蛋卷 (內附食譜)

我係Facebook的群組中見到蛋卷食譜，食譜係要用平底鑊煎完再用焗爐焗，我有個蛋卷模就不用咁麻煩了。

食譜鮮奶份量係自己睇粉漿情況而加多少，咁我自己唯有看着辦。

起初卷唔起，又加鮮奶，顏色又唔得，到差不多尾聲先掌握到一點。

小王子和老公不論卷到或卷唔到、顏色唔得都食晒，小王子食得最多。

老公覺得唔夠甜，小王子話夠，不過甜啲都可以，而我就覺得唔夠牛油味。

今日有了尋日的經驗，我將食譜改左，問題一一解決了，但唯一的是在掌握火喉差啲。

蛋卷有深淺色，但都一樣好味，小王子和老公都喜歡。

我都係覺得牛油味唔夠，老公話好足夠了。

有機會我再改良一下，同埋我要研究下椰子味，因為老公喜歡椰子味。 

另外，蛋和奶都係剛係雪櫃拎出來，因為我個人話做就要做，所以沒有室溫。

蛋卷

材料：

牛油溶液                      30克

低筋麵粉 (過篩)         50克

糖                                  40克

雞蛋                              1隻（52克）

鮮奶                              30克

油 (掃模具)                 適量

做法：

1.          牛油溶液、糖、雞蛋打勻。

2.          加入低筋麵粉混合至沒有粉粒。

3.          加入鮮奶撈勻。(麵糊狀態好像練奶質感)

4.          蛋卷模掃油。(只要掃油一次便可)

5.          蛋卷模每邊中火燒30秒。

6.          收中小火，用半湯匙的麵糊加入蛋卷模，每邊燒6秒。

l   每個爐火都不同，自己要睇實際情況調教時間和火力。

7.          用鐵棍卷起，收尾時輕壓2秒定型，放涼，即成。

l   卷既時候怕燶就關最少火，卷完就教返中小火。

l   不要離開將麵皮提起，直接在模具上卷。

l   提起麵皮接觸到冷空氣就硬了、卷不了。