蜂蜜蛋糕~完全失敗

尋晚漏夜跟〝Blog友仔~Grace〞整靚靚〝蜂蜜蛋糕〞，但我整左2個都失敗左。 其實，我心中有數，所以今朝切開睇到一D都冇失望、驚訝！ 大家想知點整可以去〝Blog友仔~Grace〞到睇下。   

兩個〝蜂蜜蛋糕〞都實到可以〝掉死狗〞， 望落去都唔似蛋糕一D麵粉質感都冇。可能問題出於未打到雞蛋好似漿咁(滑)、 攪粉時攪得太耐將泡泡都整走晒，個蛋糕模我倒扣左成晚都唔甩，而個錫紙兜一扣就甩喇！做完賽後檢討後，有時間再試過。

我去完街寫寫下Blog諗起明天去肥阿哥到冇時間整包整餅， 又記起〝Blog友仔~Grace〞〝蜂蜜蛋糕〞好易做，所以就立即去開工。 我開工時都十一點幾怕嘈住人，故打左一陣都唔滑就求其將其他材料攪埋。

我都冇等第一次既結果就開工做第二個，第一個我焗左3次25分鐘先熟。 我用手指按一按就有好多油浸出，攪到成手指係油， 後來我焗第二個時再一齊焗就冇呢個情況出現勒！     

第二個，我打左好耐都係得泡，於是放棄就將其他材料撈埋一齊。     

焗完第一次25分鐘唔熟表面仲係白雪雪就較大幾度火焗， 點知一陣就焗到表面咁既樣喇！於是我就加張錫紙係面再焗， 都唔知焗左幾耐先熟。