今日是娣婦生日，所以安排好明天回娘家攪大食會。
尋日早上我開始整蛋糕，蛋糕有4層。
我整左個餅底和黑朱古力慕絲，諗住另外2層就明天先整。
可是，接放學時老師提醒明天家長日，所以晚上我整埋牛奶朱古力慕斯果層，鏡面就留今日整。
今早起身還是有點不舒服，星期二下午開始，當天晚上做左快測沒事。
我叫老公送小王子返學，我繼續休息一下。
中午老公接了小王子回來，我諗住去睇醫生前做個快測先，點知‧‧‧‧‧‧‧我中獎了。
老公立即做快測~沒事，小王子返校前做左，保險些再做多次，都是陰性。
今日家長日告吹了，立即致電學校，又與班主任聯絡，安排老爺代取成績表 (不同住)。
蛋糕裝飾都做好了，我與小王子每人吃了一小件，然後就掉了，因蛋糕不敢送人。
我覺得蛋糕甜，可以減糖。
小王子喜歡個餅底。
製作過程：
- 黑朱古力和牛奶朱古力，我都是用無須調溫的來做。
- 淡忌廉打起，加入朱古力漿會令到淡忌廉變鞋和一舊舊~不順滑，只要你座暖水就攪就可以解決。
- 整牛奶朱古力慕斯時，糖和蛋黃用半分鐘未達到奶黃色，所以自己要睇情況。
- 係牛奶朱古力慕斯的步驟加入魚膠片係溶唔到，我建議，用個兜加浸溶的魚膠片加入適量的牛奶朱古力慕斯去座溶，然後倒回牛奶朱古力慕斯兜內。
- 煮朱古力鏡面時用30秒都未去左102度，所以我就繼續煮，又係要自己睇情況。
- 蛋糕斫白色2條係用白朱古力係烘焙紙上晝完卷起造成的。
- 我用6吋慕絲圈，一直都怕個餡會否太多會over個模，但原來4層夾埋係剛好，不用擔心。
- 鏡面是沒有用剩的，好在我冇將份量減，唔係就唔夠了。
- 我用保鮮紙包住個慕絲圈，再包錫紙，因為我擔心個餅底用朱古力漿會黏住錫紙。
朱古力狂想曲 Chocolate ecstasy
食譜來自：精緻慕斯蛋糕
朱古力脆脆底材料：6吋圓形模具一個
黑朱古力 55克
薄脆片 70克
黑朱古力慕斯材料：
淡忌廉 100克
淡忌廉 50克
黑朱古力 100克
魚膠片 2克
牛奶朱古力慕斯材料：
淡忌廉 100克
蛋黃 40克
糖 20克
牛奶朱古力 70克
魚膠片 5克
朱古力鏡面材料：
淡忌廉 60克
水 70克
糖 80克
可可粉 30克
魚膠片 5克
朱古力脆脆底做法：
1. 將朱古力以熱水座溶，加入薄脆片即成。
黑朱古力慕斯做法：
1.
把100克淡忌廉用打蛋器打起至軟雪糕狀。
2.
把50克淡忌廉煮熱後倒入黑朱古力攪至融化，然後放入已浸軟的魚膠片拌勻。
3. 分2次拌入已打起的淡忌廉，拌勻後備用。
牛奶朱古力慕斯做法：
1.
把100克淡忌廉用打蛋器打起形軟雪糕狀。
2.
把牛奶朱古力座熱水攪至融化，加入已打起的淡忌廉。
3. 把糖和蛋黃用打蛋器打至奶黃色，期間需座熱水不停攪拌半分鐘左右。
4.
把步驟 (2) 加入，拌勻後加入已浸軟及融化的魚膠片拌勻。
朱古力鏡面做法：
1.
先將水、淡忌廉和糖煮滾，及後加入可可粉攪勻。
2. 加入已浸軟的魚膠片，期間不停攪拌，約30秒左右或煮至約102度，離火，隔去粗粒，放涼備用。
組合及裝飾：
1.
把黑朱古力慕斯餡倒入已有脆脆底的餅模內，冷凍。
2.
加入牛奶朱古力慕斯，冷凍，最後淋上已放涼的朱加力鏡面雪至凝固。
3. 脫模後放上朱古力裝飾作裝飾。
小貼士：
l 朱古力鏡面可於2小時前預備，剩餘的可放進雪櫃留待下次用。
l 倒入鏡面時可用隔篩隔去粗粒。
沒有留言:
發佈留言