搵食‧聚舊@坪洲

今日老公都放假繼續郊遊，我想去坪洲，上網睇坪洲有「香港貓島」之稱。

我記得阿媽話有個朋友住係坪洲，所以十點幾就打比佢問下去唔去。

我地一行7個人，我一家、肥細老一家三口，加埋阿媽，肥阿哥話唔去。

約好在中環碼頭等，浩浩蕩蕩上船。

本想去食蝦多士，但排晒長龍，大家都餓，轉另一間〝金源冰室〞，去食炒通粉。

金源冰室

營業時間：08:30 - 17:30

電話：2983 0921
地址：坪洲永興街15號地下

呢間又係我想試佢既芝麻餅，只不過係冰室隔2-3個舖位，老公一行過去就有人出人，老公都唔敢睇，我問佢地個個都冇興趣，我又怕肥，所以冇試。

都忘記左等幾耐就有位，我地要分2張枱，咁啱可以一齊入。

我一心來食炒通粉，點知最後一份比阿B order左，我又唔知食咩，最後冇order野食，只係樣樣食啲。

公司炒通 ($38)：阿Border，但我覺得冇乜特別，通粉淋左啲，之前朋友話澳門都有，佢話好得意，不過我未試。

星洲炒米 ($38)：阿媽order，佢話好好味，我和肥細老都係覺得一般。

牛柳絲炒烏冬 ($36)：姊婦order，我覺得呢個最好食，姊婦都大讚，肥細老仲話平時佢order親都係最難食既，今次臝左宿命。

沙嗲牛柳燴意 ($36)：肥細老order，我覺得個汁偏甜，但佢就好滿意。

牛肉燴意 ($34)：老公order，個汁又係偏甜，都係一般。

法蘭西多士 ($20)：我覺得都係一般，但老公叫左2轉，佢話因為快。

凍寧多：肥細老order，比左小王子試味，又叫多杯，第一次飲，味道真係唔錯。

冰室餐牌

食飽就行去阿媽朋友家，坐低傾左一陣就帶我地出去睇貓，因為我問邊到有貓睇，頭先沿路都唔見。

有人係到餵貓，呢隻叫〝牛奶〞，佢既毛色真係好靚，又順滑＿

呢隻係〝牛奶〞媽媽。

呢隻係〝牛奶〞兄弟。

小王子又扮貓。

烈日當空都唔走，不停影。

阿媽朋友話呢條巷好多影相。

原來入去係牛皮廠。

再行前去兜返落去就係〝華記小食店〞，係我目標之一。

華記小食店
地址：坪洲志仁里2B 號地下

呢個夾餅有童年的味道~煙靭，肥仔都認同。

我地買左炸大腸、雞腎、魚蛋，同埋2件蘿蔔餅，這是我人生第2次食蘿蔔餅。

我小時候都冇見過，但老公話好耐架喇！今次比上次好食好多。

全部都係即整，所以都需時。

我地5點幾就離開，因為阿媽朋友6點到食晚飯，都不打擾佢地，佢地都唔出街食，每日都是在家煮的。

開心遊大澳

今天到遊大澳，小王子又係唔捨得走，今次原因係因為有貓，佢影到唔想走。

東涌巴士站等11號排晒長龍，好在車多，等約半小時就上車，入到去都2點幾。

我已經好肚餓喇！近近地去食粒大大魚蛋先。

復興行

地址：大澳永安街4D舖

上次因為有朋友個囡，所以小王子食左3粒，今次食得半粒咋！

宿命~每次入大澳都係熱到嘔，前2日都冇咁熱。

剛才去左豆腐花舖，但有人等位，睇下回程時有冇緣食到。

下站去食糯米糍，我地每人食一個，走既時間又買左2個一陣食。

茶果財

地址：大澳石仔埗街106號地下

營業時間：1000 - 1900

糯米糍行過小小見到貓，小王子立即兩眼發光。

食緊糯米糍都叫我幫佢同貓影相。

再行前去又見到貓，有途人餵貓零食比佢地。

烈日當空小王子影左好附，厄佢話前面仲有先走。

雖然酒店冇開都可以入去行下。

回程時見到呢幅晝~好靚丫！

今日食唔到即整沙翁，希望下次入來可以食到。

大澳餅店
地址：大澳吉慶街66號
營業時間：1000 - 1800

小王子又影貓喇！貓痴一名。

上次小王子好鍾意食蝦片，本來買2包，後來買左3包，平左少少，買左小王子立即要開來食。

沒有舖位，係路邊檔，去買沙翁必會見到。

尾站~食豆腐花，終於可以坐下~抖一抖。

車站豆腐花

地址：大澳永安街57號

小王子要凍豆腐花，我想食豆腐花和芝麻糊，淨芝麻糊又怕肥，但小王子應該食得晒，所以我叫左熱豆腐花溝芝麻糊。

我碗來到小王子話要試，佢差不多食晒我啲芝麻糊，仲話下次要食芝麻糊。

舒服遊赤柱

赤柱我都好鍾意入去行下，以前間中都會去，今日就帶小王子去逛下。

可能疫情，赤柱大街冇人之餘好多店都冇開。

一直行就出左赤柱大街，望到美利樓，太陽伯伯比尋日好~冇咁曬。

行行下小王子話肚餓，咁又係都成點幾鐘，要開餐。

呢到餐廳唔啱小王子，最啱就係麥當勞，佢見到開心到彈起。

食完野又坐係赤柱廣場吹下風。

又行去碼頭睇下。

再返回赤柱廣場。

呢2日都冇帶定零食，因為唔知幾時食野，隨時有得食。

小王子又坐係赤柱廣場吹住風話好舒服唔走，所以今日接唔到老公放工，回到家先一齊食晚餐。

太平清醮@2020

公司要清假，所以今個星期請3日假，計埋公眾假期連放10日，因為連下星期一都請左假。

我唔想小王子每日待在家等下午打機，所以一連幾日Plan左單拖帶佢出去玩。

今日第一日就去長洲，其實都另有目的就係去食平安包，我未食過想試下。

早上11點半出門口，去到中環碼頭見閘內已好多人。

後來上網先知今日原來係太平清醮第一日，不過，入到去又唔係好多人。

老公唔係到，我見有船就上，好在係快船。

落船例牌去食長洲大大魚蛋先，我同小王子每人一粒，上次老公買左蝦丸都好食，但今日老公唔係到share，唯有下次先。

甘永泰魚蛋

地址： 長洲新興街106號地下

今天的目標就係去食平安包，我和小王子都係第一次食。

頭先係碼頭都有平安包，仲有個包山仔可以影相，但我都係鍾情於呢間。

康蘭餅店
地址：長洲海傍道91號B地下

平安包已經吹凍，可以即刻食，有幾款餡。

橫掂小王子全部餡都唔like，我就揀我最like既黑芝麻。

真係好食，餡唔甜、包軟軟的。

我臨走都買左個比老公，都有問小王子要唔要買多個明天早餐，佢話唔要。

夜晚老公食既時候就搶住食，我都後悔冇買多幾隻出來。

今次因疫情少左好多、好多、好多人，所以出年太平清醮人山人海唔會來。

之前睇到報導農場餐廳老闆係長洲東山再起，我冇專登搵就碰到。

報導：農場餐廳

同小王子周圍影下相，佢仲話學我影相~哇哈哈。

我行去天然買芒果糯米糍，但冇開門，就掉頭行去〝長洲平記〞。

長洲平記
地址：長洲北社海傍路19A號地舖

小王子話要影下相，其實，芒果糯米糍都冇咩特別，但入到來點都要食下既。

食完芒果糯米糍再向前行就係太平清醮拜神既地方，今日真係熱到嘔，係到影左幾幅就流晒汗。

跟住帶小王子去向海灘方向出發，路經〝洲啤工房〞話要食薯片。

我記得小王子還小的時候試過，真係好難食，點知今次小王子又話要食，算喇！比多次機會佢。

今次好脆，同上次簡直係兩回事，咁下次都可以再食。

洲啤工房
地址：長洲東灣道16號

有幾款味粉，小王子情有獨鍾海苔。

我地走左去海邊既公園坐，小王子吹住風玩下電話，舒服到唔捨得走。

坐左大半個鐘就搭船走，然後去接老公放工，一齊食埋晚餐就回家去。