釀冬菇 (內附食譜)

前幾日阿媽叫我整〝洋蔥豬扒〞，我話唔好喇！好耐之前肥阿哥已經問我有冇第2樣餸。

肥仔哥和老公都鍾意食東菇，就整釀冬菇。

本想整多味，但今日要幫阿媽清潔廚房，所以煮一樣就算。

釀冬菇

材料：

冬菇                         34隻

半肥瘦豬肉             299.7克

生粉                         適量

醃料：

豉油                         1湯匙

糖                             1/2湯匙

生粉                         1茶匙

麻油                         1/2茶匙

胡椒粉                     1/2茶匙

汁料：

蠔油                         2湯匙

糖                             1湯匙

水                             10湯匙

做法：

1.          冬菇浸軟去蒂。

2.          用醃料醃豬肉半小時以上。

3.          冬菇撲上薄生粉，然後釀入豬肉。

4.          熱鑊下油，釀冬菇豬肉上撲上薄生粉。(撲生粉時將火調至小火)

5.          豬肉果邊向下，用中小火煎焗2分鐘，再用中火煎焗3分鐘。

6.          反轉加汁料用小火煎焗2分鐘。

7.          再反轉小火煎焗3分鐘，直至汁料煮至杰身。

牙仔的故事

今個月小王子做左全身麻醉〝剝牙仔手術〞手術，現在就講下牙故事，資訊等有需要的人可以參考下。

小王子由阿爺湊，老人家緊係個孫要咩都比，加上頻密吃渴，又少飲水，所以蛀牙問題越來越嚴重。

2017年

今年小王子突然有蛀牙，起初少少，而家有幾隻，check過好多牙醫都好貴，補一個窿都要$1000，加上小王子坐唔定，而且係小朋友好多診所都唔會幫佢做補牙。

我係網上搵資料，搵到〝菲臘牙科醫院〞，因為位於2/F係比讀緊醫科學生做教學用途，所以價錢唔貴就帶小王子一試，我打電話去預約左先。

第一次見醫生評估左先決定收唔收，可惜小王子蛀牙情況係普通，屬於剛剛蛀，所以唔收，蛀牙原因係食住奶瞓覺，醫生話唔關食糖事。

醫生話可以參加一個計劃係蛀牙抺一種會變黑，可以令蛀地方變強，但怕影響佢心理～放棄了，而家要勤刷牙，希望唔會再惡化。

〝菲臘牙科醫院〞大人都可以睇，但要早上自己去排籌，但不多名額，詳情可以去：

http://ppdh.org.hk/zh-hant/ 。

2018年

蛙牙問題太多，再去左多次〝菲臘牙科醫院〞，今次終於收左小王子。

小王子照左X-ray，發現比平常人多左隻牙，位於上顎門牙位置，醫生話叫做《多生齒》，但向上生。

醫生比左2個選擇我：

1) 只幫小王子補牙，而多生齒就要自己搵私家牙醫做。

2) 補牙和多生齒都自己出去做。

我都明白因為係牙科學生，多生齒係小手術，所以我揀左(1) ，起碼比出面平好多，而家未有期睇，要回家等電話通知。

醫生都有介紹6樓〝香港大學先進牙醫學研究所-專科診所〞可以做多生齒，不過這一兩年暫時都不用理會，遲啲先搵私家牙醫做小手術取出，唔怪之得成日牙斬斬，兩歲幾三歲就開始駁嘴，又多嘢講。

2019年

我地2月去旅行，小王子旅行前間中牙痛到喊，〝菲臘牙科醫院〞又未有期，就帶佢去幫大孖補牙既私家牙醫睇，佢話小王子要杜牙根，佢做唔到，寫左介紹信去中環另一間診所，開左止痛藥，但我地冇比小王子食。

老公話咁樣睇一睇都唔平，把心一橫叫我打去位於〝菲臘牙科醫院〞6/F既〝香港大學先進牙醫學研究所-專科診所〞預約試下。

旅行回來後，終於等到3月睇牙醫之日，之前係2/F照x-Ray發現有一隻多生齒，今次係6/F照左X-Ray，醫生發現原來係有兩隻多生齒，做完檢查大牙蛀到生左牙倉。

醫生好好一次過幫佢做手術做全身麻醉，我地不用返來幾次。

手術會取出2隻多生齒，又做補牙，有隻又要做牙托，下面四隻大牙又要拔掉，上面大牙又要做防蛀牙，而家俾咗訂金排期做手術。

終於〝菲臘牙科醫院〞約左9月頭去見牙醫，咁啱〝香港大學先進牙醫學研究所-專科診所〞過一排又約見牙醫，所以就安排同一日去見2個牙醫。

〝香港大學先進牙醫學研究所-專科診所〞建議剝牙、補牙一次過全身麻醉做，等小王子不用太辛苦，而且牙6/F醫怕牙科學生handle唔到阿仔周身郁，6/F牙醫試幫小王子補一隻，我地係出面等，姑娘話冇打麻醉針，小王子一啲都唔驚，不過，有少少郁。

我地最後都係補牙由2/F牙科學生負責，一來平啲，診金每次都係$50，X-Ray是免費，補牙又冇收費，二來等小王子記憶深刻啲，而6/F每次診金$200、補牙$350、X-Ray$200，所以2/F平好多。

我地係2/F和6/F都遇到好醫生，每次小王子係2/F覆診牙科學生都會摺一隻精靈送比佢，所以最後一次覆診時我都整左〝蜂蜜宇治綠茶蛋糕〞多謝她。

香港冬日美食節@2019

每年都會約弟婦和大姪仔來來美食節，因為大家都鍾意食。

早上9點幾係灣仔食完早餐就入來，一入就係〝香港冬季購物節〞見到呢架巴士。

老公話係〝微影〞的，見好多人排晒隊，本想都排下影相，工作人員話免費，但要購買指定金額才可以上，心諗〝咁即係唔係免費喇！〞，可以一個人上去5分鐘，全車得你一個。

仲出左有罐頭巴士，有豬仔火腿午餐肉和鹹牛肉味，見好多人買，可能係會場限定。

再行下有搖控車，小王子緊係玩下喇！

我對腳比一般女仔大，要著男裝襪，但我鍾意公仔，所以會買韓國的。

我一見到就立即飛撲過去，小王子見到又話要買。

跟住就去目的地〝香港冬日美食節〞。

我地係〝玉子燒〞買左雞軟骨和魷魚鬚，2款都好食，上次食過牛柳粒唔好食，所以冇買。

見到呢間有鹿兒島和牛粒買左一份，真的好吃。

呢檔仲有大白兔糖雪糕添！

個個都唔食，就買一杯比小王子喇！但我都食左少少，唔覺有大白兔糖味，係得表面既練奶和甜味。

弟婦有啲唔舒服，所以買左冬瓜茶飲，我覺得甜。

之後又試左帆立貝、豬手、雞撕海蜇，老公又買左佢鍾意既柿乾。

老公話要食鮑魚，鮑魚、冬菇都好味，不過花膠未腍就一般，但個湯正。

小王子試飲好鍾意，比益力多冇咁甜淡一點，買左一set送左個玻璃樽。

呢個Cheese Cake好食，唔係怕肥就買多件。

老公買左喉糖

小王子都唔執輸又要買，佢試食左架！食食下又話唔食，大佬買左喇！成日都係咁，所以送比左一包弟婦。

剛才試左另一間，佢地覺得呢間好啲，所以我地每人都買左2盎大。

弟婦買左爆谷，但呢間覺得越來越貴，以前係葵涌廣場掃街，老公一定以它為終結，一個雞皮紙袋都係$12，而家就貴。

我地搵到位就擺低2個小朋友，繼續行。

我真係好口渴行勻全場都冇啱心水，最後見到呢間係鮮醋果汁，健康啲就買，小王子都鍾意飲。

回去時見到呢間就買左大啡菇，拿回去比佢地食，佢地坐係呢檔旁的櫈。

行過少少就見到有明星，唔怪之得姪仔頭先What's app我地話附近有好多記者，全部明星都係呢間野請來。

好在早來，我地3點幾走見到打蛇餅。

釣魚船屋

今日同事話要食豪啲，因為我地自己做節。

我就問下大家試唔試〝釣魚船屋〞，我就打左去訂位，試過大家都讚，下次可以再來。

之前我都想來〝釣魚船屋〞食晚飯，因為可以釣魚懋玩下，但係我地一家三口都唔食魚，不過，老公都會食三文魚、吞拿魚剌身，所以都係唔試。

我地被安排坐係釣蝦池旁，唔只釣魚，咁下次可以來釣蝦。

呢到係用自己電話scan QR code落單，可能我地揀得耐，1點45分都未來野食。

估唔到我order既要炸最怏來到，星期一至四隨餐送野飲，需要加一，但有85折都OK。

吉列豬扒便當：$128

釣魚船屋壽司十貫：$168

西京燒銀雪魚便當：$188

壽司便當：$188

燒牛肉便當：$138

這個係晚上的餐牌，當然scan QR code完都有其他選擇。

釣魚船屋

地址：觀塘駿業街56號中海日升中心2樓H室

電話：36188260

營業時間：1200 - 1530、1730 - 0000

摯友大澳行

我有個中學好姊妹嫁左去法國，今次因家中有事，所以舉家來港，趁此時機聚一聚。

老公話近冬至中餐會貴，摯友老公想打邊爐，所以就book左位，後來傾電話時，我話原本想帶佢地去大澳，摯友話都好，問左佢老公都OK，就改左去大澳。

早上小王子要去學晝晝，但原來老師請左假，立即what's app摯友，待她起身回覆，我地就去食早餐先，十點幾摯友來電，我地改左12:30係東涌等。

東涌巴士站搭11號巴士入，已經之前講定早餐唔好食咁飽，因為入到去就食。

落車行一陣就開始食，呢間大大魚蛋和滷水大墨魚都好好食。

復興行

地址：大澳永安街4D舖

小朋友食得好滋味

每次入來我都會食一個糯米磁，唔係怕肥食3個都可以，呢到係燒柴火做，小王子話唔食又食，我只係食左一啖咋！上次佢真係食左一啖唔食。

呢間蘇施黃都有介紹過，店舖係唔准影相的。

茶果財

地址：大澳石仔埗街106號地下

營業時間：1000 - 1900

原本幫人買海味，但同事介紹買海味間店今日休息，所以空手而回。

小朋友去左公園玩一陣

剛才買左支紫貝天葵，老公話冇其他咁甜，味清好飲。

行前啲就係少林，入去行左個圈，其實都冇野睇。

摯友老公發現虎山觀景台有指示，我地就原路行上去，來咁多次都係第一次行。

頭先摯友想去，睇片好遠咁，所以打消念頭。

小朋友精力過人，行得幾快，好似拍武俠片咁，眨下眼就行左去。

亭旁有個望遠鏡

頭先都見到呢檔野，行返落去老公就買佢最愛燒魷魚，見有花膠又幫襯下，花膠真係好食，花膠我地再encore。

頭先去左虎山觀景唔夠時間行去大澳酒店果邊，就路行返出去。

我要食個糯米磁先，小王子又搶左我，如果我買多個比自己，又怕小王子食食下唔食，我咪肥死，好在最後佢食剩半。

摯友買大地魚粉返去果邊整包雲吞。

張財記賣淡蝦醬，門口有蝦豬餅售賣。

張財記
地址：大澳吉慶街41號
營業時間：1300 - 1900

小時候去酒樓都會食沙翁，甚至經過麵包舖都會買，但而家平常都係見唔到它的踪影，所以每次入來都會食一隻。

大澳餅店
地址：大澳吉慶街66號
營業時間：1000 - 1800

係熱辣辣即炸，再碌沙糖，我要勁多糖~正！

等沙翁既時候見到狗狗，2個小朋友勁開心。

食完行前去〝銀芽橋〞有睇龍咁威既朋友應該會知我講咩！其實，正確名稱係〝新基橋5〞。

回程行返出去見到有蝦片，仲有試食，小王子食完即刻話好食，咁樣唔買唔得喇！

老公買左2包收左$30，佢原本係$20一包，真係好好人。

立即開左一包一齊食，真係好食啵！仲係早上先炸，夠新鮮。

最後一站當然唔少得去食中式甜品喇！呢間店係食傳統中式糖水。

今日店主做節收5點半，我望下錶都5點15分，佢都做埋我地生意，食緊途中再多2個人幫襯。

車站豆腐花

地址：大澳永安街57號

行返去巴士站路經〝復興行〞，大家又停低左，每人食一粒大大魚蛋先。

我見到有白色丸問係咪〝墨魚丸〞，老公和摯友都食左粒，仲話好食過大大魚蛋添。

小朋友真係好愛大大魚蛋，因為最後佢地再每人食多粒，今日2個小朋友每人食左3粒~勁丫！