自家製香港經典小食鮮奶蛋撻 (曲奇餅皮） (內附食譜)

我分開左2日整蛋撻，不過，我冇花奶整撻皮，改左用鮮奶。

星期六，將撻皮整落撻模內一齊擺普通果層雪櫃，蛋漿就尋日整。

我上網搵資料蛋撻皮都可以放雪櫃冰格，可以存放一個月。

撻皮係雪櫃取出回溫就可以焗，我焗左6個，而蛋漿整食譜一半份量，蛋漿有剩少少放雪櫃。

我跟食譜整左19個撻，我用左2款撻模，一款蛋撻模，而另一款是葡撻模。

今早又焗多2隻送比老爺，撻皮係雪櫃隨時可以有蛋撻食。

尋日+今日用半份蛋漿整到8個蛋撻，因為我蛋撻模是7.5cm,而葡撻模都是7cm。

老公對此蛋撻滿意，不過，佢話皮薄左啲，蛋漿甜左啲。

我就覺得奶味太重，反而老公鍾意，因為我唔飲奶的。

製作過程：

• 最尾6分鐘見唔上色，而且蛋漿都唔凝固就轉175度，焗埋佢，焗完都唔熟加多4分鐘，但得一隻可以出爐。
• 轉180度焗左3分鐘出多2隻，4分鐘後都仲有一隻唔熟。
• 轉200度焗多1分鐘就完成，最終要用多9分鐘就將6隻焗熟晒，但不同時都有撻出爐。
• 撻皮可以整落撻模到，每個用保鮮紙分隔，再放入密實盒，然後雪落雪櫃普通格，隨時加蛋漿就食得，但要放太久2-3日，可之前回溫加蛋漿就可以。
• 今朝再焗2隻用左180度焗18分鐘就攪掂，不過蛋漿有少少脹，即底火勁，企尋日又冇咁，唔知係咪尋日有風吹住個焗爐。

每隻撻我都用張保鮮紙隔住，咁就方便拎出來。

自家製香港經典小食鮮奶蛋撻 (曲奇餅皮）

食譜來自：https://www.youtube.com/watch?v=8qY1XYCn-Ys

蛋撻皮材料：7cm直徑撻模18-19個

無鹽牛油                   160克

糖霜                           44克

三花淡奶                   18克

北海道奶粉               20克

高筋麵粉                   122克

低筋麵粉                   122克

蛋撻皮做法：

1.      無鹽牛油從雪櫃拿出來就可以切粒。

2.      無鹽牛油+糖霜初步混合。

3.      加入三花淡奶混合。

4.      加入北海道奶粉、高筋麵粉、低筋麵粉再混合，初步成糰就可以。

5.      攪拌過度或搓過籠，有筋性後口感就不好吃。

6.      用包鮮紙包住麵糰鬆弛15分鐘。

7.      麵糰分割大約25克一粒，略為搓圓成蛋撻皮。

8.      蛋撻皮撒上少許手粉。

9.      蛋撻皮沾上少少手粉，稍為禁扁。

10.  放在撻模中央，底和邊之間發手，一下禁一下向上捏，直至圍繞一圈。

蛋撻漿材料：

水                               200克

白砂糖                       100克

鮮奶                           180克

雞蛋                           216克 (約4隻大蛋)

蛋撻漿做法：

1.      水+白砂糖用中細火煮溶，不需要滾，糖溶就可以。

2.      砂糖溶至8-9成，熄火。

3.      加入鮮奶攪勻。

4.      雞蛋打散，加入鮮奶混合物要輕手攪拌。

5.      蛋液要過濾，使蛋漿更滑和隔走多餘的泡泡。

6.      將蛋液倒入撻模內約9成滿。

7.      用170度，焗18-20分鐘。

8.      稍為放涼就可以脫模。

貼士：

·         判斷蛋撻熟未，出爐前輕力搖盤，蛋漿仲係朗下朗下狀態表示未熟，再焗多幾分鐘，問題不大。

·         蛋漿脹得好勁，放涼後會榻得好勁，表示焗爐底火比較熱，可以攝個盤來降底火。

·         食譜來高筋麵粉+低筋麵粉出來會偏向脆口一啲。

·         撻皮想鬆化啲，隨個人喜好將高筋麵粉調反轉為低筋麵粉。