免費日

今日係選舉日，所以免費搭車，就出外走走喇！

之前申請左博物館的Year Pass，尋晚老公講先知原來未拎，所以第一站就去尖沙咀先。

我係Openrice搵有食就見到〝嘉寶漢堡〞，咁就食佢喇！

這間N年前老公之前講過雜誌有介紹話好食，但係葵涌果間，當時都未有尖沙咀呢間。

每星期日葵涌果間都會搭車經過2次，因為回娘家必經的，位置隔涉一直冇試。

落單後就有個機通知你取餐，有一個自助區，自己拎餐具、斟水，又有洗手機，你伸手埋去就自己出泡，然後就出水，當然係set左時間不能洗太耐，時間過左程序就唔啱架喇！。

如果你汽水和薯條就加$16轉套餐，野食整體都幾好，不過個包就細啲，我和老公食完都唔飽。

香辣煙肉蘑菇芝士牛堡 ($52)

黑松露芝士牛堡 ($52)

BBQ菠蘿雞扒堡 ($40)

我個黑松露芝士牛堡真係勁多黑松露~正丫！

下一站就去科學館拎返Year Pass，當然小王子順手又玩一陣，我比30分鐘佢，因為我地仲有2個地方要去。

離開科學館就去搭隧巴過海，途經麥當勞就入去食甜品先，因為我記得呢到有甜品站，老公想食綠茶雪糕要甜品站先有，之前去親都冇甜品站的。

當然緊係每人一杯，這是常識吧！不過，有點後悔，因為小王子食唔晒，老公話飽幫手食左2啖仔，而我幫佢食左半杯，雖然我食得落，但怕肥嘛！

炮台山東岸公園諗住下星期請左假帶小王子來，既然今日免費搭車就一家三口一齊去。

原意來係比小王子跑下放下電，點知多人到真係〝Mountain People Mountain See〞(講下港式英文先~哈~哈！)，又勁大風。

雖然多人，但小王子跑來跑去好開心，玩到天黑都唔走。

根本冇辦法影到正面，唯有影下個背脊啦！

影出來冇咁靚，緊係喇！我不是專業的。

最後一站就係去〝工展會〞，疫情前每年都來，所以今年好開心，不過就冇得食野就有點唔開心囉！

家中隻鑊想換好耐，今次最主要是來睇鑊，年尾買好過年頭，唔係要孭鑊一年唔好意頭唷！

我係天上野買一隻生鐵鑊，又送一個角落生物生鐵鍋，真係買一送一，仲幫我開埋鑊添！

今年工展會的戰利品。