3片（大約50克）

青葱                       一棵

乾蝦米                   10克

調味料：

胡椒粉                  1/8茶匙

白胡椒粉              1/8茶匙

五香粉                  1/8茶匙

麻油                      1/2茶匙

幼鹽                      1/2茶匙

做法：

1.          將雞蛋發勻後下鹽，胡椒粉，白胡椒粉，五香粉，攪勻。

2.          粘米粉、麵粉，過篩後放入蛋漿，攪勻。

3.          按溶粉粒，一邊攪勻，一邊加水。

4.          下麻油，攪勻。

5.          粉漿靜止十五分鐘。

6.          火腿切粒。

7.          青蔥切幼粒。

8.          蝦米浸腍清洗後切幼粒。

9.          燒熱鍋子，下半茶匙油，爆香蝦米，爆一分半鐘，待涼備用。

l   如果用蝦皮的話，烘香時不需要用油。

10.      粉漿靜止了十五分鐘，下火腿，青葱，下涼了的蝦米粒，攪勻。

11.      燒熱鍋子，下兩茶匙油，將油平均分佈在鍋子上。

12.      用中火，將粉漿和餡料攪勻後平均分佈在鍋子上。

13.      薄罉邊開始變脆，可以反轉。

14.      赤黃色，又香又脆，煎了一至兩分鐘後可以再反轉，完成了。