濃番茄牛肉薯仔湯 (內附食譜)

老公見疫情都持續左好耐，放假都冇出街，今日天氣唔錯，就提議去家附近行下山。

可惜小王子情願在家中打機，咁又係打機要放假就可以打，放假意思係紅日和星期六。

咁唯有我出手潤下佢地喇！見好耐冇煲湯，就滾個我和老公都好鍾意既番茄牛肉薯仔湯。

用牛肉和洋蔥去煲呢個湯，係好耐之前睇肥媽教，仲話好有營養。

晏晝問小王子晚餐想食咩？佢話食通粉，咁就啱喇！可以利用呢個湯。

煲好湯，將一些湯倒入另一個煲內再煲滾，然後放2包怏熟通粉，咁就攪掂一餐。

小王子話好味，仲食左2碗通粉，老公話個湯濃得滯，我和小王子都話唔濃~好味。

我見牛肉個樣滾完好鞋咁，但老公話唔鞋啵！所以你去牛肉檔同牛佬講：牛肉用來滾湯，會食番，就可以架喇！

濃番茄牛肉薯仔湯

材料：

薯仔                  225克

番茄                  552克

洋蔥                  326克

牛肉                  96克

水                       1500毫升

調味料：

鹽                       適量

做法：

1.       薯仔去皮，滾刀切件。

2.       番茄去蒂切件。

3.       洋蔥去皮切件。

4.       牛肉洗淨。

5.       水滾加入材料，牛肉除外，待再滾加入牛肉。

6.       中小火煲30分鐘，加鹽調味，即成。