藍莓焗原味芝士餅 (內附食譜)

上星期三，下午5點幾小王子好朋友阿媽message我。

佢問訂一個蛋糕幾多錢？如果一個2磅的芝士蛋糕又幾多錢？

我平時都係自己整，好耐冇買蛋糕，於是我上網搵資料比佢。

原來佢有朋友想訂蛋糕想搵我幫手，於是我就接左人生第一張蛋糕order。

每年小王子order的生日蛋糕唔計，因為今次係有錢收的，哈~哈~。

我用之前的〝藍莓焗原味芝士餅〞將6吋改戚8吋份量。

接左單後先知要寫牌，弊喇！平時我都冇牌，因為字好難寫。

朱古力牌去左烘焙店買左2塊，萬一衰左都仲有後備。

於是我夜晚在家溶朱古力練字，但真的寫得好肉酸。

突然記起電視有介紹過食用筆，我就上網搵下，然後係烘焙店的Facebook留言問下可否寫到落朱古力牌到。

點知一間話得，另一間又話唔得，話支筆不可以寫落有油的地方，只可以寫係水的質地。

話唔得果間仲建議我可以用朱古力轉印紙，又好似好方便啵！

我見轉印紙果間係公司附近，我第2日lunch就上左去買。

原來轉印紙係包埋朱古力牌，朱古力牌仲有白和啡2款，蛋糕深色，就買左2塊白。

我仲買左埋支食用筆回家試下，點知寫左落去用手一抺就會有點化和淺色左。

我為左呢個牌，成本多約一百蚊，因為第一次冇經驗。

不過，下次要寫牌都唔接，都有點壓力，因為我寫字唔靚。

明天公司放半日可以早點交收，跟住又要立即預初一回娘家的大食會了。

藍莓焗原味芝士餅     

消化底材料：8吋

無鹽牛油 (溶液)       45克

消化餅                        107塊

芝 士 餡 材 料 :  

忌廉芝士 (室温)      622克 

砂糖                           135克

無鹽牛油 (座熱)       117克  

雞蛋                           176克

淡忌廉                       78克

餅 面 材 料 : 

藍莓醬 (裝飾)           適量

藍莓生果 (裝飾)       少許

做 法 :   

1.          蛋糕模內鋪上焙紙，然後外圍包2層錫紙。

2.        消化餅壓碎，加入牛油溶液撈勻。

3.     倒入蛋糕模內壓平，放入雪櫃雪至硬。

4.       放入忌廉芝士 + 砂糖在缸內用 (1号速) 打 2-3 分鐘打至軟身。

5.       放入雞蛋 (分2次加入) 攪拌均，刮下紅邊芝士漿。

6.       停機 ..... 加入淡忌廉 (拌勻) ~ 用 (1号速) 打至軟身 。

7.       加入已預先預熱牛油溶液後 (慢慢拌勻) 。

8.       將芝中漿倒入模圈內，再放入焗盤上 ( 焗盤上再注入少許熱水 ) 。

9.       用190度火，焗50分鐘至芝士餅發起及餅邊變成棕色。

10.    從焗爐取出蛋糕，放涼後脫模。

11.    將藍莓醬塗在芝士蛋糕中央 ，待凉後即可玖入雪櫃雪凍後切件食~更佳 。