森永鬆餅 (內附食譜)

 之前買左森永鬆餅整〝Pancake@Morinaga森永〞，一盒有2包粉，只用了一包。

今晚就用埋另一包整鬆餅，食譜盒上有寫，順手試埋之前淘回來的烘焙烙印。

我整左4杯，整完先發現到原來有寫蛋糕杯size。

烙印第一次印唔到，再燒，點知痴晒蛋糕~燶左，好難洗想連個烙印都掉左佢。

後來唔憤氣用牙擦洗，最後都成功左。

森永鬆餅整蛋糕或Pancake都不好吃，但蛋糕會好一點。

森永鬆餅

材料：直徑6CM蛋糕杯~6-7個

森永鬆餅粉                    1袋 (150克)

蛋 (中型)                        1個

牛奶                                110毫升

砂糖                                50克

牛油 (溶液)                    50克

做法：

1.          碗中加入蛋、牛奶、砂糖攪拌均勻。

2.          加入森永鬆餅粉攪拌均勻。

3.          加入融化的牛油，攪拌。

4.          麵糊倒入蛋糕杯內。

5.          用180度，焗20-25分鐘。

韓式炆牛仔骨 (內附食譜)

 臨近中秋節，公司有人送了韓國水晶梨來，一見到就決定拿來煮牛仔骨，因為冰箱有存貨。

我上網睇左好多食譜，用的材料都係差不多，今日放工去買材料，回家炆定明晚吃。

我接左小王子一齊去街市，買齊材料回家去。

我問小王子今晚想吃什麼，等老公放工回家時買回來吃。

小王子居然話想我煮飯，但冇餸啵！

不過，我而家炆牛仔骨明天吃，小王子二話不說就話食牛仔骨。

老公話好甜，我冇落糖，只刨左1/3個韓國梨，甜味係來自個梨。

韓式炆牛仔骨

材料：

牛仔骨                                             315克 (2條)

洋蔥 (去皮)                                    160克

紅蘿蔔 (去皮)                               280克

韓國風水梨 (連皮)                     145克

史雲新清雞湯                              300毫升

燒烤牛肉醃汁                              3湯匙

 

做法：

1.       牛仔骨洗淨、瀝去水份，切件。

2.       洋蔥去皮，切條。(粗幼隨個人喜好，但太幼炆完會不見了)

3.       紅蘿蔔去皮，滾刀切。(當晚食的話切細件啲)

4.       韓國風水梨連皮刨絲。

5.       燒熱鍋下油，炒洋蔥至微啡，盛起。

6.       下油，煎牛仔骨至2面微焦。

7.       落洋蔥、紅蘿蔔、燒烤牛肉醃汁，炒勻。

8.       加史雲新清雞湯、韓國風水梨絲，炒勻。

9.       最小火炆30分鐘，轉中火炆至收汁。(收汁隨個人喜好，要杰啲就炆耐啲)

蜂蜜雙重芝士蛋糕 Honey Double Cheese Cake (內附食譜)

我一見到呢個蛋糕就想整，因為好靚，厄Like最好，因為個蛋糕面好得意。

今日除左整〝簡單瑞士卷 Easy swiss roll cake 〞，仲有蜂蜜雙重芝士蛋糕 Honey Double Cheese Cake，可惜個蛋糕面失敗左，唯有刮平再加蜜糖。

大家吃完飯太飽，不過，肥細老和阿B都有幫襯下。

我一打開，蛋糕表面變左色，仲有好多細紋，我估係蜜糕造成的。

如果整呢個蛋糕，食前先落蜜糖。

肥細老就唔係佢杯茶，佢喜歡的芝士蛋糕係漿口的。

阿B食左一件就唔食，佢只食芝士蛋糕，平時我整果啲佢食完一件又一件。

我覺得味道都OK既，我見網上啲人整個面都成功，不過，唔再試，因家人不太喜歡。

後記：

過左2日問娣婦，佢話表面果層麻麻地，餅底和下面果層OK。

蜂蜜雙重芝士蛋糕 Honey Double Cheese Cake

 食譜來自：https://www.youtube.com/watch?v=li7RB_x0EeA

撻皮材料：6吋蛋糕模

低筋麵粉 (過篩)      130克

杏仁粉 (過篩)          20克

細砂糖                     15克

無鹽牛油                 60克

全蛋液                     20克

撻皮做法：

1.          6吋蛋糕模內墊一張圓形烘焙紙。

2.          低麵粉、杏仁粉、糖、蛋、無鹽牛油，用橡皮杓稍為撈勻。

3.          用手揑成糰，然後用棍擀開。

4.          將撻皮放蛋糕模內，再修整一下。(撻皮比蛋糕模矮；雪普通格就可以)

5.          放入雪櫃30分鐘後，用叉在撻模內吉窿。

6.          用160度，焗20分鐘。

 重芝士層材料：

忌廉芝士                 150g

淡忌廉                     25g

砂糖                         15g

全蛋液                     30g

低筋麵粉 (過篩)      8g

重芝士層做法：

1.           忌廉芝士加砂糖，用手動打蛋器攪至順滑。

2.           加入蛋液、淡忌廉，用手動打蛋器攪至順滑；加入低筋麵粉，用手動打蛋器攪勻。

3.           忌廉芝士醬過篩，倒入撻模內。

4.           用160度，焗30分鐘；放涼後，放入雪櫃冷藏一小時以上。

 凍芝士層材料：

忌廉芝士                 100g

淡忌廉                     60g

砂糖                         15g

鮮奶                         20g

魚膠粉/片                3g

雲呢拿香油             少許

凍芝士層做法：

1.           魚膠粉加奶煮溶，備用。

2.           雲呢拿香油、忌廉芝士、砂糖，用手動打蛋器攪至順滑。

3.           淡忌廉打至稍為濃稠，不用打發。(打約2分鐘)

4.           淡忌廉倒入忌廉芝士糊內攪勻，加入牛奶魚膠粉液，攪勻。

5.           倒入撻模內，將表面整平。

6.           泡沬紙剪成6吋圓形，舖在撻模上，用手輕輕按壓，入雪櫃冷藏3小時以上。

7.          脫模，撕去泡沬紙，淋上蜜糖。

柳氏家鐵板雞專門店

前年肥阿哥托人買2個書包比大細孖用，但買左2個不同Size，所以送左比小王子。

今年小王子升小一就不用買書包，但肥阿哥係我Facebook見到小王子孭個書包好似唔多啱。

今日肥阿哥話去荃灣吉之島送個新書包比小王子，買書包前去醫肚先。

我地係荃灣廣場揀左食韓國野，食炒雞放題。

食完買埋書包就要回娘家缺煮持，因為今日做節。

我覺得唔錯，但小朋友就貴左啲，下次都可以再幫襯。

我地分左3張枱，每2個大人一張，3個小朋友一張枱。

肥阿哥和阿嫂叫左芝士，但佢地整極都唔係好凝固，下次可以唔叫。

柳氏家鐵板雞專門店

地址：荃灣大壩街4-30號荃灣廣場3樓350-352號舖

電話：2810 0608

營業時間：1130 - 2300 (星期一至日)

我地揀左$138，可以食埋燒肉。

小朋友見到有野飲又有雪糕超開心。

都好多肉類選擇

食剩野食要付費，我地有食剩好少好少，但就冇收費。

蜜糖味噌炒雞

有個牌教你點炒

仲跟一個麵，食完炒雞，再炒個麵，有時職員會幫你炒。

起初用電話計時，後來發現有個沙漏，但我始終覺得目測好好多。

柳氏辣炒雞，掛住食，食剩少少先記得影相。

春卷 (內附食譜)

 每次大食會問家人想食咩，佢地都會話〝春卷〞，咁又真係幾好食既。

阿婆還在的時候，佢唔食熱氣野都會食1-2條架！

以前有阿婆幫我切絲，佢刀功好好，而家就要靠自己了。

我發現整左咁多年都冇寫過食譜，今次就寫一次喇！

我叫阿媽唔好預咁多料，因為叫阿媽備料，所以冬菇、木耳早就浸好，我來到先磅。

每次料多包好大條，大家好快食滯，每次剩3-4條，又要搵人清。

每次都係用一包春卷皮，今次包細條可以清晒~冇剩。

以前個餡會有茨汁，但發覺會局部整淋個皮，後來冇茨汁煮乾身啲，問題解決了。

春卷

材料：

春卷皮                                       1包

豬肉碎                                       216克

甘筍                                           88克

芽菜                                            200克

木耳 (已浸)                            50克

冬菇 (已浸、去蒂)             101克

蛋 (封口用)                            1隻

醃豬肉：

豉油                                            1/2湯匙

糖                                                 1/2湯匙

茨汁：

蠔油                                            1 1/2湯匙

糖                                                 1/2湯匙

做法：

1.       豬肉用醃料醃15分鐘以上。

2.       甘筍、木耳、冬菇，全部切絲。

3.       用1湯匙水炒甘筍，炒至微軟，盛起。

4.       用1湯匙水炒芽菜，炒至微軟，盛起。

5.       落油炒香冬菇，盛起。

6.       落油略炒木耳，盛起。

7.       落油炒熟豬肉，將其他材料一同回鑊炒勻。

8.       加入茨汁炒勻，放涼。

9.       將適量餡料放在春卷皮上，然後包好，用蛋液封口。 (包法可參考包裝袋)

10.   滾油炸春卷，盛起。

11.   然後再炸多次，即成。

貼士：

·         盡量餡料不要有水，會使春卷炸完會淋。

·         炸物要炸2次才好吃。

·         餡料太多好易膩，不宜包太多。

·         封口用不完一隻蛋，可以留起煎來吃。