豆漿 (內附食譜)

小王子成日都要係街買豆漿，尋日放工就的起心買黃豆先。

之前我跌爛左個攪拌機，好在我仲有個小型的，買少少黃豆小試牛刀。

以前豆漿泡泡都會有豆渣，但今次就冇，覺得新的沒有舊的打得咁幼細。

尋晚7點幾浸到今朝7點幾，黃豆浸左12小時多啲。

豆味好濃厚，冰糖隨個人喜好加減。

豆漿

材料：

黃豆                    1/4斤

冰糖                    14克

水                        1：1 (水：黃豆)

做法：

1.          黃豆用水沖洗約半分鐘，然後用清水浸過夜。(黃豆吸水，用多少少水浸)

2.          第2日，黃豆隔去水份，備用。

3.          豆漿袋擺入煲內，備用。

4.          用碗盛起黃豆倒入攪拌機，再用碗盛水倒入攪拌機，蓋上蓋開機。

5.          攪拌完倒入豆漿袋內，隔去豆渣。

6.          重覆步驟5、6直至黃豆用完。(用手壓出餘下的豆漿)

7.          冰糖加入豆漿內，開中火，滾熄火，完成。

貼士：

l   沒有豆漿袋，可以用魚袋。

l   可以用碗、量杯或任何器皿都可以。

l   水的份量係與黃豆1：1。

l   豆漿好容易滾瀉，所以自己要留心。

番茄紅蘿蔔炆牛肋條 (內附食譜)

我要返工，所以平時炆或者醃野都係會早一晚整。

尋日就炆定呢個餸，今晚就可以食。

以前係將材料切粒，但太花時，所以改左切大舊啲。

不過，牛肋條就由1吋變左1.5吋，變大左。

牛肋條去脂肪煲野就冇咁油。

番茄紅蘿蔔炆牛肋條

材料：2人份

牛肋條                453克

配料：

番茄                    268克 (2個)

洋蔥                    105克 (細，半個)

紅蘿蔔                188克

調味：

史雲生清雞湯    250毫升

冰糖                    21克

老抽                    適量

茄醬                    1湯匙

做法：

1.          牛肋條洗淨，隔去水份。

2.          牛肋條去除脂肪，每條切約1.5吋。

3.          洋蔥切約1吋四方形，備用。

4.          番茄切開一半，再切開4瓣，然後再每瓣切一半，備用。

5.          紅蘿蔔滾刀切，備用。

6.          燒熱鑊和油下洋蔥炒香，盛起。

7.          熱油下牛肋條，將表面炒到轉色。

8.          加入全部配料同炒，炒勻即可。

9.          全部調味料加鑊中，炒勻。

10.      蓋上蓋中火煲至滾，然後轉中小火炆20分鐘，即成。

貼士：

l   每人口味都不同，記得試味，再自己調教。

l   我係用剪刀處理牛肋條。

l   如果番茄熟可以不用切得太細。

l   水份不用蓋過材料，因為當材料熟就體積會變細。

l   想多些汁可自行加水，不過，食譜的份量已經有足夠汁。

冬菇煎肉餅 (內付食譜)

近日偏頭痛發病頻密左，尋日放工老公陪我去睇醫生，醫生寫左今日比我休息。

醫生叫我考慮食血清素藥，因為除左偏頭痛，4月頭開始失眠、脫髮，但副作用係會發胖。

我個心15/16，因為怕肥，但老公就叫我食，最後都決定試，一個月後再覆診。

療程3-6個月，藥只要睡前食一粒就可以，但藥力好勁，日頭坐係到都瞓得著。

我怕瞓得多夜晚又眼光光，所以決定落街買餸今晚煮飯。

我以前自己刴豬肉，但把刀唔利，唯有叫肉檔攪碎，不過回來都會再與其他配料再刴多次。

肉餅已經夠味，所以不用汁醬伴食。

冬菇煎肉餅

材料：(2人份)

豬肉 (半肥瘦，攪碎)         187克 ($10)

冬菇                                     28克 (5隻中size)

調味料：

糖                                         1/2湯匙

豉油                                     1/2湯匙

生粉                                     1茶

水                                         1湯匙

油                                         1茶匙

做法：

1.          冬菇切粒加入碎肉中一起刴碎，然後放入碗中。

2.          加入全部調味料，用手摔至起膠。

3.          最少醃半小時，然後用手將肉碎搓成球狀。

4.          中火燒熱平底鑊和油，放入肉丸球。

5.          轉中小火，用手或鑊鏟稍為壓平，煎至熟。

貼士：

l   如果壓平肉丸時黏手，可以將手濕少少水。

書展2018

尋日原本諗住食〝「榴槤‧芒返」@Park Cafe〞就去書展，但老公話食完都晏，話今日去。

尋晚就What's app娣婦問佢去唔去，阿B話想同我地去，所以約左10點係灣仔食早餐。

書展真係人頭湧湧，好在有小王子，所以可以行快線。

小王子識行已經不拎車出街，但今日特別，唔拎我怕會手殘。

見到有遊戲又玩下。

阿B排隊拎老夫子漫晝家簽名。

用百幾蚊買簽名本，然後排隊取簽名。

經過毛記檔口，我睇到布景好似股票咁，阿B話佢上左市，我話假架！但老公話係真。

再去埋運動展。

港鐵counter整左條扶手電梯，好真下。

小王子留心聽講解點玩遊戲

行完書展就去醫肚，2個小朋友都立即睇書。

收穫：左邊係阿B(4年級作業係娣婦幫朋友買)、中間小王子、右邊係我。

「榴槤‧芒返」@Park Cafe

今日約左幾個朋友去Park Cafe食Tea Buffet，主題係「榴槤‧芒返」，老公唔食榴槤，估唔到佢會應承去。

大家都話比想像中多野食，而且生日可以半價，同行有7折，小王子係小朋友是半價，但佢7月生日，同行都可以有7折。

詳情：「榴槤‧芒返」

食Buffet之前要老公出旺角做每年一次Body Check，小王子每次落車都會買雞蛋仔食。

之後搭車去尖沙咀食〝Jolibee〞，食之前就去左對面iSquare影相，但烈日當空曬到櫈好熱，所以要踎係到。

之前係網上啲人話〝Jolibee〞好食過KFC，但係中環食過覺得KFC好食啲，不過，今日食過尖沙咀呢間就改觀了。

食完仲有時間就用年票去左科學館玩一轉，倒牌揸車，不過，今次揸一次就唔玩。

之後又話要去做工程師，佢想再玩多次，但我地夠鐘食Buffet要走了。

一入門口就有好多人係到影相，因為係甜品區。

冷盤

主食

行入啲仲有少少甜品

食之前小王子要開另類餐，因為尋日唔舒服同佢睇醫生~感冒。

食啲食野中和啲藥先

芒果雪糕 (內附食譜)

我見淡忌廉就到期，諗住再整〝宇治抺茶冰淇淋〞，但小王子話想食芒果雪糕。

我就根據〝宇治抺茶冰淇淋〞食譜藍本來做，份量自己更改一下。

尋晚整，今朝收成，好香芒果味，小王子都豎起手指公。

芒果雪糕

材料：

淡忌廉                          200毫升

煉奶                              40克

芒果                               174克 (中型1個)

做法：

1.      芒果用叉壓成蓉，加入煉奶。

2.      練奶加入芒果蓉內攪勻。

3.      將淡忌廉打到乾性發泡。

4.      將練奶芒果醬加入打發後的鮮奶油。 

5.      以刮刀將上述材料攪拌均勻後，取一耐冷凍的器皿裝入，密封蓋好，放入冷凍隔天再享用即可。

貼士：

l   每個芒果甜度不同，可在步驟(2)或(5)試味，自行調較。

l   可以用攪拌機將芒果打爛。

粟米火鴨絲@日式芝麻醬 (內附食譜)

我今晚煮這個係因為今日係吉之島見到有試食，promote緊幾款醬汁。

Promoter阿姐將汁撈落螺絲粉加粟米到比人試食，起初小王子試左凱撒醬，話好食又要回去。

我見咁就不如試日式芝麻醬，小王子話2款汁都好食。

我和老公都試左少少淨凱撒醬，老公就唔鍾意。

咁我就決定買支日式芝麻醬，變花會多啲。

粟米火鴨絲@日式芝麻醬

材料：(2人份量)

長通粉                232克 (約2碗)

粟米粒                148克 (11湯匙)

鴨肉 (搣絲)        94克

調味：

日式芝麻醬        6湯匙

魚露                    1茶匙

做法：

1.          鴨肉炒約1分鐘盛起。

2.          長通粉烚14分鐘或至淋，倒去水份。

3.          加入鴨肉、粟米、調味料撈勻，即成。

貼士：

l   若鴨肉新鮮買回來就可省去步驟(1)。

l   發現步驟(3)多水時，可開火炒至理想程度。

操行獎@K1

老師係家長日話小王子得到獎學金和操行獎，獎學金已在當天領取。

操行獎以為只是口頭講，因為老師冇話有咩獎狀，點知！今日一入屋小王子就拎左個獎杯比我睇。

老公話佢今日特別~特別~特別~乖，可能因為有呢個獎，希望可以keep住咁乖。