黑糖軟蛋糕 (內附食譜)

今日整左〝花生醬雪芳蛋糕〞，開左盒奶唔想嘥，所以整埋〝黑糖軟蛋糕〞，真係名付其實~軟，如果用大size既紙模效果會更好。   

我將麵糊倒入紙模約9乘高，所以出來粒粒都脹卜卜架！仲有我用左2個紙模，所以個樣就靚仔D嘞！

黑糖軟蛋糕

食譜來自：自家製曲奇小蛋糕~Home-make Cookies & Petit Cakes

材料：(份量約20-25個)

蛋黃                   2隻

黑糖                   10克

牛奶                   10克

橄欖油               10克

低筋麵粉           35克

粟粉                   5克

蛋白                   2隻

砂糖                   20克

做法：

1.         先以180度預熱焗爐。

2.         將10克黑糖加入蛋黃以手動打蛋器攪拌均勻，再倒入牛奶及橄欖油攪勻。

3.         將已過篩的麵粉及粟粉加入蛋黃糊內攪勻備用。

4.         將蛋白打王起泡後將20克砂糖分次加入，打至濕性發泡，成潔白而光滑，用打蛋器勾起來是細長尖峰的樣子，尾巴灣曲，用膠刮刀分出1/3蛋白放入蛋黃內混合拌勻。

5.         再將蛋黃糊分2-3次倒入蛋白糊內以膠刮刀快手拌勻，用匙逐少將麵糊放入紙杯內約8乘滿高度。

6.         以180度焗約15-20分鐘取出放涼便成。

小貼士：

l  可用一些鋼撻模或入爐膠模盛著，焗出來的成品外型不會變形。最好選購一些質量較好的黑糖，出來成品的味道會更可口。

花生醬雪芳蛋糕 (內附食譜)

 

我見盎花生醬就到期，所以整左個〝花生醬雪芳蛋糕〞，不過，係整既時候烏龍百出。    

• 我整到發現點解橄欖油仲係度既？原來我落漏左，唯有加埋落去倒入紙模內。  
• 蛋黃糊倒入蛋白內忘記要快手拌勻。  
• 要輕輕拍數下將麵糊內的空氣拍出，我又忘記左。  
• 放涼時又忘記倒扣。  

我已試食左，咬落去有D彈牙，內裡就軟，但蛋糕唔應該彈牙架嘛！不論整或焗既時候蛋糕都係好香花生醬味，若果唔係我出錯，應該會好好。之後我又整多款蛋糕，就係〝黑糖軟蛋糕〞。

花生醬雪芳蛋糕

食譜來自：自家製手工蛋糕~Hand-made Cake

材料：(2個4吋空心雪紡模或任何紙模)

蛋黃                   2隻

砂糖                   20克

橄欖油               10克

牛奶                   30克

花生醬               30克

低筋麵粉           30克

粟粉                   10克

泡打粉               1克

蛋白                   2隻

砂糖                   20克

做法：

1.         先以170度預熱焗爐。

2.         將20克砂糖加入蛋黃以手牞打蛋器攪拌均勻。

3.         將花生醬與牛奶加熱混合，稍涼後與油倒入蛋糊拌勻。

4.         將已過篩的粉類加入蛋黃糊內攪勻備用。

5.         將蛋白打至起泡後將20克砂糖分次加入，打至濕性發泡，成潔白而光滑，用打蛋器勾起來是細長尖峰的樣子，尾巴灣曲，用膠刮刀分出1/3蛋白放入蛋黃內混合拌勻。

6.         再將蛋黃糊分2-3次倒入蛋白糊內以膠刮刀快手拌勻。

7.         再倒入模具內約8乘高度。輕輕指數下將麵糊內的空氣拍出。

8.         入爐以170度焗約20-25分鐘。焗好尿出倒扣待涼便可。

小貼士：

l  用有花生粒的花生醬會更好。

香蕉糕 (內附食譜)

我鍾意食〝香蕉糕〞，呢個食譜我已想試好耐。近排成日想整野，但又冇乜心情，可能唔多想拎D用具出來，覺得好煩，所以今日我就整左好簡單既〝香蕉糕〞來醫下手癢先。

   

我係和暖既時候食左一條，覺得唔夠甜，凍左之後又吃多條睇下點，凍左真係甜D啵！但下次整應該可以加多D糖，不過，要等其他人試左先決定。   

我整左23條，已經分拆上市，接頭既有面屋、娘家，我仲預留左D，明天送比開心果姐姐，希望佢地鍾意喇！咁我就可以收集多D意見。老公好似唔鍾意吃，但至少都要吃一件。   

家人品嚐過都話OK，而甜夠足夠，所以下次糖都不用加或減，不過，老公就食到嘔，唔係講笑係真架！唔係我整得唔好吃，係因為佢唔鍾意果種味。

香蕉糕

 

材料：(23條，正方形模：20.5cm x 20.5cm，長3吋闊1吋~長形)

糯米粉                    200g

粘米粉                    85g

砂糖                        150g

溫水                        265g

香蕉油                    1 1/2湯匙

糕粉 / 熟糯米粉    適量

 

做法：

1)     將粉類過篩，其加入砂糖混合。

2)     加入暖水攪拌，並加入香蕉油。

3)     把己混合好的糊倒入已掃油的模中，用中大火隔水蒸15分鐘。

4)     熟後取出香蕉糕，其切成條型，趁熱沾上熟糯米粉。

 

備註：

l  熟糯米~可以用白鑊將糯米粉炒至金黃色即成。

菠蘿果醬包 (內附食譜)

之前係〝Taste〞食過〝菠蘿果醬包〞幾得意，之後再去買職員話以後都唔出，唔出咁我就自己整喇！但想左好耐，都未動手。   

尋晚諗住今日就整〝菠蘿果醬包〞，老公應承會幫我用電動打蛋器搓麵糰，但去完街回來就瞓覺，足知都係自己搓返。   其實，做法都係與〝菠蘿包〞一樣，只不過多左少少功夫，搽幾多菠蘿果醬係隨意，最緊要唔好多到漏餡喇！     

我唔知係咪〝乾依士〞開得太耐，所以係2次醱酵都唔係好醱，但係焗爐焗既時候就有醱大，我諗都係要買過〝乾依士〞，唔係怕下次嘥心機。奶粉都冇乜要買，不過，附近烘焙專門店冇得買，又要搵日去〝荃灣〞一趟。

菠蘿果醬包

材料：(約8-9個)

高筋麵粉                   200克

砂糖                          40克

奶粉                          6茶匙

吉士粉                       6克

依士                          3克

溫水                          100克

牛油                          20克

蛋                              30克

 

餡料：

菠蘿果醬                   適量

 

菠蘿皮材料：(約8-9個)

砂糖                          45克

食用臭粉                   0.5克

梳打粉                       0.5克

麵粉                          100克

奶粉                          2茶匙

固體菜油                   55克

蛋                              4克 (約1茶匙)

淡奶                          5克 (約1茶匙)

檸檬黃色素               少許（可以不加）

菠蘿皮做法：

食用臭粉、砂糖、梳打粉先拌勻，然後加入其餘材料攪勻便成。

做法：

1)      依士與溫水拌勻。

2)      其他材料同放盆內，之後加入依士水，再用手將所有材料攪勻。

3)      將麵糰倒出放在桌上，用手推開麵糰。

4)      將麵糰對摺(令麵糰產生筋性)或用力敲摔麵糰。

5)      再對摺至有筋性及不黏手。

6)      測試麵糰：搓至麵糰表面光滑，用手拉開時成薄膜狀即大功告成。

7)      盆內塗上一層薄固體菜油或溶牛油。

8)      將已搓滑的麵糰放入盆內，蓋上保鮮紙(以防表面乾硬)。

9)      將整盆麵糰放入另一個注入30℃-40℃溫水的盆內，發酵後的麵糰約成原來的2.5-3倍大。

10)    手指測試法：把手指插入根粉中，再將手指慢慢插入已發大的麵糰中，然後取起手指。

11)    若手指離開後麵糰仍留有手指形空隙，即表示第一次發酵完成。

12)    將麵糰分割成8等份，然後將每一個麵糰再分割1/3。

13)    將每份麵糰輕輕拉長 (摺兩摺)，然後用保鮮紙包好麵糰，鬆弛10分鐘。

14)    將麵糰放桌上打圈滾圓，把空氣擠出，搓成表面光滑結實的球形。

15)    將分割出來的1/3麵糰用木棍輾薄，然後搽上菠蘿困果醬，再包住滾圓既麵糰，收口向下。

16)    放在已掃油的焗盆上，蓋上保鮮紙作最後發酵，約30分鐘。

17)    發酵完成後，麵糰約2-2.5倍大，掃上蛋液。

18)    鋪一塊保鮮紙在桌上，放上一份菠蘿皮。

19)    將菠蘿皮用手壓扁至麵糰大小。

20)    將菠蘿皮輕輕放在麵糰上。

21)    掃上蛋液，用牙籤界上格仔花紋，放入預熱200-210度焗爐，約焗15-17分鐘。

士多啤利醬曲奇蛋糕 (內附食譜)

今日出完街百無聊賴有D手癢，而且之前買左舊Cream Cheese未用晒，所以我就係我食譜庫內搵到呢個食譜。

原食譜話可以做到9個，不過，冇講咩size，而我就做到直徑4.5cm~19個。   

我：覺得一般，我諗係個表面脆，所以就叫〝曲奇蛋糕〞，我喜歡吃個面。 

老公：OK~不過，有D苦。   

我唔覺得苦，老公食飽晚餐，都食幾個，咁有幾苦呢？

士多啤利醬曲芝士奇蛋糕

 

材料： (直徑4.5cm~19個份量)

低筋麵粉      175 g 

牛油           115 g

糖粉          130 g

士多啤利醬   40 g

忌廉芝士    70 g 

全蛋          120g

奶粉           25 g 

 

做法：

1)  低筋麵粉及奶粉過篩備用。

2)  牛油和忌廉芝士打至軟身，加入糖粉打至鬆發。

3)  將士多啤利醬加入牛油內打勻。

4)  然後將全蛋遂小加入已打好之牛油內，拌至光滑。

5)  最後加入己過篩之低筋麵粉及奶粉。

6)  將粉漿倒入焗杯。

7)  以上200度焗20分鐘。(若表面唔夠金黃，再開上火焗至金黃)

煎漢堡扒~阿蘇 (內附食譜)

 之前我已整過一次煎漢堡扒~〝老公一句〝漢堡包〞〞，但係肥豬肉唔夠。

今次我就用全肥豬肉，就唔〝鞋〞勒！   我係跟阿蘇整架！

阿蘇從來都係冇份量，但今次材料有份量，不過，獻汁用料，冇份量，所以我都係跟我個人既口味調教，可以隨意加減。

煎漢堡扒~阿蘇

材料：

免治牛肉                 1/2斤=302克

豬肉 (肥)                4兩=151克

洋蔥                         1個

醃料：

老抽

生抽

糖

生粉

水

油

胡椒粉

獻汁：

蠔油                         1/2湯匙

老抽                         1/2茶匙

喼汁                         1茶匙

糖                             1湯匙

水                             3茶匙

生粉                         1/2茶匙

生抽                         1茶匙

胡椒粉                     少許

麻油                         少許

做法：

1.         牛肉和豬肉用醃料醃至鬆軟。(醃肉過程中加入少許水能使其更鬆軟)

2.         將洋蔥切粒。

3.         用洋將洋蔥爆香，加入少許糖及老抽兜勻，鏟起。

4.         將洋蔥加入已醃好的牛肉與豬肉中拌勻，再搓成圓球狀。

5.         用大火煎香至兩面金黃，鏟起。(不能煮至半熟，因為肉含豬肉)

6.         將獻汁落鑊，加入漢堡扒回鑊，蓋上鑊蓋至熟即成。