牛油蛋糕 (內附食譜)

之前都有整過〝扭紋牛油磅蛋糕 Marble Pound Cake 〞評語都唔錯，亦都有整過磅蛋糕，但落少左蛋攪到好硬，自此我就冇再整這款蛋糕。   

前幾日老公話〝你整莎利蛋糕仲好喇！〞，既然老公想食我今日就整喇！這個食譜用料、做法是最簡單，我見有好多食譜都要落白油，但太耐唔得出自何處。在製作過程中將糖、牛油、蛋攪勻後好多粒粒、好肉酸、好擔心，好在加左低筋粉後就好滑滑啫！      

這個〝牛油蛋糕〞整個過程不用半個鐘就完成可以入爐，焗到中途見到它不斷膨漲又擔心會唔會over個錫紙兜呢？      

好在只是over左少少，中間係自然裂開架！有D係會專登係中間cut一下做這個效果，如果想避免裂開可以係焗既時候用小焗杯載水或倒水在焗盤上同焗。   

焗起時好軟熟，但入左雪櫃後就覺得硬，老公話OK，但唔夠甜，我食左一啖入口時甜，然後咀嚼就唔夠甜，但吃完就覺得甜，不過就冇我想像中咁差，切左3件老公都食晒。   

原食譜係用：長17cm x 闊 6.5cm x 高6.5cm的長形蛋糕模焗40分鐘。

牛油蛋糕

材料：(長17cm x 闊 5cm x 高 6.5cm錫紙長形蛋糕模一個)

牛油　　　　　　100g

雞蛋　　　　　　2隻

糖　　　　　　　100g

低筋麵粉　　　　100g

發粉　　　　　　1/3茶匙

雲呢拿油　　　　少許

做法：

1.   焗爐預熱至180℃；先將蛋糕模內抹油，洒上麵粉(分量以外的) ，再將多餘的粉拍出

2.   牛油置室溫中放軟退冰，加砂糖放入大碗中打成軟滑顏色微黃的忌廉狀

3.   雞蛋略為打勻後，慢慢分３次加入(２.)中攪勻，再加入雲呢拿油

4.   麵粉、發粉一同篩好，加入(３.)中完全混合

5.   將(４.)倒入蛋糕模中，以180℃焗45分鐘，出爐後放涼即成

註：

※  如果第一次做這個蛋糕而又信心不大，試用分蛋法。～只要將蛋黃、蛋白分開，將蛋黃加入已打好的牛油中，蛋白另外打至企身，在加麵粉之後輕輕拌入，再倒入模中焗。祝你成功！

※  加麵粉時最好用長柄膠刮刀或者木勺，手動打蛋器不適合。

※  如果用小型焗爐，當蛋糕入爐身大約１５分鐘後，蛋糕面上加錫紙，防止蛋糕燒焦。