混醬車仔餸 (內附食譜)

今朝阿媽飲完茶返嚟，走去我旁邊細細聲同我講買左，我話買左咩丫？哦！原來係魚蛋、牛丸整這款〝混醬車仔餸〞，佢講完我先醒起尋日叫阿媽買，自己都唔記得左。   

每次我都係在晏晝炆，然後夜晚開飯前煮滾，再用生粉將汁稠濃。我炆既時候阿婆走嚟又同講又做手勢~話D魚蛋發到好大粒，我話係咁架，但阿婆話比我聽時個樣好攪笑。   

上次肥仔話好似街邊車仔檔汁既味道~好，但今次我覺得冇上次咁好，同埋今次冇加辣椒，我覺得辣D好味D。各人都覺味道OK，我仲拎左大半盒比肥阿哥，留待明天肥仔過去，可以晚餐做餸，而我要執屋，還有其他事要做，要看看今晚進度如何才決定，明天還要早起陪老公去食早餐，老公明天要9點9去到〝欣奧〞集合。

混醬車仔餸  

材料：  

牛柏葉                  $33

蘿蔔                       $12 (2個)

牛丸                         1/2斤

魚蛋                         1/2斤

調味料：

沙茶醬                     3湯匙

柱侯醬                     3湯匙

蠔油                         3湯匙

糖                             3湯匙

辣椒                         適量 (隨個人喜好，可以不加)  

麻油                         適量

胡椒粉                     適量

清水                         適量

生粉                         適量

做法：  

1.       將材料洗淨，然後將蘿蔔皮削去，切件。  

2.       將蘿蔔放入煲內，加水剛蓋過蘿蔔，用中大火煲滾。  

3.       煲滾後再轉細火炆1/2小時。  

4.       加入魚蛋、牛丸、調味料再炆45分鐘。  

5.       然後再加入牛柏葉，滾後打茨熄火，即可。