清湯蘿蔔牛肋條 (內附食譜)

尋日一早起身炆定今晚食得，要返工又要煮飯就咁，炆野就最好。

老公和我都係牛魔王，所以我成日都會整牛，不過清湯就好少整。

清湯蘿蔔牛肋條

材料：

牛肋條                        544克

白蘿蔔                        605克

調味料：

冰糖                            10克

瑤柱粒                        11克

蝦乾                            7克

金華火腿                    26克

薑                                2片

白胡椒粉                    1/2茶匙

史雲生清雞湯            250毫升

水                                200毫升

做法：

1.          白蘿蔔去皮，滾刀切，備用。

2.          牛肋條剪去脂肪，再剪成2吋長，然後洗淨。

3.          白鑊爆香蝦乾、瑤柱粒，盛起備用。

4.          下油，炒牛肋條，待表面轉色，將全部材料和調味料加入。

5.          中火煲至滾，然後用隔油杓隔去油份和啡色血水。

6.          待再滾轉小火炆1小時15分鐘，即成。(記得試味)

香煎豬頸肉配泰式汁 (內附食譜)

多年前我食過減肥餐係唔可以有糖，呢個餐單應該有好多人都試過。

果時成日叫元氣壽司，用剩好多壽司豉油，又唔可以有糖又要消滅豉油，我就諗到煮呢個。

用壽司豉油去醃，因為冇糖，唔可以用太多，所以剛剛好沾到豬頸肉就可以。

今日娘家只有萬字醬油，用醬油都一樣得。

泰式汁在網上搵的。

香煎豬頸肉配泰式汁

材料：

豬頸肉                              1塊

醃料：

壽司豉油 / 日本醬油       適量 (豉油或醬油剛好沾上就夠)

做法：

1.      豬頸肉洗淨、瀝去水份。(豬頸肉厚的地方介一刀，使其易熟)

2.      用膠袋放入豬頸肉，倒入醃料，膠袋打結。

3.      然後用手搓勻醃料，醃1小時。

4.      用平底鑊小火每邊煎3分鐘。

5.      轉中火每邊煎30秒。

6.      然後用錫紙包住。

7.      食用時用刀斜切上碟，即成。

泰式汁：

蒜蓉                                  2茶匙

魚露                                  約3湯匙

檸檬汁                              約1個

糖                                      3-4茶匙

指天椒 (切粒)                   1-2隻

芫茜                                  適量

做法：

1.      將所有材料撈勻，便成。

豆漿 (內附食譜)

小王子成日都要係街買豆漿，尋日放工就的起心買黃豆先。

之前我跌爛左個攪拌機，好在我仲有個小型的，買少少黃豆小試牛刀。

以前豆漿泡泡都會有豆渣，但今次就冇，覺得新的沒有舊的打得咁幼細。

尋晚7點幾浸到今朝7點幾，黃豆浸左12小時多啲。

豆味好濃厚，冰糖隨個人喜好加減。

豆漿

材料：

黃豆                    1/4斤

冰糖                    14克

水                        1：1 (水：黃豆)

做法：

1.          黃豆用水沖洗約半分鐘，然後用清水浸過夜。(黃豆吸水，用多少少水浸)

2.          第2日，黃豆隔去水份，備用。

3.          豆漿袋擺入煲內，備用。

4.          用碗盛起黃豆倒入攪拌機，再用碗盛水倒入攪拌機，蓋上蓋開機。

5.          攪拌完倒入豆漿袋內，隔去豆渣。

6.          重覆步驟5、6直至黃豆用完。(用手壓出餘下的豆漿)

7.          冰糖加入豆漿內，開中火，滾熄火，完成。

貼士：

l   沒有豆漿袋，可以用魚袋。

l   可以用碗、量杯或任何器皿都可以。

l   水的份量係與黃豆1：1。

l   豆漿好容易滾瀉，所以自己要留心。

番茄紅蘿蔔炆牛肋條 (內附食譜)

我要返工，所以平時炆或者醃野都係會早一晚整。

尋日就炆定呢個餸，今晚就可以食。

以前係將材料切粒，但太花時，所以改左切大舊啲。

不過，牛肋條就由1吋變左1.5吋，變大左。

牛肋條去脂肪煲野就冇咁油。

番茄紅蘿蔔炆牛肋條

材料：2人份

牛肋條                453克

配料：

番茄                    268克 (2個)

洋蔥                    105克 (細，半個)

紅蘿蔔                188克

調味：

史雲生清雞湯    250毫升

冰糖                    21克

老抽                    適量

茄醬                    1湯匙

做法：

1.          牛肋條洗淨，隔去水份。

2.          牛肋條去除脂肪，每條切約1.5吋。

3.          洋蔥切約1吋四方形，備用。

4.          番茄切開一半，再切開4瓣，然後再每瓣切一半，備用。

5.          紅蘿蔔滾刀切，備用。

6.          燒熱鑊和油下洋蔥炒香，盛起。

7.          熱油下牛肋條，將表面炒到轉色。

8.          加入全部配料同炒，炒勻即可。

9.          全部調味料加鑊中，炒勻。

10.      蓋上蓋中火煲至滾，然後轉中小火炆20分鐘，即成。

貼士：

l   每人口味都不同，記得試味，再自己調教。

l   我係用剪刀處理牛肋條。

l   如果番茄熟可以不用切得太細。

l   水份不用蓋過材料，因為當材料熟就體積會變細。

l   想多些汁可自行加水，不過，食譜的份量已經有足夠汁。

冬菇煎肉餅 (內付食譜)

近日偏頭痛發病頻密左，尋日放工老公陪我去睇醫生，醫生寫左今日比我休息。

醫生叫我考慮食血清素藥，因為除左偏頭痛，4月頭開始失眠、脫髮，但副作用係會發胖。

我個心15/16，因為怕肥，但老公就叫我食，最後都決定試，一個月後再覆診。

療程3-6個月，藥只要睡前食一粒就可以，但藥力好勁，日頭坐係到都瞓得著。

我怕瞓得多夜晚又眼光光，所以決定落街買餸今晚煮飯。

我以前自己刴豬肉，但把刀唔利，唯有叫肉檔攪碎，不過回來都會再與其他配料再刴多次。

肉餅已經夠味，所以不用汁醬伴食。

冬菇煎肉餅

材料：(2人份)

豬肉 (半肥瘦，攪碎)         187克 ($10)

冬菇                                     28克 (5隻中size)

調味料：

糖                                         1/2湯匙

豉油                                     1/2湯匙

生粉                                     1茶

水                                         1湯匙

油                                         1茶匙

做法：

1.          冬菇切粒加入碎肉中一起刴碎，然後放入碗中。

2.          加入全部調味料，用手摔至起膠。

3.          最少醃半小時，然後用手將肉碎搓成球狀。

4.          中火燒熱平底鑊和油，放入肉丸球。

5.          轉中小火，用手或鑊鏟稍為壓平，煎至熟。

貼士：

l   如果壓平肉丸時黏手，可以將手濕少少水。

書展2018

尋日原本諗住食〝「榴槤‧芒返」@Park Cafe〞就去書展，但老公話食完都晏，話今日去。

尋晚就What's app娣婦問佢去唔去，阿B話想同我地去，所以約左10點係灣仔食早餐。

書展真係人頭湧湧，好在有小王子，所以可以行快線。

小王子識行已經不拎車出街，但今日特別，唔拎我怕會手殘。

見到有遊戲又玩下。

阿B排隊拎老夫子漫晝家簽名。

用百幾蚊買簽名本，然後排隊取簽名。

經過毛記檔口，我睇到布景好似股票咁，阿B話佢上左市，我話假架！但老公話係真。

再去埋運動展。

港鐵counter整左條扶手電梯，好真下。

小王子留心聽講解點玩遊戲

行完書展就去醫肚，2個小朋友都立即睇書。

收穫：左邊係阿B(4年級作業係娣婦幫朋友買)、中間小王子、右邊係我。