黑芝麻芝士蛋糕 (內附食譜)

這個蛋糕係2012年整過返公司，當時係同事們慶祝我的生日。

我以為用少左淡忌廉蛋糕會好實，而且都用得多魚膠片，但又唔係啵！唔係實係挺身。

蛋糕切件後可以用手拎住食，又唔會弄污手。

老公同事們都讚好食，仲話比〝黑芝麻棉花蛋糕〞好，呢個芝麻味好出。

食剩的仲幫我打包拎走添，因為家中2個老闆又係唔食。

製作過程：

• 我用6吋慕絲圈。
• 黑芝麻醬開左我存放係雪櫃，所以我用熱水座溶，唔係一舊舊用唔到的。
• 淡忌廉唔夠只用左340克，咁樣就剛好填滿6吋慕絲圈，如跟食譜375克，就可能有多了。
• 我習慣打完cream就雪返落雪櫃備用，但係呢個蛋糕就唔好，因為混合左cream之後就起舊舊，我覺得因為cream凍，我立即用暖水座返溶少少，但要自行睇情況不要座太耐。
• 食譜書係在蛋糕表面用剩餘的黑芝麻芝士餡唧圈鋪滿在表面上作裝飾，可能我技術不夠好肉酸，此動作我係蛋糕雪至有點硬就做， 所以可以將黑芝麻芝士餡鋪平再雪作補夠。

黑芝麻芝士蛋糕

食譜來自：精緻慕斯蛋糕

材料：2.5吋圓形模具5個

Oreo朱古力味餅碎          60克

無鹽牛油                                  30克

黑芝麻芝士餡：

忌廉芝士                                  180克

糖                                                 80克

黑芝麻醬                                  75克

淡忌廉                                       375克

魚膠片                                       15克

餅底做法：

1.       把Oreo朱古力味餅碎和已洽牛油拌勻，然後壓在餅圈內鋪平備用。

黑芝麻芝士餡做法：

1.       先把淡忌廉用打蛋器打起至軟雪糕狀備用。

2.       把忌廉芝士和糖用打蛋器打至滑身。

3.       放入黑芝麻醬拌勻。

4.       加入已浸軟及融化的魚膠片快速攪勻，再加入已打起的淡忌廉拌勻。

組合及裝飾：

1.       把8成黑芝麻芝士餡倒入已有餅底的餅模內鋪平，冷凍。

2.       脫模後，把剩餘的黑芝麻芝士餡唧在面上作裝飾。

3.       蛋糕邊用朱古力圍邊，面放紅紅桑子和薄荷葉。

貼士：

·         黑芝麻醬可於大型超級市場或日式百貨店內有售。