肉絲炒麵 (內附食譜)

 今晚老公晚餐又有好野食，茶記另一名物〝肉絲炒麵〞，又係多得Eric師兄出的食譜。

老公話同外出一樣，仲要冇咁油，我煮得身水身汗都抵。

小王子好鍾意食個麵，佢話脆脆地又淋淋地。

我用左食譜份量去埋茨都好稀，都用左好多食譜以外的生粉水，又係果句自己睇情況執生。

肉絲炒麵

 食譜來自：https://www.youtube.com/watch?v=buQt8zqN9dA

 材料：2人份

全蛋麵餅                        1個

冬菇 (切絲)                    3粒

草菇 (一開2)                 4粒

甘筍 (切絲)                    1/2條

銀芽                                1/2斤

韮黃                                6條

豬肉 (切絲)                    200克

蔥段                                少許

 豬肉醃料：

豉油                                2茶匙

砂糖                                1/2茶匙

雞粉                                1/2茶匙

麻油                                1茶匙

胡椒粉                            1/2茶匙

 調味：

幼鹽                                1/2茶匙

砂糖                                1茶匙

 茨汁：

清雞湯                            500毫升

生粉                                2茶匙

鮑魚汁                            1湯匙

 做法：

1)      水煮滾後熄火，放入麵餅。

2)      用筷子撥散，約2分鐘後撈起。

3)      麵放入筲箕過冷河，放在筲箕內攤開至乾爽。

4)      豬肉絲用醃料醃15分鐘。

5)      草菇汆水1分鐘。

6)      冬菇炆腍15分鐘。

7)      肉絲煎香後炒，加入甘筍、糖、鹽炒至軟身。

8)      加入冬菇、草菇，炒勻。

9)      加入韮黃、蔥段，炒勻，備用。

10)  銀芽略炒，備用。

11)  鑊中加入雞湯、鮑魚汁煮滾，加生粉水埋茨。

12)  加入其餘材料炒勻，再加入銀芽炒勻，備用。

13)  落多點油，半煎炸煎脆麵，大火每邊煎4分鐘至金黃。

14)  麵放在碟上，淋上配料及茨汁，即成。

 

注意事項：

l   要加多啲花生油，半煎炸去做，火要夠猛。

l   麵不可煮太淋，熄火去浸到散開，約2分鐘搞掂，記得要過冷河。

l   麵煮散後要放筲箕瀝乾水份，攤開吹到夠爽身，麵唔可以濕立立。