咖哩角 (內附食譜)

我想挑戰咖哩角好耐，趁今日同家人大食會，佢地可以做我白老鼠喇！

今日整春卷和咖哩角，起初用大塊春卷皮，大的用完就用細塊的。

春卷皮大的包起是正常size，而細的包起來是一口size。

今次挑戰成功，下次又挑戰咩好呢？

咖哩角  

材料：

免治牛肉                110克

焗薯                        114克

洋蔥                        60克

春卷皮                    適量

蛋液                        適量

醃料：

豉油                        1/3茶匙

糖                            1/2茶匙

生粉                        1/4茶匙

水                            1/3茶匙

調味料：

咖哩粉                    1/4茶匙

魚露                        1/2茶匙

做法：

1.          免治牛肉用醃料醃最少半小時。

2.          焗薯烚淋，然後壓成蓉，備用。

3.          洋蔥切成小粒，備用。

4.          炒香洋蔥，加少少水炒淋，盛起。

5.          免治牛肉炒至半熟，加入洋蔥，炒勻。

6.          分散一點遂少加入咖哩粉，炒勻，然後加入薯蓉一起炒。

7.          最後加入魚露調味，盛起。

8.          春卷皮剪開3份，包入餡料，用蛋液封口。

9.          待油熱放下咖哩角炸至金黃色撈起。

10.      再翻炸多一次，即成。

貼士：

l   炒洋蔥時加水，作用令到洋蔥淋身。

l   咖哩粉少少的加入，目的不會黏在一起，使其難炒勻。

Lego啫喱糖

上次整〝自家製橡皮糖〞原食譜來Lego模，為氹小朋友就買定個模。

今日去娘家大食會，尋日就用Lego模整啫喱糖。

起初見Lego模都比較細，心想個模要唔要抺油。

唔抺油又會唔會難脫模呢？抺油糖有油會唔會有點怪呢？

結果，我都係冇抺油，脫模超易，亦不用牙纖介邊，直接徒手脫就可以。

不過，這款糖個底比較黏，不過雪過一夜就冇問題。

宇治綠茶迷你蝴蝶酥(內附食譜)

今年新年有人送左一盒蝴蝶酥，內有幾種味，小王子只食綠茶味。

之後我都有整蝴蝶酥，但佢唔食，所以我今次就整綠茶味。

我趁中秋節假期開工，都係用返之前既食譜，份量改左少少。

今次我非常用心整，酥皮尺寸都跟足，平時係大約的。

我買左支麵枇棍可以量度麵皮的厚度，所以酥皮要3mm厚度就會大過8x12吋，大家自行選擇。

我試過蝴蝶酥切得比食譜厚，焗出來唔夠脆，所以都係薄切好。

老公話綠茶同蝴蝶酥唔多夾，但小王子就食左6、7塊都仲話要食，但太夜唔準再食。

老公咁講我唔敢拎返公司請同事食，但食左2日我都唔覺有咩唔夾。

今日我就拎返比同事問下意見，全部都話冇問題，仲話綠茶味唔夠，得一個話唔係好夾。

我應該唔會再整綠茶蝴蝶酥，整原味算了。

宇治綠茶迷你蝴蝶酥

材料：

高筋麵粉                 144克

低筋麵粉                 71克

宇治綠茶粉             6克

無鹽牛油 (室溫)     81克

冰水                         88克

酥皮專用油片         110克

砂糖                         適量

做法：

1.          首先將高筋麵粉、低筋麵粉篩好，牛油、酥皮專用油放室溫，備用。

2.          將高筋麵粉+低筋麵粉+室溫牛油+冰水放入缸內(用鈎型鐵用1號速攪拌成糰)。

3.          然後放在枱上用棍將麵糰輾按壓薄，再用保鮮紙包好放入雪櫃冷藏一陣。

4.          將酥油用木棍輕壓至正方形，然後取出麵糰。

5.          將酥油斜角放上中間四角對摺包著酥油。

6.          用摺四折法摺一次。 (放入雪櫃冷藏一陣)

7.          將酥皮麵糰取出，用木棍輕輕輾薄。(直長12吋 X 橫闊7吋)

8.          用摺三折法摺一次。(放入雪櫃冷藏一陣)

9.          將酥皮麵糰取出，用木棍輕輕輾薄。(直長12吋 X 橫闊7吋)

10.      用摺三折法摺一次。(放入雪櫃冷藏一陣)

11.      將酥皮麵糰取出，將酥皮輾成 8x12吋，厚3mm。

12.      將酥皮的兩端向中間卷起，用保鮮紙將酥皮包起，然後放入雪櫃雪6小時。

13.      (如果是現成酥皮就不用雪，亦可將酥皮輾開2塊，然後卮再卷起)

14.      從雪櫃取出酥皮切成(5mm厚皮)，然後兩面蝴蝶酥都沾上砂糖，再放上預先舖了牛油紙在焗盤上。

15.      入焗爐以190度火(中層)焗10分鐘，然後將蝴蝶酥反轉及再轉上(高層)焗5-10分鐘至金黃即可。(緊記留意焗爐)

芝士麻薯波波@煙韌版 (內附食譜)

上次整〝芝士麻薯波波〞覺得唔夠煙韌和甜，今次改左份量，煙韌左少少，但都係唔夠甜。

糯米粉家中得返152克，所以用原食譜按糯米粉的份量來改動，唔知明天仲好唔好食呢？

我冇將奶扣起，但就將全部逐少加入，因為個橡皮杓斷左，所以我係用手搓的，只要混合好就停手，搓得耐會起筋。

芝士麻薯波波

  

參考食譜來自：http://ericsbakery.blogspot.hk/search?q=%E8%8A%9D%E5%A3%AB%E9%BA%BB%E8%96%AF%E6%B3%A2%E6%B3%A2

材料：

糯米粉                         152g

木薯粉                         28g

牛奶                             153ml

糖                                 9g

泡打粉                        1g

大蛋                             1隻

已溶牛油                     37g

巴馬臣芝士粉             55g (只用芝士粉賣相、口感冇咁好)

巴馬臣芝士碎             30g (不加就要減9-14ml水)

*牛奶份量需扣起10%，視乎情況加入。

做法：

1.     先將糯米粉、木薯粉、泡打粉、芝士粉、糖，用膠刮攪拌混好。

2.     逐少加入牛奶、蛋漿，然後加牛油，攪拌勻沒有粉粒為止。(過度會攪出筋)

3.     最後加入芝士碎。

4.     焗爐預熱180度備用。

5.     將攪拌好材料加入唧袋內。

6.      焗盤舖上牛油紙，將粉漿垂直唧出至1吋半大，不要轉圈唧出，否則似牛屎。

7.      每個要有1吋距離，因為會澎脹，否則會黏埋一齊。

8.        用180度火加熱風，焗盤放在最高位置，焗20分鐘。

注意：

·         不要用麵包機攪拌，因為粉漿會黏住內膽好難整返出來。

·         如色澤未夠金黃，再焗幾分鐘，然後用餘溫再焗至金黃色即成。

·         奶份量多少要視乎麵團稀杰程度，不要一下子落晒，如果似湯圓、手搓麵包的麵團就太乾，應該用手搓不到，因為會好黏手的，用唧袋唧出不會即時塌下扁平才算成功！

·         每個牌子麵炒受水能力不同，爐溫各有差異，請自行調節，食譜份量只供作參考。

·         唧咀大小直接影響形狀。

·         矽膠唧袋效果會比較好。

·         放涼後可用焗爐翻熱，切勿用微波爐。

·         不可放入雪櫃儲存，否則變硬。

芝士杯子蛋糕 (內附食譜)

上個月整過一次，但個表面裂晒，都問過食譜主人，話可能係打蛋白出左問題~想睇相，但我冇影相，唯有下次打既時候影低相，再有問題都可以有相睇下邊到出錯。

之後再睇多次食譜，我就發現自己忘記用水浴法，雖然賣相唔得，但味道~good。

今次我好有自信，所以冇影相~成功了，不過，張錫紙應該穿左~入左水，可能咁樣蛋糕比上次濕啲。

這個蛋糕可以用杯或6吋模，用6吋模就不用抺油或烘焙紙，直接倒入模入焗就可以，但記得包錫紙，如果用杯就不用水浴水。

芝士杯子蛋糕

食譜來自：https://www.facebook.com/KellyCookies2016/photos/p.1114137345404197/1114137345404197/?type=3&theater

材料：杯子/ 6吋圓形活動底

蛋黃                     3隻

忌廉芝士             78克

牛奶                     30克

低筋麵粉             55克

菜油                     22克

蛋白                     3隻

糖                         48克

做法：

1.      忌廉芝士同牛奶，隔熱水煮，煮至無粒狀。

2.      加入菜油，不停攪拌，離火。

3.      蛋黃打勻，慢慢用手打器加入忌廉糊，拌滑。

4.      篩入麵粉，分2次加，拌至無粒。

5.      蛋白同糖打發，打王濕性發泡，勾勾向下。(濕性發泡)

6.      蛋黃糊同蛋白糊混合，分2-3次。

7.      出入爐前凳走空氣。

杯子焗法：

1.      110度20分鐘。

2.      120度12分鐘。

3.      170度5分鐘。(上色)

4.      關火，悶5分鐘。

5.      出爐後凳走空氣。

6吋焗法：

1.          焗盤內加水。

2.          110度20分鐘。

3.          120度20分鐘。

4.          150度10分鐘。

5.          180度大約5-6分鐘。(上色)

6.          關火，悶5分鐘。

7.          出爐後凳走空氣。

貼士：

·         記得焗好時間，用手拍打蛋糕表面，如果不熟是有沙沙響聲，要焗到沒有，才不會縮，不縮收腰，留紋。

·         整8吋模，材料x2，溫度不用x 2。