鮮奶燉蛋白 (內附食譜)

我好鍾意食甜品，基本上咩甜品都食，暫時係得燉蛋唔食。

記得小時候阿媽整冰糖燉蛋，我係要喊住食，因為覺得好腥，唔鍾意食。

尋日整〝焦糖牛奶芝士蛋糕〞有隻蛋白剩，所以可以整〝鮮奶燉蛋白〞比老公食。

上次跟網上整過一次，但半失敗，今次決定自己寫食譜。

小王子話好臭，估唔到佢又要試，仲要差不多食晒，老公都係食左一啖仔咋！

頭先蒸完見好似唔凝固咁，影完相，見佢地食又冇問題，老公話好滑，唔滑小王子都唔食喇！

小王子話Good，仲叫我要再整，咁要等下次有蛋白剩先整喇！

小王子話甜，但老公就話OK，話下次不用減甜。

大家試整左一次先，若甜就下次減糖。

鮮奶燉蛋白

材料：直徑9cm、高4.5cm (外框)

蛋白                    1隻

糖                        1湯匙

鮮奶                    125毫升

做法：

1.          糖 + 蛋白攪勻。(用手動打蛋器)

2.          加入鮮奶，攪勻。(用手動打蛋器)

3.          將鮮奶蛋白用茶隔過濾，倒入器皿中。

4.          蓋上錫紙，用中火蒸10分鐘。

5.          關火焗5分鐘，即成。

 

貼士：

l   我蒸完時蛋白碰到錫紙表面不太平滑。

l   可以搵個器皿高一點，因為蒸既時候會膨脹。