紫薯撻 (內附食譜)

尋晚我見雪櫃有紫薯，不如今朝攪攪新意思~整紫薯撻，有朋友可以幫手做我白老鼠。

尋晚我就整好個撻皮存放雪櫃，早上取出回溫。

撻皮係跟朱Sir的〝鮮奶蛋撻 (曲奇餅皮）〞，不過我就整一半份量，而撻皮就由25克轉30克一隻，因為上次老公話皮薄。

紫薯餡邊整邊修改，紫薯不是壓得太蓉，因為我想有點咬口。

由於想有咬口，我將紫薯蓉入唧袋轉左好多個花咀都唧唔到花。

於是，我就把心一橫~唔唧花，整紫薯小山丘算。

單單唧花已花了好多時間，攪到我頸都痛，全部用左我3個幾小時。

由於下午開左個榴槤大會，所以好飽。

夜晚吃過晚餐我都食左一個，味道又OK啵！另一個朋友都食左都話好。

其他人太飽，留明天才吃。

製作過程：

• 想唧花的朋友，紫薯蒸完可以用攪拌機打爛。
• 要唔要加糖要試過條番薯先，因為我果條唔甜，所以我稍稍加左糖。

我做左個實驗，想睇下叉洞、用米宅住野‧‧‧‧‧‧‧等等，出來效果會係點，以下是結果。

1. 米宅住叉洞 (2個)：撻沒有膨脹凸起。
2. 米宅住唔叉洞 (2個)：撻沒有膨脹凸起。
3. 叉洞 (2個)：撻有膨脹凸起。補救方法：中途取出，整穿凸起地方。
4. 唔叉洞 (2個)：撻有膨脹凸起。補救方法：中途取出，再加烘焙紙和米。

紫薯撻

撻皮材料：7cm直徑撻模8個

無鹽牛油                            80克

糖霜                                    22克

三花淡奶                            9克

北海道奶粉                        10克

高筋麵粉                            61克

低筋麵粉                            61克

朱古力溶液                        適量

紫薯材料：

宮崎縣紫薯 (連皮)            302克

鮮奶                                    130克

糖粉                                    5克 (不一定要加，自行試左紫薯甜度先)

蛋撻皮做法：

1.      無鹽牛油從雪櫃拿出來就可以切粒。

2.      無鹽牛油+糖霜初步混合。

3.      加入三花淡奶混合。

4.      加入北海道奶粉、高筋麵粉、低筋麵粉再混合，初步成糰就可以。

5.      攪拌過度或搓過籠，有筋性後口感就不好吃。

6.      用包鮮紙包住麵糰鬆弛15分鐘。

7.      麵糰分割大約30克一粒，略為搓圓成蛋撻皮。

8.      蛋撻皮撒上少許手粉。

9.      蛋撻皮沾上少少手粉，稍為禁扁。

10.  放在撻模中央，底和邊之間發手，一下禁一下向上捏，直至圍繞一圈。

11.  在撻上放上烘焙紙，再放上米，使撻皮焗的時候不會膨脹凸起。

12.  用170度，焗17分鐘。

13.  取走米，再焗6分鐘。

紫薯做法：

1.      紫薯去皮切粒，用中火蒸20分鐘。

2.      用壓薯蓉器壓爛。

• ·         我的紫薯蓉仲有微微粒，因為我想食落仲有紫薯，所以有些保留粒狀。
• ·         想唧花的話就可以用攪拌機打爛。

3.      加入鮮奶、糖粉攪勻。

組合：

1.      撻放涼後，塗上朱古力溶液在撻的表面，防止紫薯的水份整軟撻皮。

2.      將紫薯蓉墳滿撻皮就可以，款式隨個人喜好。