滿意雞批~老公版 (內附食譜)

老公好鍾意食雞批，每次回娘家阿媽都買定一個比佢。

我係12年前為老公寫左呢個雞批食譜，因為老公鍾意食之餘，仲鍾意食厚皮。

12年前大家都話個皮唔夠甜，今次我就改動一下。

老公都好鍾意我這個雞批，如果鍾意食厚皮既可以試下。

晨早起身就動手做，今次好揼本，平時用罐頭磨菇，尋日就去左新鮮磨菇。

新鮮磨菇有個問題係會出水，所以第一時間炒左磨菇先。

炒既時候都有出水，炒完盛起，出其地冇再出水，但下次都係用返罐頭穩陣啲。

我諗有排都唔會整，好野唔好成日整，整得多就唔矜貴。

我帶左一個出街食，真係好好味。

 滿意雞批~老公版

雞批撻皮材料：(8cm撻模6個)

麵粉                            240克

雞蛋                                 1隻

糖霜                                  60克

無鹽牛油 (室溫)               150克

吉士粉                                3茶匙

泡打粉                                1/3茶匙

撻皮做法：

1.          牛油與糖霜奉勻至軟身，加入蛋拌勻。

2.          加入吉士粉、泡打粉、麵粉用手輕輕拌成麵糰。用保鮮紙包好放入冰櫃，冷凍30分鐘。

掃撻面用的材料：

蛋                                          半隻

油                                        1茶匙

做法：

1.          將蛋和油拌勻。

雞肉醃料：

廣東米酒                                 1茶匙

生抽                                          1茶匙

生粉                                          1茶匙

麻油                                          少許

胡椒粉                                少許

餡材料：

牛油                                          1茶匙

雞肉                                          140克

洋蔥                                          40克

磨菇 (切片)                              368克

白汁麵撈材料：

牛油                                          20克

麵粉                                          1湯匙

水                                           100克

花奶或鮮奶                     30克

胡椒粉                                少許

雞粉                                          1茶匙

鹽                                          1/8茶匙

糖                                          1/8茶匙

預備：

·         焗爐用200度預熱15分鐘，另準備1張保鮮紙將撻皮面放入去將皮搌平。

做法：

1.       雞肉切丁粒加入醃料醃15分鐘，洋蔥切幼粒備用。

2.       燒熱鑊加入牛油1茶匙，先將洋蔥少香後，再加入雞丁粒炒至半熟，然後加入其他材料略炒後盛起備用。(牛油作用炒香洋蔥及雞扒起鑊用。)

3.       另燒熱鑊加入牛油20克煮溶後，加入麵粉快手將麵粉炒至沒有粉粒後，將已炒好的餡料全部加入拌勻，然後將其他白汁麵撈材料加入，慢水將汁焊煮至濃稠後，關掉爐火，放涼備用。

4.       將撻皮取出，搓成長條形後，用手抽出約45克的粉糰作撻皮底，將皮放入模內，用手指將粉糰壓至4mm厚，用叉在皮面刺孔，放入餡料，撻邊掃上少許蛋漿，再蓋上3mm厚撻皮面(約37克)封口，用牙簽在皮面上輕輕劃上花紋，再輕輕掃上蛋汁。

5.       放入已預熱的焗爐底層用200度焗12分鐘，然後將焗盆戭上去中層，並用200度焗7分鐘至金黃色。