全麥蛋糕杯 (內附食譜)

今日無聊又想整蛋糕，就翻書看，睇到〝全麥蛋糕杯〞，望下材料要用〝全麥粉〞，咁就啱喇！可以清埋我既存貨，剛好用晒！不過，我無用餅乾條，而且只係用小蛋糕紙模，因為我費事買，買左又唔知要幾耐先用完，再係咁就快冇位擺。     

我用牙籤拮下睇下熟未，已感覺到內裡組織好空，覺得食左就會好似陣風咁無左，我諗係因為用麵粉少既關係。我吃左兩個，咬落好似食緊煙靭既脆米咁，唔知係咪〝全麥粉〞，所以我覺得有D鹹。   

我就一般喜歡，但可能有知音人，所以都寫個食譜出來，與大家分享。

全麥蛋糕杯

食諳來自：自家製曲奇小蛋糕~Home-made Cookies & Petit Cakes

材料：(份量5-6個)

蛋黃                   2隻

砂糖                   10克

牛奶                   30克

橄欖油               20克

低筋麵粉           15克

泡打粉               3克

全麥粉               35克

餅條                   適量 (可以不用)

蛋白                   2隻

砂糖                   30克

做法：

1.         先以170度預熱焗爐。

2.         將10克砂糖加入蛋黃以手動打蛋器攪拌均勻，再倒入牛奶及橄欖油攪勻。

3.         將已篩過的麵粉、泡打粉及全麥粉加入蛋黃糊內攪勻備用。

4.         蛋白打至起泡後將30克砂糖分次加入繼續打至挺身，用膠刮刀分出1/3蛋白糊放入蛋黃糊內混合拌勻。

5.         再將蛋黃糊弟2-3次倒入蛋白糊內以膠刮刀快手拌勻，用匙逐小將麵糊放入紙杯內約8乘滿高求。最後插入餅條於麵糊內。

6.         以170度焗約20分鐘取出放涼便成。

小貼士：

l  為放便餅條豎立，最好用質料較堅挺的紙杯。

輕盈莎莉蛋糕 (內附食譜)

尋日整〝榛果曲奇〞要用鮮奶，但又只係用少少，我又唔飲奶，而老公又話唔想飲，打後2日又去左露營，我又唔想嘥，所以不斷翻閱蛋糕書。

我搵到呢個〝輕盈莎莉蛋糕〞，食譜係用低脂奶，咁我當然用全脂喇！   我為左要盡量用晒D奶，就整左double份量，我冇4吋長方模，就用左係〝吉之島〞買既錫紙模〝18cmX15.5cmX4.5cm〞做左2個，平時我唔捨得用架！因為唔係成日有得買，星期日見到有入左貨。   

今次不用半個鐘就完成，我諗住比一個阿媽拿回公司吃，但咁晏阿媽返左工，咁就請一個比F先生一家吃喇！一個比阿婆吃。我未試食，而且未有相，因為出爐後要倒扣放涼，又要聞回去湊阿B，所以相留待回娘家先影。頭先用牙籤測試熟未時，我都試過味~唔錯。    

唔知點解倒扣完放涼，個蛋糕會縮左少少，好肉酸。第一次幅相係我今日第二次整架！試左意見就決定整多個明天拎去露營。第二次比第一次靚好多，又爆得靚D，又發得大D。頭先我聽完F先生既意見，就急不及試食。  

F先生：好味，鬆軟，但都係有少少實。 

我：甜度適中，鬆軟，好香蛋味。

輕盈莎莉蛋糕

食譜來自：自家製手工蛋糕 Hand-made Cake

材料：(2個4吋長方模或錫紙模18cmX15.5cmX4.5cm~1個)

蛋黃                               2隻

低脂牛奶                       40克 (我用全脂奶)

砂糖                               20克

粟粉                               10克

橄欖油                           10克

泡打粉                           1克

低筋麵粉                       50克

鹽                                   1克

蛋白                               2隻

砂糖                               15克

果醬 (唧面用)              少許 (可以不用)                              

做法：

1.         先以170度預熱焗爐。

2.         將20克砂糖及鹽加入蛋黃以手牞打蛋器攪拌均勻。

3.         再倒入油及牛奶拌勻。

4.         將已過篩的粉類加入蛋黃糊內攪勻備用。

5.         將蛋白打至起泡後將15克砂糖分次加入繼續打至挺身，用膠刮刀分出1/3蛋白放入蛋黃內混合拌勻。

6.         再將蛋黃糊分2-3次倒入蛋白糊內以膠刮刀快手拌勻，再倒入模具內約8乘高度，輕輕拍數下將麵糊內的空氣拍出。

7.         果醬放入小唧袋在麵糊中間唧一行直線，以170度焗約30分鐘。

8.         焗好取出倒扣待涼便可。

小貼士：

l  唧上果醬是可以令蛋糕烘焗時做出較直美觀的裂痕，可用任何味道的果醬外亦可用乳酪代替。

洋蔥腸仔包 (內附食譜)

 

延續尋日整包心情，所以今日又再整，送左阿B返學行路返歸時，又煩緊整咩包好呢？諗起〝Blog友仔~GRACE〞前2日整扭花腸仔包，而我有本麵包書又有類似既野，好咁就整腸仔包喇！但要去買包腸仔先。   

我再望下本書，還欠一樣野唔整得，我都唔理咁多發左個麵糰先，我邊搓邊諗，尋日有洋蔥剩，又開左支沙律醬，而雪櫃又有包芝士碎就到期，種種野加埋就諗到呢款包。   

今次我將溫水加多10克，個麵糰比尋日既軟好多，試過味若然OK既話，以後就跟跟這配方。焗緊時有好香芝士味，但我都係要明天先吃，呢個仲heavy過尋日既〝吞拿魚包〞，我留低左2個for我與老公既，其餘7個一陣接左阿B後，就送晒去論阿媽與佢既同事吃，希望唔會失禮喇！食評就要遲D先寫喇！   

老公：OK，好食。(15/11) 

我：隔左一日仲好香，餡都係唔多夠，但都好好味。(15/11) 

阿媽：整得好食過以前既麵包，好軟熟，尋日食左一個，今日食左2個都好味，仲軟軟地。(15/11)

洋蔥腸仔包

麵糰材料：(約8-9個)

高筋麵粉                 200克

砂糖                           30克

奶粉                         6克

依士                         3克

溫水                         50克

牛油                         25克

蛋                             30克

鹽                             1克

 

裝飾材料：

芝士碎                        適量

 

湯種材料：

高筋粉                     15克

滾水                         70克

 

湯種做法：

1.        將滾水加入高筋粉內攪勻便成。

 

洋蔥腸仔餡材料：

腸仔                                           4條

洋蔥粒                                   31克

沙律醬                                   25克

 

做法：

1.     將腸仔和洋蔥切粒，再用沙律醬撈勻便成。

 

麵糰做法：

1)          磅好材料，依士與溫水拌勻。

2)          其他材料同放盆內，之後加入依士水。

3)          再搓至有筋性、不黏手，用手拉開時成薄膜狀即大功告成。

4)          盆內塗上一層薄固體菜油或溶牛油。

5)          將已搓滑的麵糰放入盆內，蓋上保鮮紙(以防表面乾硬)。

6)          將整盆麵糰放入，另一個注入30℃-40℃溫水的盆內，發酵後的麵糰約成原來的2.5-3倍大。

7)          手指測試法：把手指插入根粉中，再將手指慢慢插入已發大的麵糰中，然後取起手指。

8)          若手指離開後麵糰仍留有手指形空隙，即表示第一次發酵完成。

9)          將麵糰分割成9等份，每個麵糰約46克。

10)       將每份麵糰輕輕拉長 (摺兩摺)，然後用保鮮紙包好麵糰，鬆弛10分鐘。

11)       將麵糰放桌上打圈滾圓成球形，再整形，放在紙模上。

12)       用手輕壓麵糰中央，使其凹陷。

13)       然後掃上蛋液，加入部份沙律腸仔餡。(蛋液作用黏住餡料)

14)       蓋上保鮮紙作最後發酵，約30分鐘。

15)       加上剩下的沙律腸仔餡，然後掃上蛋液，灑上芝士碎。

16)       放入預熱190℃焗爐，焗12-15分鐘或包包表面金黃色就完成。

 

心得：

我在加入餡料時，發現餡料預得太多，但最後發酵完成後，麵糰發大左又發現餡料不夠，包面不好看，所以發酵未完成不要將多餘的餡料倒去，待發酵後再加，餡料應該剛好用完。其實，餡料份量隨個人喜好，可以不跟足的。

吞拿魚包 (內附食譜)

今日想整包，但又諗唔到整乜？因為整過又唔想再整，拎D書睇下先！左睇睇右睇睇，我係〝專業麵包製作〞見到〝吞拿魚包〞，而我又買左罐吞拿魚好耐，好就整〝吞拿魚包〞喇！不過，麵包和餡料我自行修改過，因為加左湯種，所以某D份量要更改作配合。   

唉~個餡要用咁多吞拿魚~唔夠添，咁整多款包喇！再睇下原來砂糖都唔夠，唯有即刻落街買，順手買多罐吞拿魚，去左〝惠康〞拎左糖，就搵吞拿魚，但望極都唔見，唔係咁邪丫嘛！唔憤氣再搵多次，吖~有喇！   

呢款紙模我都係用過一次，因為太大唔可以一次過拎麵包去醱酵，但今日比我醒起D野，平時食完Pizza Hut，我會洗淨果D膠托，然後收埋以備不時之需，今次膠托就大派用場喇！  

   

我整左9個包，分左4個比F先生一家，我趁阿媽吃時，淺嚐左一啖，覺得餡唔夠沙律醬，下次加多D先。我明天先試，諗住當早餐可以多D時間消耗，又可以慳返早餐錢，但唔知仲軟唔軟呢？   

阿公：好味。 

阿媽：吃左少少吞拿魚餡，然後棄掉，因為佢唔吃吞拿魚，個包好軟熟。 

娣婦：沙律醬唔夠，輕輕加多少少就Perfect，但洋蔥好香加埋吞拿魚好味，麵包軟熟，整體都係好味。 

我：雖然隔左一日吃個包都仲係軟熟，當然係冇尋日咁好喇！食落見D沙律醬冇撈既時候咁多，我諗係個包吸左D。(Updated on 14/11)

吞拿魚包

麵糰材料：(約8-9個)

高筋麵粉                 200克

砂糖                         30克

奶粉                         6克

依士                         3克

溫水                         40克

牛油                         25克

蛋                             30克

鹽                             1克

湯種材料：

高筋粉                     15克

滾水                         70克

湯種做法：

將滾水加入高筋粉內攪勻便成。

吞拿魚餡材料：

吞拿魚 (B&F@140克))      2罐

洋蔥粒                                    80克

沙律醬                                    100克

黑椒碎                                    少許

什香草                                    少許

做法：

1.         吞拿魚隔去水或油，與其他材料拌勻便成。

麵糰做法：

1)          磅好材料，依士與溫水拌勻。

2)          其他材料同放盆內，之後加入依士水。

3)          再搓至有筋性、不黏手，用手拉開時成薄膜狀即大功告成。

4)          盆內塗上一層薄固體菜油或溶牛油。

5)          將已搓滑的麵糰放入盆內，蓋上保鮮紙(以防表面乾硬)。

6)          將整盆麵糰放入，另一個注入30℃-40℃溫水的盆內，發酵後的麵糰約成原來的2.5-3倍大。

7)          手指測試法：把手指插入根粉中，再將手指慢慢插入已發大的麵糰中，然後取起手指。

8)          若手指離開後麵糰仍留有手指形空隙，即表示第一次發酵完成。

9)          將麵糰分割成9等份，每個麵糰約45克。

10)       將每份麵糰輕輕拉長 (摺兩摺)，然後用保鮮紙包好麵糰，鬆弛10分鐘。

11)       將麵糰壓扁，放適量吞拿魚餡(約48克)於麵糰中。

12)       然後好似包湯圓般，收口向下。

13)       放在已掃油的焗盆上，蓋上保鮮紙作最後發酵，約30分鐘。

14)       發酵完成後，麵糰約2-2.5倍大，掃上蛋液。

15)       掃上蛋液，放入預熱190度焗爐，約焗15分鐘。

蛋白燉鮮奶 (內附食譜)

尋日整左〝冰花鮮奶燉蛋〞比老公，原來老公係唔吃的，明明記得老公係街有吃過格！佢話從來只吃〝蛋白燉鮮奶〞的，真係失敗咁都記錯。既然係咁我就努力搵下〝蛋白燉鮮奶〞既食譜，我搵到〝大蚊~蛋白燉鮮奶〞。  

頭先跟住整，我將份量修改過整左2碗，因為我想用晒一盒鮮奶，加上得老公一個食，整得多就嘥。而家放左係雪櫃，等老公回來就有冰凍〝蛋白燉鮮奶〞吃。   

後記：老公話唔好吃，唔夠甜，尋日見佢話〝冰花鮮奶燉蛋〞甜，所以我將糖減左D，我諗呢D野熱食會好好多，唔得下次我要跟足再整。

蛋白燉鮮奶

食譜來自：大蚊~蛋白燉鮮奶  

材料：(2碗)  

蛋白                         2個  

鮮奶                       236ml  

糖                           1/2湯匙  

做法：  

1.       把糖加入鮮奶，座暖水使糖溶。  

2.       用叉把蛋白打發至流水狀，略為起泡，然後過篩。  

3.       將(1)和(2)混合，倒進碗內。  

4.       用錫紙封面，中火燉8-10分鐘享用。 (我燉左10分鐘)

冰花鮮奶燉蛋 (內附食譜)

記得阿B仲係娣婦肚內時，我常整〝冰花鮮奶燉蛋〞、〝薑汁撞奶〞給娣娣吃，我希望食左對大人和小朋友都好。   

我成日都想食完飯，就比碗甜品老公吃，希望值此可以養肥佢，但老公成日都放咁夜，所以一直都冇機會。   

今日晏晝老公來電話可能會7點放，我就此機會整〝冰花鮮奶燉蛋〞比佢吃，我蒸完放涼後，就放入雪櫃，因為老公鍾意凍食。   

之前係用冰糖，但上次整〝沙嗲醬〞買左原蔗冰糖未用完，我就用此整，所以燉蛋顏色與平時有所不同。我用以下既食譜一半份量整，因為我唔鍾意食，而且我改左少少原食譜做法。   

後記：晚上吃完飯就拎比老公品嚐，點知衰佬話唔食〝燉蛋〞，佢係食〝燉奶〞，佢都食左一半，另一半倒左,因為我從小就唔吃燉蛋，一食我就會喊。老公話甜，我忘記凍食係會甜D，所以下次要將糖稍減。   

老公喜歡的龍貓巴士都話要食丫！仲要飛撲埋去添啵！有相為証架！

冰花鮮奶燉蛋

 

材料：(二人用)

維記高鈣低脂奶           236毫升(一盒)

新鮮雞                          蛋兩隻

水                                   1/2杯

冰糖                               4安士 (我改用：原蔗冰糖)

 

做法：

1.     將冰糖加水煮溶，待用。 

2.     在兩個中碗內塗上食油待用。 

3.     先打勻雞蛋，加入冰糖水、牛奶，拌勻，用茶隔過濾，放置一旁，直至泡沬全消。 

4.     將以上材料倒入碗內，用牛油紙(或錫紙)把碗蓋好，以中火隔水蒸20分鐘即成。

貼士：

l  雪凍左會甜D，所以若然凍食，可以將冰糖份量減少。