白糖糕 (內附食譜)

白糖糕係我鍾意的中式小吃之一，每次都會吃3-4件架！成日都好想知點整。   

前排到見到網友整〝自製白糖糕〞，賣相與街一樣。  尋晚我就動工嘞！

糕要發酵8小時，我就臨瞓前整定個漿來發酵。   

瞓醒就立即拎去蒸，真係好期待成品。   

出來賣相真的與街一樣，係食落實左D，若然唔係就完美嘞！  

朋友都話OK，係比平時硬左D，佢比較喜歡硬的，而我就鍾意食QQ的。   

甜味剛好，係硬左D啫！   

食譜出處沒有列出，因為已經變了不好的網站了。

後記：

• 3/5，我再蒸返熱來吃，熱食真係好軟熟，所以記得熱食喇！ 

整後心得：

• 隔晚後發現有沉澱物，我倒晚時候輕輕攪勻，因為怕泡泡會散，令到效果唔好。

白糖糕

材料:

粘米粉              100克  

糖                  80 克  

水                  220ml  

泡打粉              1/4 茶匙  

酵母                半茶匙  

溫水                1湯匙  

做法：  

1) 將糖加入水中用細火煮至糖溶化。  

2) 粘米粉、泡打粉過篩後撞入糖水，其間不停攪拌，以免起粒粒。  

3) 將粉漿用細火煮熱，不停攪拌，然後過篩待涼。  

4)  酵母加入暖水中拌勻靜待5 - 10 分鐘。  

5) 將酵母水倒入粉漿中拌勻發酵 8小時。  

6) 發酵完成後，將粉漿倒入已掃油既盤內，再用大火蒸30 分鐘。  

試醃青梅

前日浸〝梅酒〞，未浸之前都諗有剩青梅既話不如拎來醃鹹它。   

我一心諗住用鹽和醋來醃，到我去買青梅時，阿姐話唔駛用醋。   

若果好味先出個食譜，希望成功喇！

菠蘿戚風批 (內附食譜)

其實，尋日我整架喇！諗住拎返屋企多人食，一定食得晒。   

我用唔甩底批模，心急一出爐就倒出來，怕甩唔到嘛！點知又出事，又散晒。   

今日再整過，雖然都算成功，但批皮覺得都係有點問題。   

我將批過落隻碟到，又爛咁D，真激氣。   

好在味道唔錯，都冇嘥心機。   

唉！多年前又係用唔甩底模整批一次就成功，果次真係符轆。   

我冇講大話架！有証明我真的成功過架！   

例證：〝芝士草莓批〞、〝芝士什果批〞   

莫非批是我的宿敵？我要整多D至得。

菠蘿戚風批  

食譜來自：專業糕點製作  

材料：(1個6吋批)  

牛油 (放軟)          45克  

糖霜                         20克  

蛋黃                         1茶匙  

麵粉                         65克  

批做法：  

1.           將所有材料放入盆中，搓勻成麵糰便可。  

2.           桌面撒上少許粉，放上甜鬆酥，用木棍輾薄約3mm厚。  

3.           用木棍捲起麵糰，小心地放入批模內，用手將麵糰輕輕按貼批模。  

4.           用膠刮去掉多餘麵糰，放入預熱180度的焗爐內，焗約15-18分鐘至金黃色。  

菠蘿餡材料：  

菠蘿汁                     215克 (新鮮菠蘿用攪拌器攪成汁)  

粟粉                         30克  

砂糖                    35克  

鹽                        2克  

蛋黃                     1隻  

菠蘿粒                    150克  

蛋白                     1隻  

砂糖                40克  

菠蘿餡做法：  

1.           將55克菠蘿汁與粟粉拌勻。  

2.           160克菠蘿汁、35克砂糖及鹽同煮沸。  

3.           拌入粟粉液，用打蛋器邊落邊攪，轉慢火。  

4.           將蛋白加入40克砂糖，打起至起勾狀，備用。  

5.           煲內菠蘿汁煮至濃稠，離火加入蛋黃，拌勻。  

6.           再加入菠蘿粒拌勻。  

7.           隨即加入蛋白內，邊落邊攪至完全拌勻。  

8.           注入已焗至金黃色的批殼內。  

蛋白面材料：  

蛋白                      1隻  

砂糖                    42克  

魚膠片 (浸軟)       2克  

蛋白面做法：  

1.           蛋白加砂糖隔熱水打起。 

2.           泡沫轉白，加入已浸軟的魚膠片，繼續打發至挺身入唧袋。  

3.           唧上菠蘿餡面。  

4.           或用匙加上菠蘿餡面。 

5.           放入上火預熱250度的焗爐內，焗約1-2分鐘至金黃色。  

貼士：   

l   焗蛋白面時要留意小心焗過火。

益力多士多啤梨乳酪布甸蛋糕 (內附食譜)

今日老豆生日食飯，老公要O.T.不能來。   

我就整左個蛋糕，又係冇食譜，自全都係靠估。   

出來的效果似布甸，就將個蛋糕名改為布甸。   

我心急，所以餡攪得唔太勻，甜分佈得不均勻。  

益力多和乳酪味唔多夠，下次落重手D先。   

娣婦話好食過〝士多啤梨乳酪慕絲批〞，阿B又係好鍾意食。     

益力多士多啤梨乳酪布甸蛋糕  

餅底材料：(6吋模)  

消化餅           4塊(60克)  

牛油溶液             25克  

餅底做法：   

1.           將消化餅壓碎，加入已溶的牛油混合，壓在蛋糕模內，放入雪櫃冷藏一會，備用。  

慕士餅材料：  

士多啤梨乳酪       150克  

砂糖                37克  

益力多                    1枝 (100克)  

淡忌廉            200毫升  

魚膠片               15克  

慕士做法：  

1.           魚膠片浸軟，然後隔水座溶。  

2.           用電動打蛋器將淡忌廉加糖打至6成，備用。  

3.           士多啤梨乳酪和益力多攪勻，再將(1)加入攪勻。  

4.           將(4)加入(3)內，倒入慕絲圈內。  

5.           將(5)冷藏1小時，脫模。

士多啤梨乳酪慕絲批 (內附食譜)

尋日就係諗住整呢個批去BBQ，等老公有個驚喜，但脫模出了點意外。   

今晚回娘家吃飯，我可以再整，然後拎左去肥阿哥家給大家試食。   

整既時候都有點戰戰兢兢，因為批皮有食譜，但個餡係冇，全由自己調教和組合。   

批皮實左D，餡第一次食甜，但第二次食就適中，整體都OK。   

阿B好鍾意食個餡。 

士多啤梨乳酪慕絲批  

材料：(7吋批底)  

麵粉             120克  

無鹽牛油               60克  

糖                      30克  

蛋                            1/3隻  

士多啤梨乳酪餡：  

淡忌廉                    120毫升 (約123克)  

糖                            40克  

士多啤梨乳酪         150克  

魚膠片                  8克  

做法：  

1.       已篩麵粉、糖和室溫牛油搓成粒狀。  

2.       加入蛋液搓勻，以保鮮膜包好，冷藏30分鐘。  

3.       取出以擀麵棍將麵糰碾平至大於批模底。  

4.       鋪上批模底部，界出圓形成批底，放回批模內。  

5.       將其餘麵糰輕按在批模邊。  

6.       用叉在批底戳小孔。  

7.       以180度焗約15分鐘，待涼。  

8.       魚膠片用凍水浸軟，然後用熱水座溶。  

9.       淡忌廉加糖打至7分起。  

10.    將(8)加入士多啤梨乳酪內攪勻。  

11.    將(10)加入淡忌廉內。  

12.    冷藏1小時15分鐘。