白汁蘑菇火腿意粉 (內附食譜)

尋日問小王子今日煮意粉好嗎？佢話好，要食白汁意粉。

咁我就用我多年前寫的〝簡易白汁〞食譜來煮。

我平時煮意粉係用意粉量器，一下只忘記磅下意粉有幾重，下次一定要記住。

今次個白汁用唔晒，星期四小王子又話要食白汁螺絲粉，咁就用埋佢。

好在2個老闆都讚好味！最開就莫過於此。

白汁蘑菇火腿意粉

意粉材料：2人份

意粉                  1.5人份

白蘑菇              106克

火腿 (4方)       2片 (45克)

白汁                  適量

白汁材料：(2人份量)  

洋蔥 (切細粒)      32克

麵粉                         2湯匙

水                             200毫升

鮮奶                         236毫升

花奶                         2湯匙

牛油                         25克

鹽                             少許

白汁做法：  

1.        麵粉用牛油略炒，加入水、鮮奶、花奶炒勻。  

2.        將麵粉炒至冇粉粒，再加入洋蔥和鹽炒至〝杰〞。

l   〝杰〞度隨個人喜好。

意粉做法：

1.          火腿一開三，疊起再切成長條，備用。

2.          白蘑菇切片，備用。

3.          滾水烚意粉，備用。

4.          略粉火腿盛起，備用。

5.          白蘑菇炒至軟身盛起，備用。

6.          鍋加入意粉略炒，加入白蘑菇和火腿炒勻。

7.          加入白汁炒勻，即成。

l   如汁太〝杰〞，可以加烚意粉的水去調節。

生炒臘味糯米飯 (內附食譜)

矛錯！又係糯米唷！

今日唔止整左〝咸水角〞，仲有老公鍾意的〝雞絲碗仔翅〞，點少得我喜歡的〝生炒臘味糯米飯〞。

糯米飯通常係凍既時候食，前排凍得滯唔想郁。

之前整〝栥飯〞有糯米剩，呢幾日回暖左就整下。

記得第一次整失敗左，係到一舊舊，根本炒唔開，所以就請教契大佬。

我得多指點後，真係成功了。

今次冇買花生，得蔥花咋！

汁料唔一定要落晒，自己睇情況而定，而且可以試味，調教自己喜歡的味道。

之前材料係切片，今次小王子都食，所以唔偷懶切粒。

小王子話好味，等我下次整埋糯米雞先。

我都想和大家分享下，契大佬對我第一次失敗有以下的提意：

Ø   糯米浸得太耐，只需浸4-5小時就可以。(我浸左12小時) 

Ø   生鐵鑊料薄炒糯米飯比較好。(我用易潔鑊) 

Ø   不需快炒，但要用大火炒。(我用中火) 

Ø   每次都由底炒。 

Ø   糯米開始熟加料。

生炒臘味糯米飯

材料：(1人份)

糯米                1嘜 (168克)

配料：

臘肉 (切粒)   1/4條 (33克)

臘腸 (切粒)   1條

蝦米 (略剁)   1/4碗 (32克)

冬菇 (切粒)   1/3碗 (49克)  

汁料：

鹽                    1/4茶匙

老抽                1/3茶匙

生抽                1湯匙

糖                    2茶匙

裝飾：

花生                適量

蔥花                適量

做法：

1.       糯米洗淨用水浸4-5小時，水要浸過糯米表面。  

2.       爆香配料，盛起備用。  

3.       糯米隔去水份。  

4.       熱鑊和油下糯米兜炒，邊炒邊灑水，水乾後再加水，重覆此動作。  

5.       糯米炒至開始黏就加配料同炒，然後慢慢加入汁料炒至糯米熟。

6.       加上花生和蔥花即成。  

煮後心得：

l   糯米浸得太耐炒既時候會變糰。

l   用生鐵鑊炒最好，因為質料薄。

l   每次加水係中間，要逐少加。

l   鑊要熱。

栥飯 (內附食譜)

我好喜歡食栥飯，但都有二十幾年冇整了。

以前我係前一晚浸糯米，第2日就起身蒸熟，然後就包飯。

老公唔喜歡食栥飯，尋晚突然又話明天又食。

由於太耐無整，蒸糯米飯的份量和時間都唔記得了。

我見老公又話食，怕糯米飯會蒸衰冇得食，所以決定用電飯煲煮飯算。

水的份量跟白米一樣，點知煲完出來糯米飯好濕。

老公話原煲煲多次，呀！又真係冇咁濕啵！

油炸鬼係尋日買定，問左店主可以室溫擺放，天氣熱唔知得唔得呢？

包糯米飯時有點手忙腳亂，包第二條就好好多。

以前我整豆漿和栥飯，朋友們都大讚架！

栥飯整得冇以前咁好食，因為飯濕，我要努力記返點樣蒸糯米飯先。

可以用呢種現成榨菜絲，這個牌子不用浸水或洗，有些牌子需要用水浸一陣，因為好鹹，可以自己試味後決定是否要浸水。

栥飯

材料：2人份

糯米                    153克 (一平嘜)

水                        適量

榨菜                    適量

豬肉鬆                適量

油炸鬼                半條

做法：

1.          用電飯煲煲熟糯米成糯米飯。

l   我平時煲飯的水份來煲糯米飯，但好濕，所以用少一點的水。

2.          微波爐保鮮紙鋪在枱上，放上糯米飯鋪平。

3.          放上豬肉鬆→榨菜→油炸鬼，卷成圓柱。

l   油炸鬼半條將分一半。

4.          將頭尾的糯米飯封住個合，再整形，即成。

蕃茄肉醬長通粉 (內附食譜)

今早返學時落大雨，學校準家長送到入學校禮堂幫學生整理完才離去。

老公抱住小王子送他回校，小王子負責擔傘，而我就尾隨，好似打仗般。

老公濕晒就唔駛講，而小王子抱住都濕，老公放下小王子就離開上班去。

我回到家接到老公電話，他已上車可是仍在家附近，我說剛回來聽到街坊話家附近有交通意外。

其實，老公今日本身身體有點不適，所以決定下車回家睇醫生。

我驚放學時段都係咁大雨，怕老爺接放學危險，所以我請了假，照顧2位老闆。

今晚問小王子想食咩？佢話想食長通粉。

他很喜歡長通粉，咁今晚就煮它吧！

蕃茄肉醬長通粉

材料：2人份

長通粉                   299克

蕃茄 (連蒂)          45克 (1/4個)

洋蔥                       45克 (1/4個細)

蒜頭 (連皮)          12克 (2粒)

牛肉碎                   86克

豬肉碎                   86克

水                           1湯匙

鹽                           適量

油                           適量

調味料：

茄膏                       1湯匙

意粉蕃茄醬           10湯匙

蕃茄汁                   1湯匙

鹽                           少許

糖                           少許

做法：

1.          蕃茄去蒂切件。

2.          洋蔥切細粒。

3.          蒜頭去衣切碎。

4.          滾水加鹽和油落長通粉烚11分鐘。

l   烚長通粉的水留用，可用來調較汁的稀杰度，因為長通粉水含有澱粉質。

5.          熱鑊下油炒香蒜頭和洋蔥粒。

6.          加入蕃茄炒30秒，落1湯匙水炒至蕃茄溶。

l   加水使蕃茄容易煮溶。

l   蕃茄的溶爛程度隨自己喜歡。

7.          加入調味料炒勻，試味。

l   每隻牌子的意粉蕃茄醬味道都不同，記得試味。

8.          加入烚好的長通粉炒勻，試味，即成。

l   加入長通粉會帶點水份，所以要再試味。