意大利芝士蛋糕 Tiramisu (內附食譜)

今日與YY慶祝生日，佢同我一樣都好鍾意食芝士，所以就整〝Tiramisu〞喇！   

我第一次整蛋糕就係Tiramisu，果次係為高達生日而整，幾年又再整一次。   平時食譜要用〝意大利軟芝士〞，我都係用忌廉芝士，但今次我係用貴野。   

食譜我係〝美味DIY〞搵到〝http://www.rthk.org.hk/elearning/dessert/cake_tiramisu.htm〞。   

我用消化餅底，而原食譜就用海綿蛋糕整兩層。   打蛋時打極都唔得，就睇短片，點知原來食譜有好多要點都冇左。   

睇完先知忌廉打得企身左，蛋又打唔到佢講既效果，但我都唔埋雪左先算。   

大家都話好滑，滑到好似豆腐咁，我諗若果唔係出左錯，應該會更好。     

意大利芝士蛋糕 Tiramisu  

餅底材料：6吋蛋糕模 / 1磅  

消化餅 (輾碎)                                         4塊  

牛油 (隔熱水座溶)                                        25克  

材料：  

意大利軟芝士 (Mascarpone Cheese)        100克  

砂糖                                                                30克  

雞蛋                                                               1隻  

淡忌廉                                                            140克  

魚膠片 /  粉                                                  7克  

裝飾：  

谷古粉 (Cocoa Powder)                                 適量  

做法：  

1.           消化餅碎、牛油溶液混合，於蛋糕模內壓實成蛋糕餅底。  

2.           忌廉打起備用。 (好似軟雪糕狀就可以)  

3.           蛋、糖打至奶白色備用。(用熱水座住打，蛋熱就要離開熱水，繼續打)  

4.           魚膠隔水溶，加入少 量蛋漿攪勻。  

5.           Mascarpone芝士加進餘下的蛋漿中攪勻，再加入忌廉攪勻。  

6.           重新攪勻魚膠蛋漿，加進 (5)中攪勻。  

7.           放進冰箱下層3小時，冷凍後蛋糕面灑上谷古粉即成。

豆腐乳酪芝士餅 (內附食譜)

尋晚放工買野炒烏冬，再去買蛋糕材料，煮完飯就開始動工。   

這個食譜我係〝頭條日報〞剪下的，但覺得做法有點怪。   

後來我就問迪迪媽拎左另一款食譜，但買唔到意大利軟芝士。   

雖然怪都要照整喇！估唔到味道都唔錯。   

CoolMan個囝囝差不多吃了一件，而同屋住兩個囡都添食左一件。   

放心這是6吋蛋糕，十幾人分都唔係太大件，所以都唔會吃得太多。 

豆腐乳酪芝士餅  

食譜來自：新手學甜點  

材料：  

消化餅            60克  

牛油溶液                  25克

玉桂粉                    1/2匙 (我無用)  

忌廉芝士            200克  

有機豆腐                   200克  

原味乳酪                  120克  

砂糖                          50克  

魚膠片                  7克  

做法：  

1.       置芝士於室溫1小時。沿15厘米慕絲模內圍上一條膠條。豆腐出水備用。  

2.       將消化餅壓成粉末，與玉桂粉及牛油溶液拌勻，放入慕絲模內壓平。  

3.       把忌廉芝士與砂糖以慢速打滑。  

4.       將魚膠片用冰水泡2分鐘，瀝乾水，置熱水上坐融。  

5.       將豆腐及乳酪打滑，加入魚膠溶液拌勻，分3次拌入芝士糊內，倒入蛋糕模內，冷藏約4小時。 

益力多士多啤梨乳酪蛋糕 (內附食譜)

之前整過一次，但魚膠片用多左變成〝益力多士多啤梨乳酪布甸蛋糕〞。   

上次益力多和乳酪味都唔夠，所以要搵日再試下。   

尋晚我就動工，大頭蝦和心急的我攪到餅底淋左。   

大頭蝦：忘了將魚膠水混入益力多乳酪內，脫模時見到有D係餅底。   

心急：餅底雪左一陣就倒慕絲。   

撇除餅底，慕絲好味，娣婦讚好，一吃就知係有益力多，又帶點酸~好。   

再接再厲下成功了，我會再努力研究，整多D蛋糕。

益力多士多啤梨乳酪蛋糕  

餅底材料：(6吋模)  

消化餅           4塊(60克)  

牛油溶液              25克  

餅底做法：  

1.       將消化餅壓碎，加入已溶的牛油混合，壓在蛋糕模內，放入雪櫃冷藏一會，備用。  

慕士餅材料：  

士多啤梨乳酪       300克  

砂糖                      52克  

益力多                      2枝 (200克)  

淡忌廉             150毫升   

魚膠片                    13克  

慕士做法：  

1.       魚膠片浸軟，然後隔水座溶。  

2.       用電動打蛋器將淡忌廉加糖打至6成，備用。  

3.       士多啤梨乳酪和益力多攪勻，再將(1)加入攪勻。  

4.       將(4)加入(3)內，倒入慕絲圈內。  

5.       將(5)冷藏1小時，脫模。

忌廉芝士牛油蛋糕 (內附食譜)

今日諗住去影相，但天公不造美，唯有寄情於整蛋糕喇！   

〝乾士多啤梨粒粒〞我已買左好耐，但一直都的唔起心買埋忌廉芝士。   

上星期六，阿嫂整蛋糕要買忌廉芝士，所以我又搭單買。   

我跟〝吉斯蒂~忌廉芝士牛油蛋糕〞，但佢既比我靚好多。  

整既時候都有點擔心會好甜，結論係下次真的可以減糖。   

焗既時候真係好香甜，仲有濃濃芝士味，但食落有淡淡芝士味，不是太濃。     

食譜冇說明用什麼size蛋糕模，所以我就用左1個〝17cmX5cmX6cm〞錫紙模，但都係細左D，有點滿瀉。用呢個模要焗多10分鐘。    

忌廉芝士牛油蛋糕  

食譜來自：吉斯蒂~忌廉芝士牛油蛋糕  

材料：  

無鹽牛油                    50克

忌廉芝士                      50克 

糖                                 100克

蛋                                 2隻  

低筋麵粉                      110克暝

泡打粉                          1茶匙  

鹽                                少許  

雲尼拿精油                  數滴

乾士多啤梨粒粒          10克

做法：  

1.       牛油、忌廉芝士室溫放軟，加入糖打至鬆軟。  

2.       蛋拂勻，逐少加入牛油溶液內，用打蛋器打拌至完全混合。  

3.       篩入低筋麵粉、泡打粉及少許鹽輕手拌勻。  

4.       最後加入雲尼拿精油及乾士多啤梨粒粒，倒入已鋪牛油紙的焗模內。  

5.       用180度焗約 30分鐘即成! (以竹籤測試, 如沒有黏著蛋糕溶液即代表蛋糕已熟)

白糖糕 (內附食譜)

白糖糕係我鍾意的中式小吃之一，每次都會吃3-4件架！成日都好想知點整。   

前排到見到網友整〝自製白糖糕〞，賣相與街一樣。  尋晚我就動工嘞！

糕要發酵8小時，我就臨瞓前整定個漿來發酵。   

瞓醒就立即拎去蒸，真係好期待成品。   

出來賣相真的與街一樣，係食落實左D，若然唔係就完美嘞！  

朋友都話OK，係比平時硬左D，佢比較喜歡硬的，而我就鍾意食QQ的。   

甜味剛好，係硬左D啫！   

食譜出處沒有列出，因為已經變了不好的網站了。

後記：

• 3/5，我再蒸返熱來吃，熱食真係好軟熟，所以記得熱食喇！ 

整後心得：

• 隔晚後發現有沉澱物，我倒晚時候輕輕攪勻，因為怕泡泡會散，令到效果唔好。

白糖糕

材料:

粘米粉              100克  

糖                  80 克  

水                  220ml  

泡打粉              1/4 茶匙  

酵母                半茶匙  

溫水                1湯匙  

做法：  

1) 將糖加入水中用細火煮至糖溶化。  

2) 粘米粉、泡打粉過篩後撞入糖水，其間不停攪拌，以免起粒粒。  

3) 將粉漿用細火煮熱，不停攪拌，然後過篩待涼。  

4)  酵母加入暖水中拌勻靜待5 - 10 分鐘。  

5) 將酵母水倒入粉漿中拌勻發酵 8小時。  

6) 發酵完成後，將粉漿倒入已掃油既盤內，再用大火蒸30 分鐘。  

試醃青梅

前日浸〝梅酒〞，未浸之前都諗有剩青梅既話不如拎來醃鹹它。   

我一心諗住用鹽和醋來醃，到我去買青梅時，阿姐話唔駛用醋。   

若果好味先出個食譜，希望成功喇！