阿媽有2個阿哥和一個細老，舅父和舅母們都出晒香港，剩餘表哥、表姐、表弟妹唔肯出，不過有一個表姐為左小朋友讀書都出左香港了。
原本約左人取消左，因為表妹和表弟2家人(細舅父)來港玩，我一盡地主之誼~做導遊，因為次次同阿媽回鄉都得到佢地熱情款待。
我一早寫好行程，安排左去尖沙咀和長洲，長洲食咩都上網搵過同埋問過住長洲既同事。
同我一齊就緊係食，一開始就係食，食到個個都話飽食唔落，係長洲仲有5個地方未食，唯有下次先。
第一站：星座冰室
地址：尖沙咀金巴利道16-20號香檳大廈地庫36號舖
營業時間：0800 - 2130 (星期日休息)
第一次來都未識老公，係一個好朋友帶我來，之後都同老公來過2-3次。
表妹夫話睇電視有介紹過，我話上次你唔叫帶你來，佢話咁耐以為執左。
裡面冇位，唯有坐門口，起初好熱，坐坐又OK，伯伯好好人，但有個後生的就有點寸。
叫左招牌番茄麵，我見啲麵白白地以為唔好食，因我keep磅中，所以冇食，佢地話好食，但貴。
叫左2杯奶茶$17一杯，亦都叫左3支樽細可樂又要$17一支，佢地話貴，我又唔知貴唔貴，我平時唔飲。
番茄魚蛋(左)：老公話魚蛋好腥，所以小王子齋食麵。
番茄雞絲(中)：細舅母。
番茄雞翼(右)：2個表姨甥女。
有關雞既食物全部人食晒野先到，催左幾次話雞絲炒緊，來到雞翼果2碗又未嚟，但我見雞翼似滷水再係咁易煎下，唔知點解呢3碗要咁耐。
有啲人唔食番茄底就叫普通的，另外，表弟婦叫左個牛油多比個仔食，佢以為係西多士，所以個仔唔食，佢唔唗有打包拎走。
海防道橋底11月會拆，本想帶佢地再去食，但老公話又污租又熱，而且佢地又飽，所以取消左。
我帶左佢地去海港城行下，然後坐船去中環再入長洲。
一落船就緊係去甘永泰食大大魚蛋喇！大家都滿意話好食。
甘永泰魚蛋
地址： 長洲新興街106號地下
老公另外買左蝦丸，話只係今日有售，不過蝦丸又真係幾好食。
大粒魚蛋：$10一串有2粒
蝦丸：$30一串有4粒
小王子比上次好，今次食左大半粒。
食食下有飄色睇，不過係小型，阿媽話睇到個小朋友晒到黑晒。
大路向上行就會到〝新照記茶餐廳小食〞，我就一心想食白糖糕，但只得返我唔鍾意食的，佢地又飽，得表弟食左碗牛雜。
新照記茶餐廳小食：
網上推介：懷舊小食、大雞脾
地址：長洲東灣道18號
行過隔離就係〝故鄉俱樂〞，長洲同事太太係原居民，手卷從小吃到大，小王子每次都會，吃。
今次我食左芝士紅豆餅，阿媽和舅母食紅豆餅，但下次食原味就好了，因為唔覺有芝士味。
故鄉俱樂部：紅豆餅
網上推介：紅豆餅
地址：長洲教堂路17號地下
再行前去〝長洲體育館〞有遊戲室免費的，等小朋友可以放電，大人又可以休息下嘆冷氣，不過就有分時段。
放低左老幼，我和老公就帶表妹和表妹夫去沙灘果邊行下，因為佢一家想係長洲住一晚、游水和食下宵夜，但係呢到夜晚冇乜活動，而且租都貴，所以打消念頭。
我地返去接老幼，沿路行出去見到〝艾堡餐廳〞有奧地利啤酒$35一支，青檸味仲買3送1 ，我飲左少少真係好味，帶少少甜。
本想去麵包舖，點知比我搵到佢，上次搵唔到，今次就食到。
每款味要一個，原味、榴槤、咖啡和抺搽，都係$126，老闆娘仲幫我一開4，仲問佢〝聯興餅家〞係邊，原來向前行就到。
其實，這間舖係賣茶葉，門面擺左個櫃，雪炎糕批係另外個雪櫃拎，海棉蛋糕夾雪糕。
熊屋
網上推介：牛奶朱古力脆脆雪批($15)
地址：長洲大新後街114號地舖
行前幾個舖位就係〝聯興餅家〞，我主要係來買迷你麵包，可惜太晏，得返個腸仔包，只係買左月雞仔餅，好好味。
長洲同事個仔對蛋敏感，佢問過呢間係用鴨蛋整，所以佢係幫襯呢間買包。
聯興餅家
地址：長洲中學路6A地下
長洲同事介紹有檔食韮菜餃，但唔知叫咩名，位於海賓亭對面，我唔食韮菜，老公話唔夠韮菜味屬一般。
我去到見到檔野係〝為食堡餐廳〞出面，而且同事話唔知無名魚蛋阿叔去左邊到擺檔，我發現係韮菜餃對面，不過，之前食過都係麻麻。
路在口邊，問左韮菜餃檔阿姐〝天然甜品〞係邊，原來係佢後面，同事話芒果糯米糍，係天然首創。天然$8一粒，長洲平記就$15，但天然細粒啲。
天然甜品
推介：芒果糯米糍
地址：長洲大興堤路9號海景樓C座地下
最後一站，都係同事介紹，佢話係電台DJ開，呢到冇冷氣，但有風扇，店細裝修簡約。
小王子鍾意食伴碟提子，臨走問拎多粒，點知比左幾粒，店員個個都好Nice。
漁樂
同事推介：炸魷魚、炸蒙仔魚
開放式廚房
起初叫一份炸魷魚，想叫叫多份，店員叫我地試左好食先再叫，當然要再叫喇！用新鮮魷魚~好彈牙，真材實料好食。
後來又叫埋炸廣島蠔都一樣好食，推介我地飲〝冬瓜蜜茶〞，叫左3杯，醃尖老公都讚。
大家雖飽都全清。
船未到又行下消化下，因為出到去又食晚飯喇！
落船搭車去我家附近食飯，有啲餸太普通，所以冇影，食完飯氹下大家，又去食雪糕，全部人都捧住個肚走。
沒有留言:
發佈留言