韓式炸雞‧九巴口罩

九巴而家登記左搭巴士可以儲分換口罩，老公夠分換了。

尋晚老公話要去九巴服務中心換口罩，最近我地尖沙咀、沙田。

我地擇左沙田，因小王子想去睇模型。

我想食炸雞，去openrice睇得成個沙田得呢間有韓式炸雞。

好在早一步唔係就要等位了。

小王子可能受我影響，有食物來到佢又會叫我幫佢影相，而且好多時都拎相機出街，影食物。

頭先果張影唔晒啲雞，叫佢再影笑下，佢就笑成咁。

我地叫左牛肉飯、蜜糖炸雞、芝士麵，芝士麵係辣，你可以叫佢走辣。

老公覺得上次中環好食好多，緊係一分錢一分貨，不過，呢間老闆應該係韓國人，因為見有個便服韓國男人做樓面。

我地食完仲去左對面零食店掃貨，老公話蝴蝶酥比出面店和Donki都平。

同事推介這間雪糕、雪條，小王子揀雪糕，而我就食冧酒車厘子雪條。

我地食飽再食埋甜品好滿足了，就去沙田市中心九巴客服中心換口罩。

跟住我就去睇廚師機，上次來沙田又忘記睇，因為之前去某間百老匯問野，佢叫我去沙田問，因為呢到有人可以講解。

今日來到，老公行開左，個職員真係有問必識答，仲話優惠做到最後今日，仲送個研磨器，但我問完走左，仲考慮中。

我與老公會合後，同老公講左，老公唔識你用你自己決定，我一直十五十六。

隔左個幾鐘後我決定買，因為真係平左好多，而且仲有另一個原因。

我去到立即搵頭先個職員，然後開單，大家都攰，所以老公帶小王子去睇模型，我就係到等付款和送貨事宜。

我一去到精品店，小王子就話要買模型，佢個樣好慘。

我最後都有買比佢，唯一條件係一陣返屋企要溫書，因為這個星期又要默書又要小測。

小王子應承左，希望溫書時一切順利。