今次係去香港迪士尼樂園酒店 Staycation和香港迪士尼樂園玩。
小王子和老公都唔喜歡去迪士尼樂園，點解會陪我去，因為明天係我生日，今次我最大。
我期待左好耐了，心情好興奮。
今次買生日Package，生日送一張入園門票，同行又可以用85折買正價最多3張門票，房又可以Upgarde豪華房，仲有餐dinner送。
晚餐想食Buffet的package已售罄，唯有買中菜的〝晶荷軒〞package。
我地對〝晶荷軒〞比滿分，佢地好細心又貼心~超讚，往下看就知點解。
詳情：香港迪士尼生日優惠
小王子3歲前都間中有去迪士尼樂園，而我地又join左銀卡Year Pass，佢理應對樂園冇咩印象，唔知佢點解唔鍾意去，不過，今次去完佢就愛上了，話明天要再去，你估唔駛錢咩！
我地好早出發，坐港鐵到迪士尼站，再轉酒店Shuttle Bus，10點半前已到酒店了。
我諗住排隊拎房，點知結果同同海洋公園酒店一樣，又係冇得提早check-in 和 late check-out。
職員比左迪士尼門票後，我就隨便影下相，因為我地係酒店住客，所以不用預約入園。
老公就去寄存行李和蛋糕，蛋糕食前打去Room Service送到房就可以了。
我問過職員房的雪櫃能容下嗎？職員話不可，我個4.5吋都唔得，咁真係好細。
酒店內有間Shop，如唔入園或買唔夠都可以入去。
下個月Halloween，產品都要應節了。
我地再坐返Shuttle Bus入園喇！好在有一張係米奇款。
園內有啲機動遊戲、食店和表演項目都沒有開。
由於疫情少左旅客，園內行得好輕鬆，連Fast Pass機都封了，因為排隊玩遊戲不是太耐。
我生日緊係去攞返個襟章，又係呢個款，這個我家中都已有2-3個了，我想要其他款，於是折返。
我：唔該，有冇其他款？
問職員：得呢個款，沒其他了。
我：我家中有另一個款是藍色的，而且記得紅色呢個成十年前都已經係呢個款。
問職員：係丫！我做左十年都係呢個款。
之後大家都係到笑，好在我家中有另一款，真係要好好珍藏了。
城堡整好了，公主係特定時間會係呢到現身的。
明日世界
太空飛碟
自己控制上落，小王子玩得好開心。
幻想世界
小熊維尼歷險之旅
起初小王子都冇咩野，但去到黑黑又行雷落雨果到佢就好驚，因為佢怕黑和嘈。
灰姑娘旋轉木馬
小飛象旋轉世界
今次佢要同爸爸坐，又係自己控制上落，但櫈曬到好熱辣Pat Pat。
小小世界
頭先經過小小世界未開，而家就去橋底休息一陣先，因為差不多開。
藍天白雲，但我地頭頂一點雲也沒有，真係乾煎。
入到去坐船，樣樣野都好吸引小王子，佢有唔明都有問我，我有講解一下。
我係米奇粉絲，路過唔係唔影吖嘛！好似每次經過都影 XD。
皇室宴會廳
夠鐘開餐了，幾乎每次都係來這裡開餐，係有一次係明日世界，果次落雨加上推住BB車。
果到開得2間食店，我地分開左2間買，汽水一杯加大左，我覺得都不用加大，因為都唔係差得好遠。
小王子個兒童餐差不多食晒，飯係米奇型，被佢激死，居然讚個飯好食，蘋果我食左。
我食個燒雞餐，小王子都話好食。
老公就買左全場最多人叫的焗豬扒飯，我覺得唔好食，但係眼見幾乎每枱都有。
餃子另外order，小王子都食左2隻。
食飽就去同米奇影相，問左職員差不多時間，知道佢會係美國小鎮大街的涼亭出現，立即走過去，但又冇指示係邊到排，職員行過問下，佢都話唔知。
老公叫我去Shopping行下，佢係到等，真係貼心喇！
突然見到巡遊，立即走出去睇，我想影米奇，於是拖住小王子好似傻婆咁2邊走，因為我去左佢就行左去右。
終於可以影相了，有貼心老公，我緊係排第一喇！老公話呢2隻不是巡遊果2隻。
我本想抱抱米奇，但要保持社交距離，所以都係隔好遠的。
蟻俠與黃蜂女：擊戰特攻！
我地返去第一站的〝明日世界〞，其實，今早已入過去〝蟻俠與黃蜂女：擊戰特攻！〞預備玩，膽小的小王子聽到音響好大聲立即喊晒要出返去，幾經引導終於肯入去玩了。
小王子一玩就愛上，仲要無限loop，離開玩其他後又要再返轉頭再玩。
史達科技旗艦店精品店：小王子有睇中野，但唔實際，所以冇買。
鐵甲奇俠飛行之旅
我想入去玩架！可借係自從上次係澳門小王子玩過Batman之後，佢對3D和4D都好抗拒，所以我都冇得玩。
探險世界
森林河流之旅
小王子以為真的，同佢講左係假，佢都好驚，小朋友真係天真。
童話園林
小王子發現機關丫！原來係某啲位你整下就有事發生架喇！你地去到又搵係機關係邊和有咩事發生。
反斗奇兵大本營
去到已經截龍了，而家咁影都OK丫！
轉轉彈弓狗
我以為小王子會驚，點知冇，而且仲話要坐多次，唔玩了。
天氣熱，時候都不早，早點玩埋其他早點返酒店。
玩具兵團跳降傘
全日這個排得最耐，畏高的老公都陪我地玩，見佢玩既時候都擰個頭向側，唔望外邊風景。
原本玩左一次就走，但小王子要求再玩多次，老公又肯，咁就玩多次。
迷離大宅
我地行灰熊谷方向離園，但經過〝迷離大宅〞就入去玩下先。
突然小王子去到閘口驚，佢唔玩要走，但我同老公都同佢講唔駛驚，佢上到車有點想喊，我全程攬住佢，係去到冇燈地方和有4D效果時驚。
我都見到在有啲小朋友都用雙手掩住雙耳，因為好嘈。
我請小王子食雪條定驚先。
灰熊山谷
只是路過，等小王子再大啲先至玩呢到既過山車。
返到酒店大堂去Check-in先，職員話房內係2張雙人床，我要求轉房想要一張大床。
職員話係升級左，而且要睇下有冇房，我聽到咁樣就費事麻煩人check，咁爆都未必有房，而且我想睇下豪華房係咩樣。
我地住2樓就是大堂呢層，超方便。
我一開門就見到酒店送的生日禮物了。
房的活動空間不大，而且雪櫃很細，但比想像中大，蛋糕吃不完應該都雪到既，因為我個蛋糕細。
我喜歡酒店房擺左2支1.5L的水，足夠我地飲。
酒店有米奇的用品，真的好靚丫！唔捨得用喔！
房的Key、入場門票，而其中一張係優惠和晶荷軒晚餐，優惠只可以用一次買滿$300有9折。
晶荷軒
我有諗過要唔要打去晶荷軒訂位呢？定係入住當日先約，因為我係住客買左Package，理應有位，不過，佢地主動聯絡我。
職員：當日6點有位，你可以嗎？因為當日有Function
我：吓！咁早？你個Function幾點？樂園19:30關門，我冇理由提早出來食飯。
職員：咁我幫你睇下晏啲有冇位。
職員：(Hold 電話一陣) 8點可以讓到張枱比你。
我：好，唔該你。
這是我地今晚晚餐內容，不過就係2人份量。
老公對蟹敏感的，當佢飲〝紅燒竹笙海皇羹〞突然問我係咪有蟹，我認真再飲，又好似係啵！
我立即問職員，等左好耐話問左大廚係有蟹，收走左個羹話會換過，又等左好耐送上一個素羹，因為由零開始要花點時，2個羹都好味，老公都讚。
食到中途老公敏感發出來，頸紅起粒粒，坐在中間的小王子見到立即彈開。
職員送上〝蠔皇鮑魚炒飯〞時話這碗已走蟹肉，真係細心又貼心。
老公話點解佢個碗冇蔥粒，人地用此來分辨邊碗有蟹肉，因為佢食蔥，而我就唔吃的。
我地都order左個兒童餐比小王子，估唔到粟米班塊真係用班來整，不是平時的龍脷柳。
小王子好鍾意食個飯和個豆沙包，佢又話下次要再食。
全部食物都好好食，如果要比正價就太貴了，但係上菜速度慢，好似食法國餐咁。
食飽就回房，今日不是買左好多野，我滿心歡喜入園購物，但係都冇咩啱心水，以前有個位好多廚房用品，而家得少少咋！而且以前有好靚既零食，又係少之又少，有點失望。
尋晚都夜瞓，因為要切蛋糕，可是老人家的我又係天未光就起床了，我等到有太陽就出露台影相，房外景色真的不錯。
我買Package升級了住豪華房，但室內唔覺豪華，是比別人多個露台，不過，老公話我地果間係4人房。
尋晚食飯等上菜時同小王子過左對面shop睇野，因為上菜真的好慢。
小王子已睇中小叉，但老公唔批。
今朝我係房搵到有Coupon，於是大家梳洗完就去shopping了。
我作最後衝刺，小王子又買到心頭好。
用酒店Wi-fi時會問你要唔要Gift，我選要，然後收到電郵，只要你去消費就送一個Passsport套(右下相)，有幾款比你揀，消費冇指定金額，所以買幾十蚊都可以。
尋日職員比左呢張指南我，今日得一樣野可以帶小王子去玩，玩埋就閃人了。
這裡Check-out都可以去享用設施，但海洋公園就一Check-out就唔可以，所以我唔會再去住了。
我地去落一層去〝童話天地〞，落到去上一場未完下一場又未開，仲有成半個鋰有多先開下一場。
職員話可以轉頭再來排隊，冇地方去我地都照企係到等，之後陸續有人來，好在冇走到， 我地排第一。
我問職員係咪有人講故事，回覆係疫情前就係，我諗而家係自由活動。
每場可入每間房3個人為一組，最多8組，每場45分鐘，要脫鞋和穿襪，我見有家長即場向職員買襪。
我陪小王子玩積木。
跟住到老公陪佢玩機械人。
小王子係都要拎住小叉。
我地去東薈城食Lunch，今次係打邊爐放題，係限時的，等左好耐先有位。
我地3個人有3個湯底，我緊係食左甜品先喇！
我食左2碗仔日式咖哩飯，呢間店有自家製洛神花茶，本來有豆漿，我入座時已經冇晒喇！
食雪條
沒有留言:
發佈留言