2+1的生活 Home Sweet Home

2019年12月21日星期六

摯友大澳行

我有個中學好姊妹嫁左去法國，今次因家中有事，所以舉家來港，趁此時機聚一聚。

老公話近冬至中餐會貴，摯友老公想打邊爐，所以就book左位，後來傾電話時，我話原本想帶佢地去大澳，摯友話都好，問左佢老公都OK，就改左去大澳。

早上小王子要去學晝晝，但原來老師請左假，立即what's app摯友，待她起身回覆，我地就去食早餐先，十點幾摯友來電，我地改左12:30係東涌等。

東涌巴士站搭11號巴士入，已經之前講定早餐唔好食咁飽，因為入到去就食。

落車行一陣就開始食，呢間大大魚蛋和滷水大墨魚都好好食。

復興行

地址：大澳永安街4D舖

小朋友食得好滋味

每次入來我都會食一個糯米磁，唔係怕肥食3個都可以，呢到係燒柴火做，小王子話唔食又食，我只係食左一啖咋！上次佢真係食左一啖唔食。

呢間蘇施黃都有介紹過，店舖係唔准影相的。

茶果財

地址：大澳石仔埗街106號地下

營業時間：1000 - 1900

原本幫人買海味，但同事介紹買海味間店今日休息，所以空手而回。

小朋友去左公園玩一陣

剛才買左支紫貝天葵，老公話冇其他咁甜，味清好飲。

行前啲就係少林，入去行左個圈，其實都冇野睇。

摯友老公發現虎山觀景台有指示，我地就原路行上去，來咁多次都係第一次行。

頭先摯友想去，睇片好遠咁，所以打消念頭。

小朋友精力過人，行得幾快，好似拍武俠片咁，眨下眼就行左去。

亭旁有個望遠鏡

頭先都見到呢檔野，行返落去老公就買佢最愛燒魷魚，見有花膠又幫襯下，花膠真係好食，花膠我地再encore。

頭先去左虎山觀景唔夠時間行去大澳酒店果邊，就路行返出去。

我要食個糯米磁先，小王子又搶左我，如果我買多個比自己，又怕小王子食食下唔食，我咪肥死，好在最後佢食剩半。

摯友買大地魚粉返去果邊整包雲吞。

張財記賣淡蝦醬，門口有蝦豬餅售賣。

張財記
地址：大澳吉慶街41號
營業時間：1300 - 1900

小時候去酒樓都會食沙翁，甚至經過麵包舖都會買，但而家平常都係見唔到它的踪影，所以每次入來都會食一隻。

大澳餅店
地址：大澳吉慶街66號
營業時間：1000 - 1800

係熱辣辣即炸，再碌沙糖，我要勁多糖~正！

等沙翁既時候見到狗狗，2個小朋友勁開心。

食完行前去〝銀芽橋〞有睇龍咁威既朋友應該會知我講咩！其實，正確名稱係〝新基橋5〞。

回程行返出去見到有蝦片，仲有試食，小王子食完即刻話好食，咁樣唔買唔得喇！

老公買左2包收左$30，佢原本係$20一包，真係好好人。

立即開左一包一齊食，真係好食啵！仲係早上先炸，夠新鮮。

最後一站當然唔少得去食中式甜品喇！呢間店係食傳統中式糖水。

今日店主做節收5點半，我望下錶都5點15分，佢都做埋我地生意，食緊途中再多2個人幫襯。

車站豆腐花

地址：大澳永安街57號

行返去巴士站路經〝復興行〞，大家又停低左，每人食一粒大大魚蛋先。

我見到有白色丸問係咪〝墨魚丸〞，老公和摯友都食左粒，仲話好食過大大魚蛋添。

小朋友真係好愛大大魚蛋，因為最後佢地再每人食多粒，今日2個小朋友每人食左3粒~勁丫！

2019年12月15日星期日

金沙骨 (內附食譜)

之前用光波爐都有整過，但個食譜唔知去左邊，所以今次重申研究過。

我都係星期五醃定，星期日拎去娘家氣炸，平時醃一晚都可以。

大家都話呢個好食，下次我可以係家中整。

金沙骨

材料：

金沙骨 638克

醃料：

叉燒醬 2湯匙

海鮮醬 2湯匙

糖 1茶匙

水 2湯匙

做法：

1. 金沙骨洗淨，瀝去水份。

2. 將金沙骨加入醃料內，醃過夜。

3. 用200度氣炸10分鐘。

4. 返轉200度氣炸5分鐘。

南乳雞翼 (內附食譜)

前日小王子出院就去買定星期做節既野，由於雞翼用南乳醃左幾日，我又冇擺冰箱，所以家人話咸左啲。

之前介紹左細老用韓國氣炸鍋，所以今次就用氣炸鍋整。

呢個食譜好多年前網上搵到，每次BBQ如要自己醃野食都會用它。

大家整既就唔好醃咁耐。

南乳雞翼

材料：

雞中翼 1KG

醃料：

南乳一件

砂糖 2湯匙

生抽 1湯匙

紹興酒 40ml

麻油 1茶匙

鹽半茶匙

蠔油 1湯匙

做法：

1. 雞翼洗淨，瀝去水份，放入袋中。

2. 將全部醃料拌勻加入雞翼中。

3. 並擠出袋中的空氣，盡量令食物袋呈真空狀態 (令雞翼在加壓後均勻地吸收醃料)。

4. 把袋口打結放置在冰箱中醃製一日。

5. 雞翼皮向下，用200度氣炸8分鐘。

6. 返轉200度氣炸5-10分鐘。

2019年12月14日星期六

海洋公園@K3旅行日

前日出院，今日就來學校旅行，問過牙醫係冇問題，食唔食到野係睇個人，小王子食到，但唔敢比太硬，怕整到佢傷口。

早上學校集合坐旅遊巴去〝海洋公園〞，車上有遊戲玩，個個都積極參與。

未夠10點就到達，但未入得，同陽光玩遊戲中，唔知點解每年學校旅行都熱到爆。

可以排隊入場喇！

入到去與同學仔合照先。

增取時間坐纜車去對面山先。

坐纜車好開心。

我與同學仔阿媽去左玩另腳過山車，老公就帶住佢地去睇企鵝。

小王子唔開心係我地唔批准佢餵企鵝，覺得唔值，我情原食左佢。

攬住企鵝開心到個樣。

跟住又要坐纜車返回去入口，因為1點鐘集合小朋友們要去上堂。

我地大人就有一個鐘休息，2點要回去接人。

入去威威天地視察下先

我地又坐纜車去對面山的麥當勞食lunch，已經係下午3點幾，4點又要返去對面山集口，所以同左老師講我地自己走。

小朋友想玩攤位，用左100蚊都冇收穫，但同學仔就中左。

我地又再用多100蚊，不過都係空手而回。

我地有去玩普通過山車，小王子中途驚到喊，但同學仔又冇野，去返對面山的威威天地玩，其實，海洋公園都唔啱幼稚園來，因為佢地都唔夠高玩，就算夠高又未必有膽玩。

旋轉木馬

犘天輪

覺得呢隻野好靚，夜晚又影一張。

2019年12月12日星期四

剝牙仔手術

小王子鍾意食甜野，平時阿爺湊，頻密吃渴，又少飲水，所以蛀牙問題越來越嚴重。

可以去〝牙仔的故事〞睇下手術前的資訊。

終於排到期做手術了，我都有問過點解排咁耐，因為〝香港大學先進牙醫學研究所-專科診所〞都係借〝大口環根德公爵夫人兒童醫院〞來做手術，所以要付住院費和手術費，住院費就係政府收費，而手術費就比私家平，但比政府貴。

原本係10月尾做，但老師有事，所以改期12月10號就入院、11號做手術，如冇意外12號就可以出院。點解牙醫做手術時要老師係到？我估佢地都係畢業了的牙醫，但經驗淺，所以要老師在場。

老公都有陪我地一齊來，因為地方比較隔涉，係〝大口環根德公爵夫人兒童醫院〞，加上老公擔心我肚餓，所以請左2日假，出院就只係我和小王子兩個。

醫院真的好細，得地下和一樓，而且冇飯堂，要行出去〝麥理浩復康院〞的飯堂，方圓都只係得果到有飯堂，唔好話士多，連7仔都冇。

小王子好鍾意隔離床叔叔，成日同叔叔講野，又請叔叔食野。

呢到病房，一邊男一邊女，小王子係男當然我都要留係男病房過夜，病人有大人和小朋友。

早上10要入院，護士話見完醫生和麻醉師後可以回家，明早再回來做手術，但要7點半返到，所以都係揀留院好啲，護士話咁可以出去食餐飯開心下，夜晚8點前回來就可以。

我地好早食左早餐，好在帶左啲乾糧，但都等到食晒，到下午3點幾先等到醫生來，然後又要等麻醉師，終於4點幾可以出去。

我地去左小王子最鍾意既地方〝Pokémon is Coming to Town〞，原來有搵印仔遊戲。

去詢問處拎本書仔，然後就可以去搵印仔，印滿就可以去詢問處換到貼紙，提示話印仔係時代廣場地面露天廣場、2樓及12樓，但共有8個，每層得一個，所以我就問人，記憶中印仔位置地下、2-8樓和12樓 (2-8樓其中有一層都係冇印，但忘記左)。

晚餐都唔知食咩，所以求其去左Ikea食，不過，小王子好鍾意，因為有汽水嘛！然後，再去惠康入乾糧。

老公目送我地架小巴，佢就自己回家。

半夜來叫醒飲水，因為之後禁飲食。

第二日
早上7點幾8點飲左麻醉藥，然後換衫過床，我陪佢入到手術室外，佢慢慢開始瞓，跟住我就返回病房，過左一陣就話要轉床位，老公9點幾都來到一齊等手術完成。

手術後醫生都有來同我傾幾句，而且需要回去〝香港大學先進牙醫學研究所-專科診所〞見佢，但小至子都仲未出來。

早上8點幾入手術室，到12點幾先返回病房，由於剝得太多牙，醫生想小王子瞓耐啲，所以未有咁快醒。

老公見到小王子個樣佢好心痛，但我就冇乜野，真係名符其實口腫臉腫，臉又有血，口裡面都仲流緊血，因為話血仍未凝固，仲吊緊鹽水，醒左之後要佢食野和去厠所先可以拆得。

2點幾有個醫生來睇小王子，見佢未起不停拍小王子枕頭叫佢起身，小王子睜開左眼一陣又瞓過。