紅酒炆牛尾 (內附食譜)

 我從未食過牛尾，亦唔想去試，因覺得尾點可以食架！

我個人非常揀食，有好多野都唔食，有一次出街食飯，冇得揀之下點左牛尾。

我試過後覺得幾好又唔抗拒，感覺有啲似牛展咁，我最鐘意這質感。

這星期老公話煮飯，平時我話煮佢叫我唔好煮，見佢開到聲咁我就試下炆牛尾喇！

我上網睇左好多食譜，來來去去都係果啲配料，咁我就求其買啲配料。

老公話好食，但小王子唔喜歡個質感，咁就益晒老公。

紅酒炆牛尾

材料：

牛尾                              454克

紅蘿蔔 (連皮)             413克

番茄                              438克

洋蔥 (連皮)              289克

蒜頭 (去衣)              2瓣

史雲生清雞湯          500毫升

紅酒                              100毫升

茄膏                              適量

冰糖                              適量

做法：

1.       牛尾洗淨瀝去水份。

2.       紅蘿蔔去皮，滾刀切件。

3.       洋蔥去皮，切去頭、尾，開一半，切大粒方形。

4.       番茄開一半，然後去蒂，切瓣，再切一半。

5.       燒熱鍋和油，放入洋蔥炒至香，盛起。

6.       燒熱鍋和油落蒜頭，再放入牛尾，煎至兩面微焦。

7.       加入一半洋蔥、一半番茄炒勻。

8.       再加入紅蘿蔔炒勻。

9.       加入史雲生清雞湯、茄膏、冰糖，用最小火炆30分鐘。

10.   加入餘下的洋蔥、番茄，用最小火炆30分鐘。

11.   加入紅酒用中小火炆20分鐘。(試味可能要再加冰糖，因有時紅酒會苦)