掛泵

餵母乳和順產都是我從小的願望，其實都好好笑，好少人好似我咁。

自2014年7月1日零晨開始，我就開始餵母乳生涯，感覺好奇妙。

放產假時日頭已經冇得休息，每晚半夜起幾次身pump奶、餵奶，由於我奶量不多，所以就算平日要返工半夜都起2次身泵奶。

最怕半夜泵奶撞上小王子起身要食奶，因為小王子又唔跟老公，當時真係人都癲。

每日都孭重背囊返工，日頭返工又要泵3次奶，好在部門同事都好支持，當我泵奶時佢地會替我個位，連隔離部門都支持，有時conference用晒，佢地會借房我用。

今天最後一泵，因為小王子再唔食我泵出來的奶，只是埋身，跟住可以掛泵了，再見我的戰友，下星期開始唔駛孭背囊返工了，可以好輕鬆，平時就埋身。

出街就一巾走天涯，所以去旅行都可以好輕鬆。