海鹽起司奶蓋戚風蛋糕 (內附食譜)

今年小王子生日要求依貝蛋糕，我已構思好，諗住挑戰3D立體蛋糕，而且仲訂左個蛋糕盒和插牌，可是因疫情，所以學校取消左全部生日會，我諗住可以取消挑戰，點知！小王子都係要依貝生日蛋糕，我唯有出矛招，買左2隻依貝積木砌，放在蛋糕做擺設。

大的依貝我用左半日時間砌，起初我砌個底3層，老公就幫手砌之後3層，但實際佢係砌左2層半，因為砌錯半層攪到我之後果一層砌極都唔啱，拆左再砌，砌到手指頭又紅又痛，小的好快就攪掂超Easy，所以砌積木都不是男孩的專利。

之前表姐推介佢朋友跟Youtube片整既海鹽蛋糕，我尋日就焗好蛋糕，今朝就加個海鹽起司係面，發生小插曲，係蛋糕內唧海鹽起司發現會流出來，弊！原來我篤穿左個蛋糕，立即用蛋糕補返個窿，真驚險。

今朝就焗條卷蛋放旁邊，係之前整過的〝士多啤梨瑞士卷〞，而個餡就係跟朱Sir的。原意係卷蛋表面晝隻伊貝，但個圖細走樣了，好在有伊貝砌木。

我怕個海鹽起司會溶，所以今日call車返娘家，今晚就一齊切蛋糕。

家人都讚海鹽起司蛋糕好食，連平時唔食蛋糕既肥阿哥都食，而肥細老就讚卷蛋個餡好味，總之個個都滿意喇！

海鹽起司奶蓋戚風蛋糕

食譜來自：https://www.youtube.com/watch?v=dJjnwEhXYpg&feature=youtu.be

戚風蛋糕材料：6吋蛋糕模

雞蛋黃                        3個  

鮮奶                            35克

植物油                        30克

低筋麵粉 (過篩)         55克

雞蛋白                        3個

砂糖                            55克

海鹽起司奶蓋材料：

淡忌廉                        220克

鮮奶                            80克

忌廉芝士                    50克

煉奶                            50克

海鹽                            3/4茶匙

裝飾：

杏仁片                        適量

做法：

1.      植物油、鮮奶攪勻，加入蛋黃攪勻，再加入低筋麵粉攪勻。

2.      蛋白慢慢加入砂糖打至濕性發泡，呈小灣勾。

3.      將1/3蛋白霜加入蛋黃糊內，切拌均勻。

4.      將蛋黃糊倒入蛋白霜中，將兩者混合。(盡量保留麵糊內的空氣，拌均勻就好了)

5.      將麵糊倒內蛋糕模內，麵糊抺平，櫈幾下入爐。

6.      150度，焗35分鐘。

7.      出爐後櫈一下，連蛋糕模倒扣放涼，脫模。

8.      杏仁片，120度，焗5分鐘。

9.      忌廉芝士、煉奶攪拌至順滑。

10.  加入海鹽、鮮奶、淡忌廉，打至6分發，倒入唧袋冷藏一小時。

11.  用踞齒刀從蛋糕在蛋糕表面切入，然後在蛋糕裡面切一個圈。

12.  在圈內擠入奶油，餘下的擠在蛋糕表面。

13.  用橡皮杓在蛋糕表面舖平推近邊緣，使奶油有滴漏的效果。

14.  撒上杏仁片就完成。

貼士：

·         以切拌的方式攪拌麵糊不會那麼容易消泡。