美味餐包 (內附食譜)

大前日與老公講今晚晚餐我會整餐包，老公居然話好，平時佢會覺得麻煩叫我唔好整，但我講完又唔想整，尋晚再問多次老公，佢都話整，所以我今朝7點幾就起身。   

尋日忘記買鮮奶整包，就晨早落街買，落到去記起〝依士〞開左好耐怕失效，於是去〝佳寶〞搵，但得梳打粉，再走去〝惠康〞，佢值頭連梳打粉都冇，再轉去〝百佳〞睇下先，去到又係冇，唯有只買鮮奶算把喇！我返到屋企先記起〝Taste〞，早D記得咪應該買到，好在麵糰都發到。   

今日整包過程都好順利，比以前快好多，所以明天我都會再整包。今次個食譜係我參考之前既食譜所得出來的。搓麵糰感覺到好柔軟，焗、放涼時都聞到陣陣麵包香，一直好期待。   

晚餐飲餐湯，切開個餐包，見到內裡組織好失望，唔係預期中咁靚，但好多野都係唔可以睇外表，雖則組織不美，但都鬆軟喎！老公都話OK，都唔會太差喇！再抺埋牛油，簡直係無得頂丫！

美味餐包

 材料：(5個)

高筋麵粉           200克

砂糖                   30克

奶粉                   6克

依士                   3克

牛奶                   100克

牛油                   30克

蛋                       30克

鹽                       1克

 

做法：

1.         將牛奶座暖，加入依士，置桌上2分鐘。

2.         除牛油外將所有材料混合，搓成麵糰。

3.         加入牛油搓至成薄膜狀即大功告成。

4.         盆內塗上一層薄固體菜油或噴一層菜油。

5.         將已搓滑的麵糰放入盆內。

6.         蓋上保鮮紙漿廠以防表面乾硬)。

7.         將整盆麵糰放入另一個注入30℃-40℃溫水的盆內，發酵約1小時。

8.         發酵後的麵糰約成原來的2.5-3倍大。

9.         將麵糰分割成8等份。

10.     將每份麵糰輕輕拉長(摺兩摺)─第一摺、第二摺。

11.     分割8等份用保鮮紙包好麵糰，鬆弛10分鐘。

12.     將麵糰放桌上打圈滾圓，把氣擠出。

13.     搓成表面光滑結實的球形。

14.     放在已掃油的焗盆上，蓋上保鮮紙作最後發酵，約30分鐘。

15.     發酵完成後，麵糰約為原本的2-2.5倍大。

16.     掃上蛋液，放入預熱200度焗爐，約焗15分鐘。