萬聖節@K2

今年萬聖節都係整斗篷，仲加多個南瓜桶，已經裝滿左糖。

小王子鍾意隻蜘蛛，所以用來做個蓋。

然後加多個斧頭~掂晒！

斗篷上仲有隻大蝙蝠添！

保良局140周年服務巡禮

尋日小王子約左大細孖表可哥去香港公園既沙池玩，出門口見到同學仔跟住又約左夜晚在家樓下公園玩，唔知係咪凍親，回家體溫37.3。

一早講好帶小王子去〝保良局140周年服務巡禮〞係維園攪既活動。

今朝起身冇燒，但身體都係熱，乞嗤就有鼻水，所以照帶佢出呼吸一下。

我地由天后果邊入， 一入就有搖控車玩，一次5個人玩，所以都唔係排好耐。 

我同小王子去玩攤位遊戲，老公就去排吹氣彈床，差唔多到就打電話叫我地回去。

排左半個鐘，但就每人限玩2分鐘。

答啱晒問題的禮物。

捐$10就可以要一個扭波波 ，有多款揀。

其他攤位遊戲。 

玩到肚餓食野先，爆谷$10，而糯米糍都係 $10。

爆谷好細包，不過，糯米糍個皮好軟熟，餡又唔甜~正。

只要集齊印仔就可以換禮物，呢到有3份禮物。

米奇90週年展覽‧香港公園

老公連續第3個星期六要返工，打斷晒啲計劃。

尋日問左小王子，佢話想坐丁丁和船，仲要接爸爸放工，所以今日單拖帶小王子出街。

首先全港鐵去時代廣場睇米奇，然後坐丁丁去香港公園玩，然後又坐港鐵去中環搭船，到左尖沙咀就坐巴士去接爸爸放工。

今日地鐵和丁丁都有人讓坐比我，又有2個人主動幫我影相，其中一個仲係遊客添。

老公唔係到我唔識坐丁丁，上車問左人，佢臨落車再同我講多次，過左幾個站突然有人拍我叫我呢個站落車，真係幸運日。

小王子影相唔正經

其實，都冇咩野睇，半小時唔駛就行完。 

小王子話要同佢影相 

原本冇諗住入去睇，但小王子要睇唯有排隊，好在又唔係排好耐，加上天氣涼，一啲都唔辛苦。 

見到又話要影 

行完上商場睇下仲有冇其他野，只係得隻掛起大米奇，同埋地庫有間pop-up store買米奇產品。

下站：香港公園 

小王子未嚟過，所以帶佢來玩。 

小王子最鍾意個沙池，佢話明天要再嚟，不過明天要去婆婆到，仲話下次要帶埋啲工具來玩沙。

沙池有3-4部這款機，但都要啲力氣先玩到 ，所以小王子呢個係求救表情，佢唔夠力。

鮮茄洋蔥豬扒 (內附食譜)

今朝阿媽話買豬扒比我整洋蔥豬扒好唔好？我緊係OK。

不過，有一之肥阿哥已經話又係洋蔥豬扒，問我有冇第2樣。

每次都係阿媽落order叫整，都唔關我事架！

我轉個頭就叫阿媽買埋番茄，整新野〝鮮茄洋蔥豬扒〞。

我係廚房預備時肥仔問我整咩？我話〝鮮茄洋蔥豬扒〞。

佢話用洋蔥怪怪地，我話有幾怪，茶餐廳都有類似既野架喇！

平時我會煎左豬扒先，但今次就煮左配菜先~怕麻煩，事關阿媽個易潔平底鑊要放涼先洗得。

鮮茄洋蔥豬扒

材料：

豬扒                464.4克

番茄                481.3克

洋蔥                366.6克

醃料：

豉油                2湯匙

糖                    1/2湯匙

水                    2湯匙

生粉                1茶匙

老抽                1茶匙

調味料：

糖                    2茶匙

鹽                    1茶匙

番茄醬            2湯匙

魚露                1茶匙

茨汁：

老抽                少許

生粉水            少許

做法：

1.          將豬扒洗淨、瀝去水份，用刀背拍鬆。

2.          用醃料醃半小時以上。

3.          洋蔥切絲，炒至開始淋身，盛起。

4.          番茄一切8瓣，炒至脫皮。

5.          煎熟豬扒，切小件。

6.          洋蔥、豬扒、番茄回鑊，下調味料炒勻。

7.          最後加入老抽調色，再加入生粉水，即成。

主題：家庭

今日收到老師電話，派左2張晝紙要晝家人。

食完晚餐立即動工，我都好耐冇畫畫了。

用鉛筆起稿，然後用水筆綑邊，可惜支水筆斷墨，畫得唔多暢順。

當然要小王子填色，都仲係唔係咁靚。