杏仁糖 (內附食譜)

我好鍾意食〝樂家杏仁糖〞，記得小時候新年緊有人會送來。

我就會好期待拆開，好在家中冇乜人喜歡吃，大部份都係我食晒。

我會邊睇電視邊食，一粒接一粒。

人大左怕肥唔敢了，雖然心好想食晒佢，我會限自己每次食2粒，最多3粒。

我既然咁鍾意食，梗係要整下喇！

小王子話好食，但食食下有啲苦，因為煮燶左少少，但這款就是我想要的。

製作過程遇到的情況：

• 書中話用中火煮7分鐘，煮到淡黃色再煮到杰身，我再煮就耐啲開始有點燶，我覺得煮7分鐘可以了。
• 整形時花左太多時間，加壓10分鐘，點知糖好硬，切到我手掌心都瘀晒，所以整形要快手，若花太多時間整形，壓既時間就縮短。
• 煮完糖好熱，整形時小心。
• 我用不沾布整形，唔會怕黏住張紙難撕。

杏仁糖

食譜來自：餅房蛋糕秘方

材料：

杏仁                    70克

淡忌廉                125克

無鹽牛油            30克

粟膠                    60克

砂糖                    100克

鹽                        1茶匙

雲尼拿香油        1茶匙

面料：

杏仁碎                100克

黑朱古力            適量

做法：

1.          淡忌廉、牛油、粟膠、砂糖、鹽同放煲內，以中火煮約7分鐘(期間會滾至起泡，只要不滾瀉就不必收小火)，邊煮邊攪拌，糖漿會由半透明轉為淡黃色。

2.          續煮至杰身，加入雲尼拿香油，關火。

3.          加入杏仁拌勻。

4.          倒在鋪上牛油紙的焗盤內，摺起牛油紙包着杏仁糖。

5.          隔着紙擀平杏仁糖，盡量維持2吋闊度。

6.          用焗盤壓着杏仁糖，靜置10分鐘。

7.          切件。

8.          杏仁碎放入已預熱焗爐，以150度烘10分鐘至香脆。

9.          黑朱古力座熱水至溶化。

10.      遂件杏仁糖沾上朱古力。

11.      再沾上杏仁碎即可。放三天才吃，質感最佳。

貼士：

l   切須用品質較佳的牛油紙，否則會緊黏着杏仁糖撕不去。