益力多藍莓慕士蛋糕 (內附食譜)

我見雪櫃有盒〝藍莓果醬〞就快到期，咁啱今日有朋友來，所以就上網搵下食譜。我係韋太到搵到〝益力多藍莓慕士蛋糕〞。   

由於第一次整鏡面，倒落去慕絲時大力得滯撞起左D慕絲，攪到鏡面好似發霉咁，所以冇正面睇既。佢地話甜左D，但就好好味，唔夠上次〝香濃綠茶慕絲蛋糕〞好味，不過，我就唔覺得甜，咁既話下次整就將糖份減D先。   

我將食譜既淡忌廉份量改左，因為我買左一盒細，又唔想落街買，買多盒又怕嘥左，而且我磅過只係差少少，差少少都唔多覺，成果唔錯。    

益力多藍莓慕士蛋糕  

餅底材料：(6吋模)  

消化餅                      4塊 (60克)  

牛油溶液                    25克  

餅底做法：  

1.           將消化餅壓碎，加入已溶的牛油混合，壓在蛋糕模內，放入雪櫃冷藏一會備用。  

慕士餅材料：  

藍莓果醬                       75克  

砂糖                             30克  

益力多                         1枝 (100克)  

淡忌廉                     200毫升  

檸檬汁                     1+1/2茶匙  

魚膠粉                    7克  

水                                 40克  

藍莓鏡面材料：  

黑加侖子啫喱粉           45克  

魚膠粉 (拌勻)             1/2茶匙  

熱水                              125克  

藍莓果醬                      50克  

慕士做法：  

1.           將材料藍莓果醬、砂糖、益力多、檸檬汁拌勻後放入鍋內隔熱水座溶後放涼。  

2.           用電動打蛋器將淡忌廉打起至6成備用。  

3.           魚膠粉加水拌勻，用熱水座溶後加入藍莓醬內拌勻。  

4.           將藍莓醬料加入已打起的淡忌廉內拌勻。  

5.           將慕士料倒在餅底上，冷藏1小時。  

6.           將藍莓鏡面材料攪勻倒入慕士料內，將藍莓鏡面冷藏2小時即成。

榛子芝士蛋糕 (內附食譜)

我都有一段日子冇整包餅，尋日茜茜和迪迪媽來我新屋，所以前日我諗住整趁機新野，等大家一齊消滅它，平時得我一個好難。   

我見有榛子粉，就揀左呢款慕絲蛋糕，雖然一齊分享，但都怕吃不完，所以由食譜8吋改為左6吋蛋糕，但係始終都係冇吃到，因為到走既時候都係忘記左它。   

今日我就切了一件做早餐，其貌不揚的它以為唔好吃，但原來味道都不錯，可惜老公唔吃蛋糕，得我一個都唔知點攪掂它，可能最終都要請垃圾桶食。   

榛子芝士蛋糕  

食譜來自：精巧甜品 DIY2  

預備：  

l   6吋餅模圈以牛油紙包褢底部。 

l   忌廉芝士置室溫下軟化。 

l   魚膠粉加水隔熱水座溶  

鬆酥皮餅底材料：  

麵粉                          68克  

牛油                        34克  

糖                       17克  

蛋                       1/5隻  

鬆酥皮餅底做法：  

1.          已篩麵粉、糖和室溫牛油搓成粒狀。  

2.          加入蛋液搓勻。  

3.          以保鮮紙包好，冷藏30分鐘。  

4.          取出以擀麵棍將麵糰碾平至略大於餅模。  

5.          在麵皮上放上圈形餅模，撕去多餘部分。  

6.          戳小孔。  

7.          以180度焗約15分鐘，待涼。  

材料：  

忌廉芝士                   141克  

鮮忌廉                     141毫升  

牛奶                   141毫升  

水                      68毫升  

榛子粉                   45克  

糖                          42克  

魚膠粉                  14克  

蛋黃              1 1/2隻  

做法：  

1.       忌廉芝士加入糖，以打蛋機打至軟滑，再加入蛋黃續打至均勻。  

2.       留下少量榛子粉作飾面，其餘加入牛奶拌勻，輕輕拌入芝士醬中，再拌入魚膠溶液。  

3.       鮮忌廉以打蛋機打至八成鬆發，徐徐覆入芝士醬中拌勻。  

4.       酥皮鋪在餅模圈內，將芝士醬倒在酥皮上。  

5.       冷藏4小時，脫模，灑上榛子粉，切件享用。

再醃鹹柑桔

上星期〝醃鹹柑桔〞，阿媽怕我冇位擺，所以叫我醃一盎夠嘞！

基於我仲有個空盎，而且〝鹹柑桔〞真係無價寶，所以想再醃多盎，但生果阿伯又冇開檔，又搵唔到柑桔買，心有不甘。   

尋日雖係〝黑色星期五〞，但對我來講一D都唔黑，食完晚飯去買粥比老公時，經過生果檔見到有〝超甜柑桔〞，但要9蚊磅咁貴，上次都係6蚊磅咋喎！再行前另一間睇下，問左冇柑桔，唯有貴都買喇！同上次一樣買左十蚊。

尋日〝黑色星期五〞買柑桔，今日情人節就醃柑桔，唔知要浸幾多個情人節先變黑呢？     

今次用呢個都係〝雀巢咖啡盎〞，但係新款既，真係舊盎真係寶，舊盎一層可以放7粒，新盎一層放得4粒，睇下差幾遠，都好在盎細左，唔係就唔夠柑桔放，有見及此，所以今次我就放在滿一滿，因為太滿我就封左層保鮮紙先封蓋。     

上次果盎可能因回南天氣，所以鹽溶得好快，盎野都矮左，睇下好多都變水喇！阿媽和老豆都話加一次鹽就可以，不用再開封加鹽，我見呢盎既情況都可能係不用再加鹽。

豆沙煎餅 (內附食譜)

前排見到〝獅頭媽~豆沙燒餅〞已好想整，因為我阿公都好鍾意食，但因要用〝紅豆沙茸〞，所以一直冇整。

直到有一日去〝十蚊店〞見到〝紅豆沙茸〞物體，但我又唔識日文，買左先算，今日我開左來試下味先動工。

〝紅豆沙茸〞我好少用，為左唔想留要盡量用晒佢，可惜澄麵唔夠，但我都諗定餘下的用來整什麼。   

今次我整左原食譜3倍份量，一共做左12個，但唔敢壓得太扁，因為壓得扁就會好大個，下次整細D又壓扁D先。   

阿公都好鍾意食，佢食左2隻，我都拎左一隻比熊貓姐姐食，佢都話好味、好煙靭。

豆沙煎餅  

食譜來自：Bonbon Kitchen  

材料：  

紅豆沙茸       80克

澄麵粉          30克

糯米粉               150克  

白砂糖                50克

清水                    150毫升

生油                    1湯匙

做法：

1.       澄麵粉、糯米粉同篩入盆中拌勻，清水與糖一起入鍋煮至糖溶，再把糖滾水沖入粉中，加入一湯匙生油，用叉子攪拌成軟滑粉團。  

2.       在工作檯上灑下少許乾糯米粉，把粉糰取出放在工作檯上，搓揉成長條圓形，分切成四等份，取一份粉糰搓圓，好像包湯丸的包入豆沙餡，再把收口揉合。  

3.       把包了餡的粉糰用掌心輕輕壓薄。  

4.       燒熱平底煎鍋下少油，放下煎餅以中慢火煎至兩面金黃香脆即成。

蛋撻 (內附食譜)

老公鍾意食蛋撻，係兩年前我就獻出第一次〝D.I.Y. ※經典聖安娜蛋撻〞，之後都整過一次〝牛油皮蛋撻〞，兩次都整不同款，而且都非常成功，可惜今個月再整就唔多掂。   

我見〝獅頭媽〞和〝Grace〞跟〝韋太〞整得唔錯，所以我今日又的起心跟整。我第一轉焗左30分鐘先得，而第二轉只係焗左約15分鐘，可能焗第一轉時焗爐唔夠熱，所以焗既時候大家要自己留意喇！    

蛋撻  

撻皮材料：(3吋蛋撻模7個)  

低筋麵粉                110克  

奶粉                        6克  

牛油                      70克  

糖霜                        20克  

雞蛋 (打散)              1/2隻  

撻皮做法：  

1.          將低筋麵粉及奶粉預先過篩備用。  

2.          牛油和糖霜用打蛋器打王幼滑後，將蛋液遂少加入拌勻，再將粉篩入，搓成軟麵糰，放入雪櫃雪15分鐘。  

3.          將麵糰平均分開多份，然後搓圓及將適量的餅皮放入模內，沿模邊用手指向撻邊按壓後，修去多餘的餅皮，用叉在撻皮上剌孔，然後注入蛋漿娥7分滿。  

4.          焗爐用180度預熱15分鐘後，將蛋撻放入焗爐，焗約15-18分鐘即可。  

蛋漿材料：  

水                          120毫升  

糖                         30克  

蛋 (打散)                   1 1/2隻  

花奶 (鮮奶)              30毫升  

蛋漿做法：  

1.          預先將糖加水煮溶後放涼備用。  

2.          雞蛋拂勻後放入大碗內，然後將花奶加入蛋漿內拌勻。  

3.          再將糖水慢慢沖入蛋漿內拌勻，再用篩濾去雜質備用。