QMan※Kidz academy

今日去新城市有2個目的：QMan和Fun Park。

Fun Park話係5樓，我去到場封左，跟手去CS問，話已經完左，但我睇網明明話去到9月12日。

我見商場仲播緊條片，完左冇理由唔收起，我都懶得同佢再講。

我轉身就行去一田果邊，一心諗住QMan係果邊，點知又搵唔到，又去問CS，原來係CitySuper果邊。

不過，剛才係一田果邊唔打唔撞見到〝Kiztopia〞擺檔，只要影相upload上Facebook就有汽球。

《QMAN沙田一田夏日玩具展》 

日期：2022年8月19日至9月5日 

時間：上午11:00至晚上21:00 

地點：沙田新城市廣場 東翼地下 (CitySuper落一層)

伊貝的模型，小王子已有了，所以冇買。

仲有高達模型。

場內仲有積木比小朋友玩，有2個位置，但得一個位有積木。

我見小王子砌得咁開心，所以買左一盒比佢回家砌。

對面就係〝Kidz academy 親子學堂〞，嚟咁多次都冇入過去玩，咁就又入去玩下先。

只要你入玩名，然後揀什麼公仔就可以填色了。

完成後，公仔就可以係螢光幕出現。

再去埋另一邊的玩。

玩完就去搵定位等老公，因為我地夜晚去睇〝明日戰記〞。

喜歡，從他白雪雪開始，所以我點會唔去支持他呢？

套戲好好睇，小王子都大讚，起初話唔睇，睇左仲嫌短添！佢話極好睇。

 

久違的下水禮

尋晚小王子突然係肥阿哥家過夜， 今早阿嫂What's app左我，佢地又上左天台踩Roller。

下午食完lunch就諗住去游水，點知雷暴警告去到下午3:30。

肥阿哥大約3點到問管理處，而家泳池開放，大家立即動身。

小王子個龜背已經係上年買，今日先第一次用。

可惜今日都未學識，小王子話好凍，不停震又唔郁。

緊係喇！佢都唔游，教佢又唔學，都唔知佢幾時先學識，自己又話要學，激死。

Roller 輪滑鞋

我要記錄一下，今日小王子都算學識左踩Roller。

這對Roller鞋係6月買，到今日先開封。

原本約左25號去肥阿哥家，等大細孖教阿仔踩Roller，但打風取消了。 

我地上了天台起動。

起初係著一對踩，但小王子控制唔到，所以改用右腳練習先。

踩到咁上下就轉練左腳。

得大孖表哥教，因為細孖表哥話太熱，唔上來。

後來著一對來試，雖然慢，但都算係咁，可以自己慢慢轉灣。

天空世界充氣樂園@百田遊園

上星期我已用Whatsapp預約〝百田遊園〞的佐敦店，不過，而家官網都可以購票了，不過這店網上睇只去左10月中咋！

購買入場劵：百田遊園

入場後可以玩1小時45分鐘，已包一大一小，如人唔多都可以多一個大人入。

去玩之前就去醫肚先，帶左小王子去位於K11 Art Mall。

這間Ikea今年8月開，有美食新品鯊鯊包、藍黃新地配雙色馬卡龍、達拉木馬形蝦餅及乳酪。

我一心以為係K11 Musea的位置，搵左一陣都唔見。

場內又唔商場職員，去到food court見有食店店員出來，厚住臉皮問人先知唔係呢到。

我突然叮一聲知係邊，拿拿淋同小王子行過去，好在都方便唔駛出地面。

這裡廚房好大，齋睇廚房以為呢到有埋餐廳，但係呢到只係得小食。

剛才係N4入口入，但原來再行前一個入口，落樓梯就可直接去到。

食野位置不多，全部高枱、企位，而且有點熱，可能有射燈和角位。

呢到係用自助機，沒有人手幫你點餐，種類沒有網上報導咁多，可能未預備好。

我oder左雞脾、蔬菜餅、熱狗、汽水，仲有2款新品鯊鯊包和達拉木馬形蝦餅，其他新品就沒有了。

熱狗差左好多，個包乾帶點硬，不過，咁平仲想點呢？

小王子不停拎住個鯊鯊包想食，我都未影相。

小王子激讚野食好味，鯊鯊包個餡係番薯，而達拉木馬形蝦餅，真係食到有粒粒蝦肉。

食飽就緊係去放電喇！這是常識吧！

同門口職員報到，再行過幾步搵另一個職員取號碼和同你講離場時間。

袋可以交比門口的店員，佢會擺係枱下的膠箱內，當然係由佢看管，我好放心，所以將袋交比佢。

然後脫鞋就可以入場，咁當然係要著襪喇！

入場的入口左邊有個門口係可以上去玩，房係細，但有煮飯仔和積木，啱年紀小一點的小朋友。

這裡每一個設施都會有工作人員駐守，所以好多家長係傾計或者玩電話，近入口處都有個家長休息室可以入去坐，不過冇枱，大部份家長都係在場內坐。

旁邊有條斜路就係去洗手間，記得著返鞋丫！

在場既工作人員會同小朋友友，小王子玩到唔想走。

玩左冇耐小王子已經識到個小朋友喇！

〝百田遊園〞老闆出來互動攪氣氛，原來這個場前身是一間戲院，咁啱被他租了短期，而身後有3個窗仔的位置是放映室，即是剛才上樓梯煮飯仔果到。

芒果拿破崙 (內附食譜)

我現在冇做野，所以同家人講左盡量有人生日的月份都攪個大食會。

今次8月之星就有2個，就係表姐和阿嫂，大家夾到時間今日一聚。

我當然一早寫好個Menu，不過諗煮咩都有難度，攪左咁多次都唔知煮咩好了。

今早煮左個〝卡士達醬〞係用來整〝芒果拿破崙〞，今次見雪櫃有現成酥皮可以偷懶了。

這次反應唔錯，下次又想偷懶又可以整佢囉！

這個蛋糕唔大，整件切可以夠4個大人吃。

今次我分層切件，因為整件切會易爛晒，每層切4份，所以可以多人吃。

芒果拿破崙

材料：正方牙約12cm x 12cm

現成酥皮                      1塊

芒果 (連皮和核)         541克 (4隻)

卡士達醬                      適量

做法：

1.          芒果去皮和核切粒，備用。

l   我用的類似豬腰芒再大少少。

l   最後用左淨重芒果肉247克。

2.          酥皮從冰箱取出，室溫放置1.5-2分鐘回溫。

l   不要放到軟才切，軟身很難控制和變形。

3.          一開4，平均分成四份。

l   形狀似四方形。

4.          用叉在酥皮上剌洞。

l   刺得多洞和密，酥皮表面脹起的機會少一點，會比較平整。

l   焗的途中脹起得利害，可以在表面負壓，情況會有改善。

5.          用225度，放中層，焗11分鐘。

l   時間要視乎焗爐而定，因每個爐溫都不同。

6.          放涼後可以組合。

7.          放上一塊酥皮唧上卡士達醬，放上芒果粒，再唧上卡士達醬。

l   可以唔用唧袋，用刀抺上卡士達醬，但要輕力和小心，因酥皮脆身。

8.          重覆步驟 (7) 2次，最後放上一塊酥皮。

9.          表面撒上防潮糖粉。(此步驟可省略)

10.      頂部中央唧上卡士達醬放上芒果粒作裝飾。(此步驟可省略)

卡士達醬

食譜來自：https://caroleasylife.blogspot.com/2017/03/blog-post_64.html

材料：份量約380g

雞蛋             2顆(淨重約100克)

牛奶             260克

低筋麵粉     10克

玉米粉         10克

細砂糖         40克

無鹽奶油     10克

蘭姆酒         1茶匙

做法：

1.      雞蛋加細砂糖攪拌均勻。

2.      低筋麵粉加玉米粉過篩。

3.      倒入牛奶攪拌均勻。

4.      再倒入雞蛋液中混合均勻。

5.      牛奶蛋液用濾網過篩。

6.      小火加熱,邊加熱邊攪拌。

7.      直到變成濃稠狀即可離火。

8.      趁熱加入無鹽奶油混合均勻。

9.      稍微冷卻再加入蘭姆酒混合均勻即可。

10.  在表面覆蓋一層保鮮模放至完全冷卻。

貼士：

l   冷卻後會變比較硬是正常的，使用前可以用打蛋器攪拌至滑順。

l   放冰箱密封冷藏保存約3-4天。

l   玉米粉也可以用低筋麵粉代替。

l   甜度可以依照個人喜好調整。

烤金沙骨 (內附食譜)

有次星期六在娘家大食會，星期四在家醃好〝簡易烤金沙骨〞拎去，但佢地話有點鹹。

咁我下次再整就將食譜改動一下，又係星期四醃，星期六食，大家都讚！仲冇話鹹。

上次冇影相，今日又開大食會再整，順便影相。

今次在家附近新街市買左條黑毛豬金沙骨，凍肉檔幫我切條。

表姐勁讚！

烤金沙骨

醃汁材料：

金沙骨                     872克

海鮮醬                     40克

味醂                         40克

醬油 (生抽)             50克

老抽                         6克

糖                             10克

胡椒粉                     少許

麻油                         少許

氣炸做法：

1.          金沙骨洗淨抺乾水份，醃汁材料拌勻後，再均勻淋在排骨上。

2.          中途反轉1-2次，令金沙骨入味均勻。

3.          醃3小時以上或至入味。

4.          用200度，氣炸10分鐘。

5.          反轉200度，氣炸5分鐘。

6.          金沙骨2邊搽蜜糖。

7.          用200度，氣炸1分鐘，即成。

貼士：

l   時間要視乎骨的厚度而定，食譜只是參考。