京阪神 Day1@2015

上次去旅行已經係2012年3月去北京，之後就計劃要小孩，所以之後冇去旅行。計劃終於成功，係2014年我的小王子出世了，等佢大啲先去旅行。

終於等到小王子過了1歲，可以計劃去旅行，係小王子1歲4個月就出發去〝大阪〞。有好多人都話咁細你唔怕咩？我從來都唔覺得有咩問題，去邊到都會帶埋小王子去。幸好我是母乳媽媽，所以不用帶太多野，一巾走天涯。

上次住難波果邊，今次住南船埸‧堀江果邊，行過對面就係心齋橋，好期待第一次一家三口旅行。

****************************************************************************

今日阿仔上機冇耐已經瞓左，落機前十幾分鐘就起身，回程都係咁就好喇！

到達關西機場4點幾，係機場買關西pass又去整免費Wi-Fi攪左差不多成個鐘，比預期遲去到酒店，所以行程不多。

由機場去難波有2種，我2次都係用第一個，因為時間相差不遠，但價錢就差得遠。

關西機場2/F→天橋→車站南海電鐵空港線 (空港急行)

1) 南海電鐵車海線 (空港線~空港急行)(￥890，約45分鐘)：難波至機場約48分鐘，關西國際機場→

    クんくうタウン(Rinku Town)→泉佐野→貝塚→岸和田→春木→泉大津→羽衣→堺→天下茶屋→新今宮→難波(なんば站)

2) 南海電鐵特快rapi:t(ラピートβ)：(35-40分鐘)￥1430

Day 1 ：酒店→Luke's Lobster→大丸百貨→はリ重→藥妝(心齋橋)→酒店

我好鍾意食龍蝦，係心齋橋新開〝Luke's Lobster〞緊係要去試下喇

Luke's Lobster

營業時間：1100 - 2100

地址：大阪市中央區心齋橋筋1-3-21 1F (大丸行前一個街口對面)

好味

我又係麵包控，跟住再去大丸買包食，再幫同事買野。

同事介紹我去〝はリ重〞食咖哩，佢話平又好食，點知去到有2個門口，我求其入左一個，入到去得西餐既，入左咯都要食架！咁就食左餐好豪既晚餐，2個牛扒餐，已食左千幾蚊，雖然貴，但又真係幾好味。間野一個門口係大街，另一個係側邊入，我就份左側邊門口，回到港同事話大街先啱，下次要再試。

はリ重

營業時間：1130 - 2230 (LO.2115)

地址：大阪市中央區道頓堀1-9-17

前菜

老公

我的

去日本緊係要去藥庄喇！是常識吧~

因為退稅關係全部封好唔準開，記得以前都唔駛咁既。

綠茶慕絲蛋糕@輕黏士裝飾

今日整左個〝綠茶慕絲蛋糕〞為小王子明天生日派對作準備，因為佢就快一歲生日喇！

蛋糕上的公仔係我用輕黏土整的。

生日會派對@1歲

過幾日就係小王子1歲生日，今日我就同佢攪左個生日會。

我專登book個場有波波池和滑梯，等小朋友玩得開心，

又預備左每人一份小禮物，大人小朋友都有份。

尋日已經在家準備野食，今日到場又繼續整，所以叫朋友幫手打cream。

尋日整既cupcake，再將cream唧上去

我一個人唔夠時間，所以朋友都有幫手才完成。

小王子一來就玩呢個。 

小王子開始食蛋糕喇！ 

小王子玩得好開心。 

綠茶慕絲蛋糕@龍貓裝飾

老公鍾意龍貓套電影，由其是龍貓巴士。

我一直都想整個龍貓巴士既蛋糕，但真係好難，所以諗住請假去學整，但最終請唔到。

這個蛋糕我只是做左蛋糕部分，而糖皮公仔係由同事代勞的。

我一放工就去同事的工作室整蛋糕，同事就好努力幫我整糖皮公仔。

整得好靚，老公收到都好開心。

韓國菜@ilovekitchen

我鍾意食韓國野，但老公就麻麻，平時去韓國餐廳有Kimchi做前菜，見到我就會雙眼發光，而且每次都必會叫炒粉絲，但好多時份量都唔多，食到唔夠喉，仲有而家好hit既韓式炸雞，鍾意食煎炸野的我啱晒我心意。

見到有得學呢3樣野，緊係又組隊去學喇！

炸雞就Miss示範，回去自己跟食譜做。

炸完煮汁，再加炸雞撈埋就完成。

Miss既炸雞和韓式炒粉絲，2樣野都好食。 

然後到我地自己炒粉絲。

Kimchi都係我地自己整，教呢個係快速版，所以一星期內要食晒。

迪士尼@2015

今日係我與老公拍拖15週年，亦係小王子6個月大。

咁啱肥阿哥一家買口和佢朋友一家三口預備去迪士尼，所以我地就約埋一齊去。

開開心心玩左一日，大家仲join埋year pass添！當然係最平果隻喇！

小王子的誕生

自小就決家定要生一個小朋友、順產和餵母乳，

決定生小朋友時去睇婦科醫生，醫生話我身體有問題，所以婦科醫生話我有既機會係〝0〞。

我仍然每個月都會去婦科醫生check個身體情況，每星期又會去睇中醫調理身體，所以小王子係得來不易，但我都唔會寵壞佢。

花左我3、4年時間都係冇消息，最後連婦科醫生話可以做既都做晒，

再幫唔到我，係我絕望既時間出現曙光，有左小王子。

我陀住小王子好舒服，佢都冇乜點郁，又冇踢我，老公話我肥得滯，所以feel唔到喎！

食得又瞓得，到我臨生都係仰睡，仲可以自己剪腳甲和綁鞋帶，

都有人以為我孖胎，因為個肚都大。

不過，陀住第3個月有晚半夜去唔到VV，到天光就去急症，分流完即刻入去插尿袋，

跟住安排上病房，醫生話由於我子宮向後屈，加上小王子壓住，

會有咁既情況，等BB大啲就唔會咁。

住左幾日出院，返到屋企瞓左個晏覺起身又去唔到，又入急症再入院。

今次又住左幾日出院，醫生唔想我聖誕節係醫院度過，

要我係尿袋和自己放VV揀，我揀左自己放VV，護士教識我就可以出院。

小王子係7月1日出世了，原本預產期係月中，點解會早左？係人為的。

話說我去私家醫生到覆診，私家醫生計到小王子出世有9磅幾，

如果順產的話唔夠出要係2邊肩位剪開先可以出來，咁BB就會死，所以寫左封信比我，

下次去政府覆診時比政府醫生睇，改開刀。

到左政府覆診，但政府醫生話佢計到小王子出世冇大size，

佢堅持我係順產，仲約我下次覆診，但當我話如果唔夠位出要剪的話BB會死，

跟住佢就叫我入院做引產，我冇即時入，過左2日先入院。

入到院都唔係做引產，而係催生，等左2日幾用左藥都係開得2度，早上我就被安排落產房，

記得我係自己行落去，因為我都冇陣痛，其他人係被人推落去。

落到產房醫生幫我穿水，再吊催生素，頭1幾鐘都冇反應，跟住慢慢痛，陣痛開始，

到夜晚醫生睇我，都係得2度安排我開刀，可惜傍晚6點幾食左碗粥，要延遲開刀，

醫生係產房打電話幫我安排手術室話我係〝緊急開刀〞。

麻醉師嚟產房問我要全身or半身麻醉？我揀全身，佢話全身要打多支針，

最怕打針的我最後揀半身麻醉。

老公陪我去到手術室門口，入到手術室見到有幾個醫生，

又播緊音樂，我要自己碌過手術床。

麻醉師騙我的，佢幫我係手到打左粒豆，又係要打針，

我估可能全身麻醉風險大，所以先咁樣講。

做半身麻醉時，因為陣痛叫停唔好打住，因為打針唔可以郁，

由尾龍骨打入去時~堅痛，不停同自己講唔痛~唔痛~，我真講左出聲。

成個過程個人都係到震，感覺有人係個肚到摷野。

上到病房個人都仲震，話係會有咁既情況，雖然係零晨，

而且麻醉藥未過，但我都親餵小王子~好似發夢一樣。

蘇格蘭牛油酥餅 (內附食譜)

我和老公都好鍾意食〝蘇格蘭牛油酥餅〞，平時買都貴，所以我就跟〝漫畫廚房〞整。

蘇格蘭牛油酥餅

食譜來自：漫畫廚房

材料：15塊

砂糖 / 糖霜                32克

鹹味牛油                    62克

低筋麵粉                    106克

鹽                                1小撮

做法：

1.          牛油放於大盤內，室溫放軟。

2.          用打蛋器將牛油打至淡黃色企身，備用。

3.          將砂糖均勻混入(2)內。

4.          將麵粉過篩拌入(3)。

5.          用刮棒以切拌的方式將(4)混合成麵糰。

(動作越快越好，也可以用刮棒沿盤邊按壓麵糰。)

6.          用錫紙摺一個約10cm X 10cm的方盤。(錫紙用2層，酥餅厚度約1.5cm)

7.          將(5)壓入盤中。

8.          用叉子在麵糰上剌洞。

9.          放入預熱至170度的焗爐焗約25-30分鐘。

10.      取出和拆開錫紙，趁熱用刀將酥餅切成小塊。如果喜歡酥鬆一點，切開放涼便OK了。

11.      喜歡硬脆的，可把切開的酥餅放回焗盤上，將溫度調低至160度再焗約10分鐘，完成！

貼士：

l   用鹹味牛油也要另外加鹽，可令甜味更突出。

l   份量不多時，用手比用機器攪拌更方便。

皇室糖藝立體蛋糕

今次整皇室糖藝，所以學蛋糕一早預備好，我只須要裝飾。

阿Sir示範左玫瑰花點整，原來好易。

 我的作品

見同學仔果個又幾靚，所以又影下。

開心果小姐(左)、同學仔(右) 

咸肉糉

阿媽2009年專登叫佢同事來家中教我裹，學既時候都覺得裹糉真係好難記個步驟，所以一直都冇整。

糉，我只係鍾意食糯米唔食餡，學既原因係想樣樣都識下咁喇！今次開心果小姐相約我一齊去學，我當然去喇！

開心果小姐去學既原因係，佢阿媽未去世前每年都會裹糉，所以佢學係一個情意結。

今次我地去返上次〝叉燒包‧酥皮蛋撻〞果到學。

阿Sir既糉已經烚好，可以試食。

開心果小姐(左)、我(右)

東京香蕉蛋糕

我好鍾意食〝東京香蕉蛋糕〞，有得學就緊係去喇！有2個陪我去學，邊2個又係果2個喇！但今次冇開心果小姐。

我地3個學〝東京香蕉蛋糕〞，另外，有幾個就學烏冬麵蛋糕，真係好似一碗烏冬麵。

老師示範

跟住自己整，蛋糕都係即場整。

我的作品

我(左)、好同事(中)、熊貓小姐(右)