氣炸麵包條 (內附食譜)

老公和小王子都唔鍾意食有皮，但我覺得有皮會飽啲，而且我鍾意，所以每次都買有皮方包。

前日買左嘉頓厚身有皮方包，我就切左小王子和老公既皮留用。

之前係娘家用油整〝麵包條〞，今日在家用氣炸來整。

老公話同油炸一樣，但話糖上不到麵包條，話應該點練奶，但我見麵包條已經黏滿晒糖，老公真係鍾意甜，曲奇、蝴蝶酥又係要食好甜。

小王子都食左好多，食到好飽食唔晒，剩下既當然老公攪掂喇！

氣炸麵包條

材料：

麵包條          適量

油                 適量

糖                 適量

做法：

1.   將有邊方包去邊後留用。

2.   碟內倒油，將麵包條在油上碌，令油沾上麵包條每處。

3.   麵包條白色向上，麵包皮向下，放入氣炸鍋內。

4.   用190度氣炸5分鐘，撒上糖，即成。

迷你火腿菠蘿Pizza (內附食譜)

之前應承左小王子教佢整Pizza，今日終於對現承諾。

我對上一次整Pizza數數都十年前，都係一人份，因為老公唔鍾意食。

今次除左將材料擺係Pizza上面由我做之外，全程都由小王子做，我從旁講。

小王子搓完的麵糰十分軟，跟住我再搓幾下發現冇之前咁軟，又叫小王子搓多幾下又軟返，可能小王子的手有熱力。

第一次整就成功，小王子話好好味，果真有我既遺傳~哈哈！下次教佢整菠蘿包。

迷你火腿菠蘿Pizza

材料：5吋薄批

高筋麵粉                 18克

低筋麵粉                 33克

鹽                            1克

糖                            1克

牛油                        5克

依士                        1克

溫水                        28克

餡料：

茄醬                        適量

火腿                            半塊

菠蘿                          適量

芝士碎                     適量

做法：

1.          依士與溫水拌勻。

2.          其他材料同放盆內，之後加入依士水，再用手將所有材料攪勻。

3.          用手拉開時成薄膜狀即大功告成。

4.          盆內塗上一層薄固體菜油或溶牛油。

5.          將已搓滑的麵糰放入盆內，蓋上保鮮紙(以防表面乾硬)。

6.          將整盆麵糰放入另一個注入30℃-40℃溫水的盆內，發酵後的麵糰約成原來的2.5-3倍大。

7.          將麵糰拍扁拉闊，約5吋圓形大。

8.          放在已掃油的焗盆上，塗上茄醬，蓋上保鮮紙作最後發酵，約30分鐘。

9.          放上火腿、菠蘿，最後撤上芝士碎。

10.      放入預熱240℃焗爐，約焗12-15分鐘。

Pancake@Morinaga森永 (內附食譜)

一早係吉之島買定盒Pancake粉，預備新年假期搵日整，見今日不用出街就今日整。

老公話麻麻地，質感好似麵包，我都覺得實左啲，可能我技術未到家。

雖然唔識日文，但都估到點整，我煎左3塊都黏鑊，已經用易潔，後來用廚房紙掃層薄薄既油，又唔黏鑊又煎得靚，不過食物本質都係冇變。

包裝盒有食譜教整Pancake和蛋糕，一盒有2包Pancake粉，另一包下次用來做蛋糕。

Pancake@Morinaga森永

材料：

森永Pancake粉        一包

蛋                                一隻

牛奶                            100毫升

做法：

1.          蛋、牛奶攪勻。

2.          加入Pancake粉輕手攪勻。

3.          中火燒熱鑊，之後轉小火。

4.          鑊掃上層薄油，將50毫升份量粉漿距離鑊高約30cm倒下。

5.          用小火煎3分鐘，返轉煎2分鐘。

藍莓焗芝士餅 (內附食譜)

今日大年初一，早上去老爺家拜年，跟住就回娘家。

上星期幫老公整〝檸檬芝士凍餅〞有材料剩，尋日整左個〝藍莓焗芝士餅〞，同場加映3.6北海道牛奶布甸，拿回娘家做飯後甜品。

平時整〝藍莓焗原味芝士餅〞係用350克忌廉芝士，但我得250克，所以就換算一下，得出以下份量。

藍莓焗芝士餅

        

消化底材料：(6吋)

無鹽牛油 (溶液)            25克

消化餅                            4塊(60克)

做法：

1.          消化餅壓碎，加入牛油溶液撈勻。

2.          倒入蛋糕模內壓平，放入雪櫃。

芝 士 餡 材 料 :  

忌廉芝士 (室温)      250 g 

砂糖                        54 g 

無鹽牛油 (座熱)      47 g  

雞蛋                        71 g

淡忌廉                    32 g  

餅 面 材 料 : 

藍莓醬 57- 72 g  / 生果 ~ 少許裝飾

做 法 :   

(1)      放入忌廉芝士 + 砂糖在缸內用 (1号速) 打 2-3 分鐘打至軟身。

(2)      放入雞蛋 (分2次加入) 攪拌均，刮下紅邊芝士漿。

(3)      停機 ..... 加入淡忌廉 (拌勻) ~ 用 (1号速) 打至軟身 。

(4)      加入已預先預熱牛油溶液後 (慢慢拌勻) 。

(5)      將芝中漿倒入模圈內，再放入焗盤上 ( 焗盤上再注入少許熱水 ) 。

(6)      焗爐焗 180-200 度火 / 40-45 分鐘至芝士餅發起及餅邊變成棕色。

(7)      從焗爐取出蛋糕，放涼大約 15-30 分鐘後脫模。

(8)      將藍莓醬塗在芝士蛋糕中央 ，待凉後即可玖入雪櫃雪凍後切件食~更佳 。

檸檬芝士凍餅 (內附食譜)

今年老公係公司Annual Dinner抽中左部〝Switch〞，佢order我幫佢整3個芝士蛋糕，但唔要焗，我比左幾款佢揀，佢就揀左呢款。

星期五家長日後去買材料，星期六整，今日甩模，明天老公就拿回公司。

好在我剛好有3個慕絲圈，不用整完一個又洗又等乾又整，我分3個盤打淡忌廉，就可以一氣呵成。

由於太耐冇整，第一個蛋糕表面唔平滑，之後既好好多。

我都有好多蛋糕盒，但老公專登買扁身又可以接疊高既，可以一袋過裝晒三個，男人係唔鍾意一袋二袋。

檸檬芝士凍餅

餅底材料：6吋
消化餅 碎       4塊(60克)

牛油溶液        25克

1.      將牛油溶液加入餅碎拌勻，再倒入模中，平均壓實，然後放入雪櫃雪至凝固。

芝士饀材料：
淡忌廉            200克
忌廉芝士        250克(預早放在室溫解凍)
白砂糖            80克
檸檬青            1個
檸檬汁            半個
魚膠片            11克

做法:

1.      淡忌廉用電動打蛋機打至七成企身，放回雪櫃備用。

2.      忌廉芝士加入白砂糖，用電動打蛋機打至滑身。

3.      將檸檬青及檸檬汁分幾次加入芝士中拌勻。

4.      魚膠片加入水中座熱水座溶。

5.      取出淡忌廉，分幾次加入檸檬芝士饀中拌勻。

6.      將魚膠水加入少少檸檬饀攪勻，然後倒入檸檬饀中快手拌勻。

7.      將饀倒入模中雪至少3-4小時。

8.      脫模，食得。

自家燒吧

今日小王子家長日，去完學校就同佢去食lunch，就去上返星期五和舊同事食lunch BBQ，果到有小王子喜歡食的東西。

上到去一出左邊就係〝自家燒吧〞，呢間係任飲任食，有限時，門口有個價目表。

自家燒吧
電話：2338 1820 / 5409 6668 (WhatsApp)
地址：觀塘開源道62號駱駝漆大廈1座5樓C號舖
營業時間：1200 - 2300

入門口左邊就有氣水、雪糕任飲任食。

有熟食和頭盤

小王子食得幾開心

呢區BBQ既食物

放在爐上自己轉，熟左就食得

仲有order紙，有3張免費，有3張就要付費。

焗蠔轉左扇貝，焗得好好食，炒飯都好食。

頭先店員話小王食食肉就請佢食出面雪櫃冇既雪糕，店員話同代理傾緊價錢，希望成功，真係幾好味。

Switch

今日老公公司Annual Dinner，例牌有抽獎，老公影左啲獎品比我睇，我立即覆佢，如果你抽到部Switch就好喇！

小王子勁想買Switch，不過，我和老公都覺得冇咩好玩，加上家中已有部Wii，雖則係舊，但都叫有部機玩，而且我地放假先比佢玩，加上放假通常都出左街，所以都好少玩。

夜晚9點幾收到老公what's app張相係老公領獎，佢真係抽中左部Switch！

原本我和小王子係床到預備瞓，小王子知道消息立即戀下戀下，我問係咪想等埋爸爸先瞓丫！佢當然點頭喇！老公回來小王子又攬又讚，真係現實。

白味噌雞下脾 (內附食譜)

上次行吉之島見到日本白味噌，心想試下買來醃雞下脾，應該都方便。

尋日就醃定，今日來氣炸，味道甜甜地，不是太濃，唔錯丫！

白味噌雞下脾

材料：

雞下脾              546克 (4隻)

調味料：

白味噌              2湯匙

糖                      2湯匙

味醂                  2湯匙

水                      1湯匙

做法：

1.          雞下脾洗淨瀝去水份。

2.          加入調味料醃過夜。

3.          用185度氣炸10分鐘。

4.          返轉用200度氣炸5分鐘。

5.          再返轉用180度氣炸5分鐘，即成。