抺茶馬卡龍 (內附食譜)

我好鍾意食馬卡龍，11年前整過一次，但不受歡迎要自己食晒！以為呢生人都唔會再整。

小王子出世後，有一次去食放題見到有我就order左，小王子一試愛上。

今朝7點幾起身就整到11點幾先出爐，只整左8粒咋！整都好快，最嘥時間係等風乾。

影完相小王子已食咗2粒，其餘要留返明天食，而且佢只准我食一粒。

睇下條裙仔都幾靚吖！

抺茶馬卡龍

食譜來自：精緻慕絲蛋糕

材料：8-10粒

糖霜                    32克

杏仁粉                30克

抺茶粉                3克

蛋白                    25克

糖                        35克

牛油忌廉：

糖                        20克

水                        6毫升

蛋                        25克

無鹽牛油            100克

抺茶粉                1湯匙

做法：

1.          預熱焗爐至170度。

2.          把杏仁粉、糖霜、抺茶粉一齊過篩去粗粒，備用。

3.          把蛋白用電動打蛋器打至起泡，分數次加入糖用慢速攪拌至有光澤。

4.          (好快打到有光澤，但蛋白霜的狀態與書中的相不同，所以我打到蛋白霜黏在打蛋器上是企身的)

5.          分2次輕輕拌入步驟(2)至細滑及有光澤，做成杏仁醬。

6.          把杏仁醬放入已有唧咀的唧袋內，在焗爐紙上擠約2.5厘米直徑的圓形。

7.          10分鐘後，馬卡龍表面風乾。(我用左1個鐘有多才能風乾)

8.          用170度，焗約6分鐘，降溫至150度，焗5分鐘。

牛油忌廉做法：

1.          把糖和水煮至120度。

2.          把蛋用打蛋器打至起泡，然後加入已煮滾的糖水，不停攪拌至冷卻。

3.          加入軟身無鹽牛油及綠茶粉，攪拌至完全混合。

組合：

1.          將牛油忌廉塗在馬卡龍，再蓋上另一塊馬卡龍，即成。

疫情生日@2020

今日我生日，朝早開始落雨，仲要都幾大下。

老公就安排左去食 Lunch Buffet，因為我夜晚斷食。

老公buffet book 3間酒店，最後揀左紅磡都會海逸，事關一間冇打來re-confirm，一間都未知有咩食。

尋日都會海逸打來話提早開始，因為限驟時間放寬左，夜晚buffet時間改，變相lunch都要改。

今早小王子讚我今日條裙好靚，他比爸爸還懂事

疫情我地要分枱，幸好都係旁邊，小王子話要自己一個人坐，仲話大個仔要自己出去攞野食，既然如此我就放手由他吧！

這個蛋糕居然要加$40，尋晚老公同我講，我話唔要，佢話已經比左錢。

之前未有疫情食buffet好多酒店都會送，而家咁既時勢仲要加錢，仲要個蛋糕唔好食囉！

不過，service就幾好，老公話職員拎左個蛋糕來，我唔係到，職員企係旁邊等到我回來先擺低蛋糕，然後點蠟燭。

頭先同小王子去左洗手，回來老公已拎定生蠔等我回來吃。

每次老公都會剪長腳蟹和剝蝦殼比我吃，有時佢都幾細心既，但好多時都會激死你囉！

甜品有好多款

其他食物，仲相中式款，但冇影相。

我第一碟拎就係甜品，以前會係第4或5碟先食甜品，但而家減糖斷食後，我會將甜品擺係第2碟。

今次點解會放第一，因為熱食提唔起我興趣，款式一點都不吸引。

同之前食過夜晚的質素差太遠，又可能因為疫情剛恢復buffet。

窩夫的Topping，我比突喜歡旺角的花月亭，果到有好多選擇，可以比你整到好靚。

我見小王子不停食印尼蝦片、棉花糖和杏脯肉，所以已經叫左佢叫左啲炒飯，而家再拎埋意粉就差唔多嘞！

我同老公每人一條，佢食左一啖話佢條雲呢拿個脆皮好苦，所以我同佢交換左。

最後我食番一條芒果雪條作結尾。

之後我地坐巴士過海去銅鑼灣Donki，又去掃左啲野。

既然去左銅鑼灣就去左悕慎睇〝多啦A夢〞，小王子見到好開心，立即拎佢自己部相機出來影。

其實，都唔係好多野睇，不過商場內有間賣野飲和豆沙餅，一個都要$45，有點貴。

旁邊都有間買木製既野，但我行過去睇。

商場外有間賣精品，超多人排隊，有啲貨都已售罄。

之後就打道回府了。

簡易三色擠花曲奇 (內附食譜)

 尋日整〝老爺爺乳酪蛋糕〞有蛋白剩，所以就係網上學整這款曲奇，但都未清晒蛋白。

這款曲奇真係好，唔駛用電動打蛋器。

我撈完一款曲奇，再唧，再撈另一款，又唔溶，又不用雪，焗完花紋仍在。

我將原食譜的朱古力味改為黑芝麻，因我一家三口都唔食朱古力曲奇。

我地三個都係揀飲擇食，每個人食既野都不同，咁樣就可以滿足我地麻煩既一家三口。

簡易三色擠花曲奇

食譜來自：https://www.youtube.com/watch?v=9xX6hvctv4M

牛油底霜做法：

牛油                    135g

糖粉                    50g

蛋白                    27g

雲呢拿精華        少許 (我用左雲呢拿油)

原味：加60g低筋粉

抹茶味：加54g低筋粉 及6g抹茶粉

黑芝麻味：加52g低筋粉 及8g可可粉。

唧咀：12齒，唧咀齒多，擠出來花紋會緊密一點。

裝飾：

巧克力                    100克

開心果碎                適量

杏仁碎                    適量

草莓乾                    適量

 

做法：

1.          焗爐用180度預熱。

2.          把牛油置於室溫軟化，用刮刀揉至軟滑。

3.          加入糖粉，用手動打蛋器打鬆軟、變淺黃。(約需5分鐘)

4.          蛋白，分2-3次加入，攪勻。

5.          加入雲呢拿精華，攪勻。

6.          把牛油霜分成三份，每份約重68克。

7.          分別將3種粉加入牛油霜內。

8.          將3種味曲奇一次入爐焗。

9.          用160度，焗17分鐘。

原味：

1.          將低筋麵粉篩入牛油霜內，用刮刀輕輕攪勻。

2.          將麵糊放入唧袋內，麵糊比較硬，用膠板輔助，將麵糊各前推。

3.          擠出波浪形花紋，保持手腕穩定。

黑芝麻味：

1.          將低筋麵粉篩入牛油霜內，再加入黑芝麻粉一同用刮刀輕輕攪勻。

(黑芝麻粉不用過篩，因比較粗粒)

2.          將麵糊放入唧袋內，麵糊比較硬，用膠板輔助，將麵糊各前推。

3.          擠出波浪形花紋，保持手腕穩定。

抹茶味：

1.          將低筋麵粉+抹茶粉篩入牛油霜內，用刮刀輕輕攪勻。

2.          將麵糊放入唧袋內，麵糊比較硬，用膠板輔助，將麵糊各前推。

3.          擠出波浪形花紋，保持手腕穩定。

飾面做法：

1.          用一個突深的容器放巧克力，座熱水使它溶化。

2.          把曲奇的頂部沾上巧克力醬，然後置於架上。

3.          趁巧克力還未乾透，放上杏仁碎、開心果碎和草莓乾。

老爺爺乳酪蛋糕 (內附食譜)

上次去大阪，第4日終於去左〝Rikuro老爺爺起司蛋糕〞買蛋糕，因為去咁多次都冇食過，就唔到時間去買。

上次買左後，我就每日係酒店房食蛋糕做早餐，然後出去再食早餐(我好大食)，而家疫情都唔知幾時有得去。

前年係網上見到有〝老爺爺起司蛋糕〞食譜，但食譜係可以做到6個5吋蛋糕~太多。

尋日我就終於動手做，但得我一個人食，用4.5吋模，整左一個份量。

結果失敗了，我估失敗原因係在於打蛋白。

今日我再挑戰，用2份份量做左個6吋蛋糕模~成功了。

文章最後有原食譜的份量，我的食譜內有食譜連結，但我見同老師的短片教學做法有出入，所以都係睇片。

我的經驗：

• 我唔係用固定模，所以記得要包錫紙。
• 用凍水浴法。
• 蛋糕放尾2層焗。
• 起初焗25分鐘放涼後脫模，發現中間底部不太熟，我就將蛋糕套回蛋糕模內，再入爐焗至熟。

睇下內裡組織幾靚！

老爺爺乳酪蛋糕 

食譜來自：https://www.how-living.com/p/25046/n-a

蛋黃麵糊材料：6吋~1個

北海道乳酪                75g
發酵奶油                    43.33g
鮮奶                            25g
蛋黃                            75g
低筋麵粉                    16.66g
玉米粉                        8g

蛋白霜材料：
蛋白                            93.33g
細砂糖                        50g

裝飾：
糖粉                            少許

 麵糊重：

5吋(180克)

6吋(220克-250克)

蛋黃麵糊作法：

1.  北海道乳酪、奶油、鮮奶，隔水加熱攪拌至融化，保持溫度於65-70度。

(如果量多的，溫度可能要在72度)

2.  將一半蛋黃加入，拌勻。

3.  加入過篩的低筋麵粉、玉米粉拌勻。

4.  加入剩下的蛋黃攪拌均勻。

 蛋白霜做法：

1.  糖一次加入蛋白內，快速打至5、6分發(有紋路)，轉慢速打1分鐘。

(蛋白不要打至企身，打過發)

2.  將兜邊的用刮刀攪拌，亮起來和有倒三角就可以。

(蛋白停止會自動消泡，反而攪拌就不會)

3.  蛋黃麵糊過篩，一次加入蛋白霜中先混合。(麵糊+蛋白霜最佳溫度不低於30度)

4.  將模型薄抹奶油，再倒入乳酪麵糊至6-7分滿。

5.  放入上火200度/下火130度烤箱中，以隔水加熱(水浴法)烤約30-40分鐘。

(最多可焗多5分鐘，怕唔熟可倒去水，再焗多3-5分鐘)

6.  出爐放涼，將蛋糕斜斜轉一圈，將碟蓋上倒轉，拿走蛋糕模，再倒轉，篩上糖粉裝飾。

小訣竅：

1.    使用家庭烤箱要注意水氣過多，可在烤的中途開門讓水氣透出。

2.    烤的過程注意家庭烤箱烤溫不均，適時的檢查並移動每顆模內的蛋糕。

3.    如果上層已烤出澎澎的弧形圓頂，可將水盤內的水倒掉(或將烤模挪移到烤架撤除水盤)，再多烤5分鐘。

4.    此配方一定要有分上下火的烤箱，上方的高溫可以壓制麵糊不從裡面爆開。沒有分用上下火一定會爆裂。

5.    不建議使用分離式模具，也不建議使用不沾烤模。

乳酪蛋糕失敗原因：

奶酪沉底：攪拌不均勻，溫度過低。

蛋糕表面起皺：蛋白打過發。

收腰：(a) 爐溫高，太快出爐，應還有餘溫才出爐。

(b) 蛋白打過發。

蛋糕表面裂開：(a) 爐底火過高。

                             (b) 水氣太多，可以焗到一半，每8-10分鐘打開門，可能會慢熟，

                                   但不會產生裂面。

(c) 若開始裂，可加冰水，但最好不要，因為蛋糕可能會沉澱。

高度不足：(a) 烤不熟。

(b) 自行將食譜的油、糖減去，減掉了結構。

塌陷：(a) 烤不熟。

(b) 自行將食譜的油、糖減去，減掉了結構。

*****************************************************************************

蛋黃麵糊材料：5吋~6個

北海道乳酪                225g
發酵奶油                    130g
鮮奶                            75g
蛋黃                            225g
低筋麵粉                    50g
玉米粉                        24g

蛋白霜材料：
蛋白                            280g
細砂糖                        150g

模具：5吋固定模