杏仁牛油軟蛋糕 (內附食譜)

 今日一起身就即刻整蛋糕，因為之前開左盒鮮奶未用晒，尋晚搵定用鮮奶做既蛋糕，整完今次都仲係未用晒，要再諗下整乜好。我留左幾粒比老公，其他就攞晒回娘家，食後大家意見不一，等我明天試下先得。  

食後感：  

阿婆：鬆，好食。

阿媽：實，唔夠〝蝦子餅曲奇〞好食。

阿公：我見咁樣就比左一粒阿公試，食完仲要食多幾粒。  

杏仁牛油軟蛋糕  

食譜來自：自家製曲奇小蛋糕~Home-make Cookies & Petit Cakes  

材料：(份量約8-10個)  

全蛋                        2隻  

砂糖                       60克  

低筋麵粉                  70克

牛油溶液                  15克

牛奶                          30克

雲呢拿香油              1/4茶匙

杏仁片                       適量  

做法：  

1.       先以180度預熱焗爐。  

2.       牛油先以隔水加熱方法坐溶備用。  

3.       先將蛋及糖用電動打蛋器打至結身後加入牛奶用膠刮刀拌勻。  

4.       將已篩過的麵粉加入蛋糊內快手拌勻。   

5.       將雲呢拿香油及牛油溶液倒入輕手拌勻。  

6.       用匙逐少倒入紙杯內將9乘高。將杏仁片放在蛋糊面上。  

7.       以180度焗約20分鐘便成。  

小貼士：  

l   可用一鋼撻模或矽鯓模盛著小紙杯入焗爐，焗出來的成品外型不會變形。亦可用一些形狀特別的矽膠模代替紙杯模。

香蕉蛋糕 (內附食譜)

我成日都想整包餅，差不多每日都拎無鹽牛油室溫，室室下又放回雪櫃，總之就的唔起心整喇！情況都持續左一個月有多。   

上星期食〝鄭秀文三日減肥餐單〞，有2條蕉剩，前日已見到蕉皮都變黑，唔食就會嘥，所以尋日我就買定牛奶預備今日整〝香蕉蛋糕〞。

尋晚漏夜再睇多次個食譜，但係要用Plain Flour，我手上既又唔夠，跟住再摷食譜書，被我搵到另一個〝香蕉蛋糕〞，但要用乳酪，哎呀~點解咁架！我都冇乳酪，好~我就牛奶代替喇！   

今日開工個心有D戰戰兢兢，因為用料自己更改過唔知得唔得，做法和用料我係參考〝西點大百科〞。我用左一條蕉整左一份，入焗爐前心諗橫掂都係整多份一齊入爐，但另一問題焗2條可能用既火力和時間又唔同，所以都係焗住一條先。焗緊同時我又整多一條，仲有10分鐘焗完第一條，我就將第二條入埋爐一齊焗。   

出爐趁熱切開睇，香蕉蛋糕通常都係咁樣，我試左少少好軟熟，但放涼後又唔知會點呢？雖則蕉味不太濃，但食落就有蕉既感覺。

香蕉蛋糕

材料：(錫紙模17x6x高度5cm~1個)

無鹽奶油                          60克

砂糖                                  100克

蛋 (中型)                         1個

低筋麵粉                          120克

小蘇打                              1/2茶匙

泡打粉                              少許

鹽                                      1撮

牛奶                                  63克

香蕉 (充分成熟的)         1條

做法：

1.         先以180度預熱焗爐。

2.         香蕉去皮放入容器裡，用叉子的背搗碎。

3.         容器裡放入奶油，用打蛋器或手提電動攪拌器以含入空氣的方式搓揉混合，變成絨毛狀。將砂糖分2-3次加入，每次加入時就攪拌混合，使其和奶油相融。

4.         充分含入空氣，攪拌混合到汎白膨鬆。加蛋混合，再加小蘇打、泡打粉、鹽繼續拌混合。

5.         加入香蕉，再將整體一起混合。

6.         將1/3量的低筋麵粉放入網篩裡，再次過篩加入。用打蛋器迅速混合，使整體相融。

7.         加牛奶，混合。篩入剩餘的低筋麵粉，改用橡皮刮刀，一手邊將容器向面前旋轉，注意不要搓揉，而以縱各切入般混合到看不到白粉。

8.         沾一點材料，塗在鋪在模具裡的烘焙紙的接縫處貼合起來，再倒入材料。將模具輕輕掉落在台上2-3次弄平，放入180度的焗爐，烘烤50分鐘。用手指觸摸中央有彈性，就表示烘烤完成。去除粗熱後從模具取出，放在冷卻架上冷卻。

薯仔蛋沙律 (內附食譜)

 今晚我整左〝薯仔蛋沙律〞，早在2、3年前睇有線阿蘇教整沙律，有次朋友聚會我都有跟佢整，但冇跟足，朋友都話好味。

前幾日又係〝蘇Good〞睇到教整沙律，今次又係冇跟足。   

我冇用〝蛋黃醬〞，因為本身有蛋黃，咁又可以慳返D，蛋黃醬都唔平架！

其實，材料和調味都係隨個人喜好，最緊要係試味。

薯仔蛋沙律

材料：(2-3人份量)

蛋                    4隻

薯仔 (小)       2個 (約363克)

洋蔥                11克

沙律醬            適量

煉奶                適量

鹽                    少許

做法：

1.         洋蔥切成微粒。

2.         蛋烚熟，去殼切粒。

3.         薯仔削皮烚熟和腍，切粒。

4.         將薯仔和蛋粒放入大碗內，加入沙律醬、鹽、煉奶，試味，便成。

小貼士：口味隨個人喜好調教。

吞拿煙肉薯蓉 (內附食譜)

我以前有排O.T.做到好夜，最早都9點幾先返到屋企，咁夜都唔知食乜？

我就會整呢個薯蓉做晚餐，我仲會預埋肥細老一份架！   

以前自己瘦就會用好多植物牛油，因為令薯蓉滑D，但而家就盡量少。

烚2個焗薯，再加煙肉、粟米粒、磨菇、吞拿魚沙律，係咪好豐富呢？所以肥細老話被我谷肥左。   

老公又唔食粟米粒，又唔想買咁多料，買得多份量自然又多，所以都簡單D好D。

其實，呢款薯蓉係以前摯友整比我吃，之後自己再加加減減，而家從不入廚房既肥細老有時都會整比娣婦吃架！

等阿B遲D大個傳比佢先，一個傳一個，可以代代相傳丫嘛！   

我鍾意整D薯蓉有D酸和鹹，食既時候仲要有D微暖，我覺得咁先好食。

吞拿煙肉薯蓉

材料：(4-6人份量)

焗薯 (細)                3個

吞拿魚 (水浸)        1罐

煙肉                         3條

洋蔥 (細)                1/4個

植物牛油                 適量

椒鹽                         適量 (亦都可用〝准鹽〞)

沙律醬                     適量

胡椒粉                     適量

黑胡椒碎                 適量

做法：

1.         洋蔥切粒。

2.         吞拿魚隔去水份，用沙律醬撈勻。

3.         煙肉切細長形，白鑊略炒煙肉，備用。(想將油份減少，烚都可以)

4.         焗薯烚熟和腍，去皮用匙稍微整爛。

5.         趁熱加入植物牛油，邊撈邊壓爛。

6.         加入椒鹽、胡椒粉、黑胡椒碎撈勻，試味。

7.         再加入吞拿魚沙律和煙肉，試味。

8.         將少少煙肉放面作為裝飾，便可。

小貼士：

l  用植物牛油可以令到薯蓉滑D。

金香蜂蜜小雪紡 (內附食譜)

我一直都想用戚風模整蛋糕，但係上次整〝天使豆腐戚風蛋糕〞失敗左，又覺得個模好麻煩，所以都唔敢再試，但係近日又見到好多blog友整，所以今次我就的起心整。  

尋日朝已想整，但又趕住回去湊阿B，所以我尋晚漏夜整，好在呢個蛋糕做法好簡單，不用半小時已完成。  

今次空前絕後咁成功，尋晚我冇試味，因為夜咁肥，今朝我先試味，但都係試左少少，仲係好軟，好似雪芳蛋糕咁，又唔太甜好味。    

金香蜂蜜小雪紡  

食譜來自：自家製曲奇小蛋糕~Home-make Cookies & Petit Cakes  

材料：(份量約1個5吋雪紡模)  

蛋黃                  2隻  

蜜糖                10克  

橄欖油              10克  

水                     10克  

低筋麵粉           40克  

泡打粉               2克  

蛋白                    2隻  

砂糖                   20克  

做法：  

1.       先以180度預熱焗爐。  

2.       將10克蜜糖加入蛋黃以手動打蛋器攪拌均勻，再倒入水及橄欖油攪勻。  

3.       將已篩過的麵粉及泡打粉加入蛋黃糊內攪勻備用。  

4.       將蛋白打至起泡後將20克砂糖分次加入繼續打至挺身，用膠刮刀分出1/3蛋白糊放入蛋黃糊內以膠刮刀快手拌勻，麵糊倒入紙模內後，輕將模具在桌上拍數下，盡量減少麵糊內的空氣。  

5.       以180度焗約20分鐘取出倒扣放涼便成。  

小貼士：    

l   這是用較大的紙製雪紡模具，為免蛋糕會收縮下陷，出爐後必需立即倒扣在放涼架上至完全放涼。

海綿小蛋糕 (內附食譜)

今日真係好得閒，今早被鄰居吵醒後，就執屋，整東攪西，都只不過係12點幾，跟住又睇下電視，真係無聊，坐下坐下記起上星期開左盒奶仲有2/3盒。   

我唔想嘥，隻眼又冇乜事，所以又攪下書，我用以下食譜，整左3倍份量。我而家拎回娘家，今次阿婆可以有排吃喇！ 

海綿小蛋糕

食譜來自：自家製曲奇小蛋糕~Home-made Cookies & Petit Cakes

材料：(份量約20-25個)

全蛋                   2隻

砂糖                   50克

低筋麵粉           70克

橄欖油               10克

牛奶                   30克

做法：

1.         先以180度預熱焗爐。

2.         先將蛋及糖用電動打蛋器打至結身後加入牛奶用膠刮刀拌勻。

3.         將已篩過的麵粉加入蛋糊內快手拌勻。

4.         將橄欖油倒入輕手拌勻。

5.         用小匙逐少倒入小紙杯內約9乘滿。

6.         以180度焗約20分鐘便成。

小貼士：

l  可用一些鋼撻模或矽膠模盛著小紙杯入焗爐，焗出來的成品外型不會變形。