手打漢堡 (內附食譜)

尋日下午老公放假，我地一齊去打第3針。

今日我起身頭、 肩頸和肌肉痛，而老公就打針隻手、頭和腰痛。

今朝11點幾開始右腰至大脾都痛，這次將我平時的痛症的痛放大左。

小王子8點幾就起身了，我就整早餐同佢一齊食。

點解我咁早食早餐？因為我星期一去見左營養師做評估，星期三再去拎餐單。

我開始食返3餐，而且唔減醣和斷食，之前都有諗過我唔可以到死既時候都斷食。

小王子又想我陪佢食晚餐，加上而家冇返工想同小王子一齊食埋早餐。

小王子話媽Mi最好，唔舒服都照顧我，我話世上媽媽係最偉大~哼！老公緊係仲瞓緊喇！

食完早餐後，我又要預備lunch了。

我整左3款漢堡包，自己果款係最健康的。

因為我用好少油，所以用水用煎焗的方法去整熟個漢堡。

小王子和老公都要食薯餅，炸既時間油彈左落我加眼，我立即閉眼，所以眼皮好痛。

老公食完睇左陣電視又去瞓，唯有我自己陪住小王子。

我又差不多去預備晚餐了。

手打漢堡

材料：一人份

芝麻漢堡包        1個

瘦牛肉碎            80克

瘦豬肉,碎           40克

洋蔥                    23克

翠玉瓜                適量

白蘑菇                適量

番茄                    1片

油                        1/2茶匙

水                        適量

調味：

黑椒                    少許

糖                        1/4茶匙

水                        1/2湯匙

做法：

1.          洋蔥切粒，炒至微啡，放涼。

2.          瘦牛肉碎、瘦豬肉,碎、洋蔥粒加入調味料撈勻。

3.          用手攪成團，然後摔至起膠，整成圓形，放入雪櫃。

l   如果你即刻煎可以不用放雪櫃。

4.          芝麻漢堡包用刀切開，中間白鑊烘至邊微啡。

5.          翠玉瓜切片煎至微啡，備用。

6.          白蘑菇切片，加蓋煮至軟身。

l   不用加水或油，菇本身會出水。

7.          番茄切片，備用。

8.          漢堡扒從雪櫃取出，壓扁至直徑9cm-9.5cm。

9.          燒熱鑊和油1/2茶匙，轉中小火。

10.      放入煎漢堡扒，加4湯匙水，蓋上蓋煎焗3分鐘。

l   用中小火煎3分鐘後鑊仍有少少水，但用中火就會乾晒。

11.      3分鐘後開蓋，反轉另一邊，再加4湯匙水，蓋上蓋煎焗3分鐘。

12.      重覆步驟9-10直至漢堡扒熟。

l   用筷子篤中間流出來的不是血水即是熟。

13.      芝麻漢堡包底，放上翠玉瓜、漢堡扒、番茄片、白蘑菇片，最後放上芝麻漢堡包面，即成。

l   用什麼配料隨個人喜好，只是參考。