今晚我整左〝薯仔蛋沙律〞，早在2、3年前睇有線阿蘇教整沙律，有次朋友聚會我都有跟佢整，但冇跟足，朋友都話好味。
前幾日又係〝蘇Good〞睇到教整沙律，今次又係冇跟足。
我冇用〝蛋黃醬〞，因為本身有蛋黃，咁又可以慳返D，蛋黃醬都唔平架！
其實，材料和調味都係隨個人喜好，最緊要係試味。
薯仔蛋沙律
材料：(2-3人份量)
蛋 4隻
薯仔 (小) 2個 (約363克)
洋蔥 11克
沙律醬 適量
煉奶 適量
鹽 少許
做法：
1.
洋蔥切成微粒。
2.
蛋烚熟，去殼切粒。
3.
薯仔削皮烚熟和腍，切粒。
4. 將薯仔和蛋粒放入大碗內，加入沙律醬、鹽、煉奶，試味，便成。
小貼士：口味隨個人喜好調教。
我以前有排O.T.做到好夜，最早都9點幾先返到屋企，咁夜都唔知食乜？
我就會整呢個薯蓉做晚餐，我仲會預埋肥細老一份架！
以前自己瘦就會用好多植物牛油，因為令薯蓉滑D，但而家就盡量少。
烚2個焗薯，再加煙肉、粟米粒、磨菇、吞拿魚沙律，係咪好豐富呢？所以肥細老話被我谷肥左。
老公又唔食粟米粒，又唔想買咁多料，買得多份量自然又多，所以都簡單D好D。
其實，呢款薯蓉係以前摯友整比我吃，之後自己再加加減減，而家從不入廚房既肥細老有時都會整比娣婦吃架！
等阿B遲D大個傳比佢先，一個傳一個，可以代代相傳丫嘛！
我鍾意整D薯蓉有D酸和鹹，食既時候仲要有D微暖，我覺得咁先好食。
吞拿煙肉薯蓉
材料：(4-6人份量)
焗薯 (細) 3個
吞拿魚 (水浸) 1罐
煙肉 3條
洋蔥 (細) 1/4個
植物牛油 適量
椒鹽 適量 (亦都可用〝准鹽〞)
沙律醬 適量
胡椒粉 適量
黑胡椒碎 適量
做法：
1.
洋蔥切粒。
2.
吞拿魚隔去水份，用沙律醬撈勻。
3.
煙肉切細長形，白鑊略炒煙肉，備用。(想將油份減少，烚都可以)
4.
焗薯烚熟和腍，去皮用匙稍微整爛。
5.
趁熱加入植物牛油，邊撈邊壓爛。
6.
加入椒鹽、胡椒粉、黑胡椒碎撈勻，試味。
7.
再加入吞拿魚沙律和煙肉，試味。
8. 將少少煙肉放面作為裝飾，便可。
小貼士：
l 用植物牛油可以令到薯蓉滑D。
我一直都想用戚風模整蛋糕，但係上次整〝天使豆腐戚風蛋糕〞失敗左，又覺得個模好麻煩，所以都唔敢再試，但係近日又見到好多blog友整，所以今次我就的起心整。
尋日朝已想整，但又趕住回去湊阿B，所以我尋晚漏夜整，好在呢個蛋糕做法好簡單，不用半小時已完成。
今次空前絕後咁成功，尋晚我冇試味，因為夜咁肥，今朝我先試味，但都係試左少少，仲係好軟，好似雪芳蛋糕咁，又唔太甜好味。
金香蜂蜜小雪紡
食譜來自：自家製曲奇小蛋糕~Home-make Cookies &
Petit Cakes
材料：(份量約1個5吋雪紡模)
蛋黃 2隻
蜜糖 10克
橄欖油 10克
水 10克
低筋麵粉 40克
泡打粉 2克
蛋白 2隻
砂糖 20克
做法：
1.
先以180度預熱焗爐。
2.
將10克蜜糖加入蛋黃以手動打蛋器攪拌均勻，再倒入水及橄欖油攪勻。
3.
將已篩過的麵粉及泡打粉加入蛋黃糊內攪勻備用。
4.
將蛋白打至起泡後將20克砂糖分次加入繼續打至挺身，用膠刮刀分出1/3蛋白糊放入蛋黃糊內以膠刮刀快手拌勻，麵糊倒入紙模內後，輕將模具在桌上拍數下，盡量減少麵糊內的空氣。
5.
以180度焗約20分鐘取出倒扣放涼便成。
小貼士：
l 這是用較大的紙製雪紡模具，為免蛋糕會收縮下陷，出爐後必需立即倒扣在放涼架上至完全放涼。
今日真係好得閒，今早被鄰居吵醒後，就執屋，整東攪西，都只不過係12點幾，跟住又睇下電視，真係無聊，坐下坐下記起上星期開左盒奶仲有2/3盒。
我唔想嘥，隻眼又冇乜事，所以又攪下書，我用以下食譜，整左3倍份量。我而家拎回娘家，今次阿婆可以有排吃喇！
海綿小蛋糕
食譜來自：自家製曲奇小蛋糕~Home-made Cookies & Petit Cakes
材料：(份量約20-25個)
全蛋 2隻
砂糖 50克
低筋麵粉 70克
橄欖油 10克
牛奶 30克
做法：
1.
先以180度預熱焗爐。
2.
先將蛋及糖用電動打蛋器打至結身後加入牛奶用膠刮刀拌勻。
3.
將已篩過的麵粉加入蛋糊內快手拌勻。
4.
將橄欖油倒入輕手拌勻。
5.
用小匙逐少倒入小紙杯內約9乘滿。
6. 以180度焗約20分鐘便成。
小貼士：
l 可用一些鋼撻模或矽膠模盛著小紙杯入焗爐，焗出來的成品外型不會變形。
這個蛋糕我係送比今日正日生日的娣婦，所以未試味，一切留待今晚吃飯回來揭曉。 我已經想挑戰〝忌廉蛋糕〞好耐，之前買左蛋糕轉盤和刎刀，而家萬事俱備，碰巧今日家中做冬，而且係娣婦生日正日，所以我就整左個〝鮮忌廉蛋糕〞，等大家做我既白老鼠喇！
我估唔到第一個既〝鮮忌廉蛋糕〞，大家都話個蛋糕好味。人人都話好味，但肥仔話cream唔夠甜，不過，我地就覺得夠，阿B仲食唔停添啵！我聽到都好開心。
我要改善既地方就係刎D cream方面，仲要下功夫，而且我又忘記刎完一下要抺下張刀，成日都唔帶腦，然後打忌廉唔夠挺，所以有D溶溶地咁，真係唔夠經驗。
老公初時見到都唔多敢吃，因為佢見到個蛋D cream刎得好肉酸，佢形容係好似好渣既裝修佬咁！我聽到都覺得好笑。
鮮忌廉蛋糕
食譜來自：專業糕點製作
海棉蛋糕材料：(1個6吋〝15cm〞~全蛋打法)
蛋 2隻
砂糖 40克
麵粉 (過篩) 40克
牛油 (溶) 15克
海棉蛋糕做法：
1.
蛋及砂糖隔熱水，用電動打蛋器快速打發。
2.
打至泡沫幼密有黏性，蛋漿流下時留有痕跡。
3.
(A) 慢慢加入麵粉，用手動打蛋器拌勻，至無粉粒，再慢慢流入牛油液拌勻。
(B) 或蛋漿打起，用橡皮刮刀拌勻，至無粉粒，再慢慢流入牛油液拌勻。
4.
注入蛋糕圈內。
5.
放入預熱180度的焗爐內，焗約20-25分鐘。
6.
可用竹籤測試蛋糕是否熟透，如竹韱只黏上蛋糕碎發蛋糕邊布稍微縮小，即表示熟。
7. 將蛋糕取出，立即倒置在網架上，冷卻。
鮮忌廉材料：
淡忌廉 300克
糖霜 25克
魚膠片 2克
鮮什果 適量 (我用罐頭什果)
鮮忌廉做法：
1.
魚膠片用冰水浸軟，座溶備用。
2.
淡忌廉加入糖霜。
3.
打發至七分起，加入魚膠液。
4.
邊加邊拌。
5. 拌勻，置雪櫃備用。
鮮忌廉小貼士：
l 淡忌廉要夠凍，否則很難打起。
l 淡忌廉不能打發得過度，否則脂肪會被破壞至分離，不能再打起。
海棉蛋糕+鮮忌廉做法：
1.
海綿蛋糕冷卻後，橫切成三等份。
2.
取一片蛋糕放在轉盤上，加上鮮忌廉。
3.
薄薄一層刎滿蛋糕，再平均放上鮮什果。
4.
在什果面再加上鮮忌廉，刎平。
5.
放上第二片蛋糕，重複(3，4)動作。
6.
放上第三片蛋糕。
7.
再加一些鮮忌廉，刎平。
8.
刎蛋糕側面，刎刀與蛋糕成直角，用鮮忌廉填滿空隙。
9.
邊刎邊轉動轉盤，需要時添加一些鮮忌廉。
10. 刎刀刮乾淨，與蛋糕成直角，輕輕貼住，轉動轉盤一圈，至側面平滑。
11. 刎刀刮乾淨，與蛋糕成水平，微微斜向內，由外向內刎，至表面平滑。(每刎一下都需要把刎刀刮乾淨)
12. 唧上忌廉花裝飾。
海棉蛋糕+鮮忌廉小貼士：
l 每次放上蛋糕片時要上下對齊。
今日焗呢個〝海棉蛋糕〞時好香，出爐後又聞到好香既蛋味，總之就香喇！但係就冇試食，因為呢個係用來整〝鮮忌廉蛋糕〞架！因為今日係娣婦生日嘛！所以就整個蛋糕賀一賀佢。
我怕個〝海棉蛋糕〞會縮或榻，出爐後就倒扣放涼，所以表面就有一橫橫。
海棉蛋糕~香噴噴
食譜來自：專業糕點製作
材料：(1個6吋〝15cm〞~全蛋打法)
蛋 2隻
砂糖 40克
麵粉 (過篩) 40克
牛油 (溶) 15克
海棉蛋糕做法：
1.
蛋及砂糖隔熱水，用快速打發。
2.
打至泡沫幼密有黏性，蛋漿流下時留有痕跡。
3.
(A) 慢慢加入麵粉，用打蛋器拌勻，至無粉粒，再慢慢流入牛油液拌勻。
(B) 或蛋漿打起，用橡皮刮刀拌勻，至無粉粒，再慢慢流入牛油液拌勻。
4.
注入蛋糕圈內。
5.
放入預熱180度的焗爐內，焗約20-25分鐘。
6.
可用竹籤測試蛋糕是否熟透，如竹韱只黏上蛋糕碎發蛋糕邊布稍微縮小，即表示熟。
7. 將蛋糕取出，立即倒置在網架上，冷卻。
