椰子磅蛋糕 (內附食譜)

朱Sir出左〝椰子磅蛋糕〞，過左幾日我跟整，加蛋時油水分離，失敗左2次。

見Facebook又唔見有谷友整，咁就問左朋友有冇整過。

碰巧朋友過2日上朱Sir堂，到時幫我問下佢本人，朱Sir話我加蛋加得急。

我見之後Facebook有谷友post成功相，決定再試。

我見條片朱Sir係成隻蛋落，今次我就打散遂少落，真係成功了。

老公超like椰子產品，今次實啱晒佢。

我試食左，蛋糕摸落好濕潤，食落啖啖椰子香，成口都係椰絲。

椰子磅蛋糕

食譜來自：https://www.youtube.com/watch?v=xfi8oO19Nlg

材料：14cm長x 5cm闊x 6cm高

牛油                                100克

原蔗糖                            90克

雞蛋                                2隻

椰絲                                35克

奶                                    20克

低筋麵粉 (過篩)            70克

泡打粉                            2克

呍呢拿香油                    少許 (可以不加)

椰絲                                適量 (裝飾)

黃梅果醬                        適量 (飾面) (可以不加)

做法：

1.          先開機把牛油和原蔗糖打勻，牛油打至淡黃色。

2.          逐隻雞蛋慢慢加入，打勻，混合完成。(打勻一隻，先加另一隻)

3.          加入椰絲、牛奶、泡打粉、低筋麵粉，全部撈勻就可以。(見到有粒狀不用怕，是椰絲來的)

4.          加入呍呢拿香油，拌勻。

5.          倒入墊了烘焙紙的模具內，蛋糕表面撒上椰絲。(撒上椰絲更加香口)

6.          蛋糕表面擠上一條牛油條。

7.          用180度，焗15分鐘。

8.          轉160度，焗25分鐘。

9.          出爐後塗黃梅果醬，再撒上椰絲。

10.      放涼切件，享用。

檸檬原味乳酪Cupcake (內附食譜)

上次研究〝原味乳酪Cupcake〞成功之後，我又研究加檸檬汁。

我試過幾次可能水份多，中間都係差少少先熟。

今日終於成功了，係表面有少少裂和凹左少少，不完美的美。

中午試食左一個，留2個明天帶回公司食。

夜晚，小王子突然話要，之前問又唔食，而家又要食。

小王子話檸檬好味，我冇話有檸檬佢都食得出，最後連我最後一個都食埋。

小王子話明天要整5個，我緊係唔信佢喇！因為佢口味成日轉~哼！

檸檬原味乳酪Cupcake

材料：3個 (高3cm、底4.5cm、直徑7cm)

蛋黃 (凍)                        1隻

砂糖 (A)                          15克

油                                    10克

檸檬汁                            8克

原味乳酪 (凍)                30克

低筋麵粉 (過篩)            40克

蛋白 (凍)                        1隻

砂糖 (B)                          15克

做法：

1.          蛋黃+砂糖 (A)，攪勻。

2.          加入油，攪勻。

3.          加入檸檬汁，攪勻。

4.          加入原味乳酪，攪勻。

5.          加入低筋麵粉，攪勻，備用。

6.          蛋白+砂糖 (B)，打至有小彎勾。(砂糖一次過加入就可以)

7.          蛋白霜分2次加入蛋黃糊內，攪勻。(因蛋白霜量少，分2次就可以)

8.          麵糊入爐前櫈幾下。

9.          用125度，焗30分鐘。

10.      轉150度，焗15分鐘。

11.      轉175度，焗5分鐘。

12.      出爐後櫈幾下，放涼，即可。

椰皇鮮奶燉蛋白 (內附食譜)

如果去酒樓食飯見到通常都會order，因為真係好好食。

前日整〝Basque Burnt Cheesecake 巴斯克乳酪蛋糕@專業版本〞有蛋白剩，可以趁機試下。

尋日係街市買左個椰皇，夜晚就試整，我用肥媽配方。

我和老公都覺得個椰皇比平時的大，買左照整。

肥媽話蒸30-35分鐘，但我蒸左成個鐘都唔得，最後老公都食晒。

今日轉去惠康買椰皇，決定今晚再挑戰。

惠康個椰皇比街市細好多，2個椰皇我都有量過，因為怕整多左個汁，我得一個椰皇。

街市容量差不多400毫升，惠康得200毫升多啲。

我照用肥媽的配方，但將做法就改左少少，就係將個椰皇凍水落鑊隔水一齊蒸。

今次成功左，老公話好滑丫！尋日失敗應該係個椰皇太大了。

朋友介紹左呢段片，開椰皇方法：https://www.youtube.com/watch?v=EZb6w-nBynY&feature=youtu.be

椰皇鮮奶燉蛋白

材料：

蛋白 (細)            58克 (2個)

鮮奶                    58克

椰皇水                87克

糖                        1/2茶匙

比例：蛋白 (1份)、鮮奶 (1份)、椰皇水 (1.5份)

做法：

1.          用刀從椰皇底部開蓋，倒出椰皇水，備用。

2.          椰皇隱定在器皿內，凍水落鑊，隔水同水一齊煲滾。

3.          椰皇水+砂糖加入煲仔中，砂糖溶熄火。(千萬不要太熱，怕蛋白熟)

4.          椰皇糖水、鮮奶、蛋白攪勻，用隔箕過濾。

5.          倒去椰皇內的倒汗水，將(4)倒入椰皇內。

6.          用中火蒸30分鐘，即可。

Basque Burnt Cheesecake 巴斯克乳酪蛋糕@專業版本 (內附食譜)

今天回娘家，自從疫情嚴重開始就冇返過，所以尋晚整左Lego啫喱糖氹小朋友，又整左芝士蛋糕氹大朋友，希望大家都開心。

尋晚跟呂昇達老師的短片整巴斯克蛋糕，他是一位台灣老師，巴斯克蛋糕他還有幾個配方，有時間我會全部試晒，因為仔的講解十分詳盡和清楚，國語不太靈光的我也懂。

蛋糕雪左一晚，今日拿回娘家一同品嚐，我當然係中午時已試食喇！夜晚我絕食架嘛！

試食報告：蛋糕酸酸甜甜，好creamy～正。

Basque Burnt Cheesecake 巴斯克乳酪蛋糕@專業版本

食譜來自：https://www.youtube.com/watch?v=nLma0BFvvWY

材料：6吋 固定圓模 1顆

北海道高梨乳酪              250g

上白糖                              65g【可以用砂糖替代】

雞蛋                                  1顆 【大約50g】

蛋黃                                  2顆 【大約40g】

依思尼動物性鮮奶油      100g

玉米粉                              10g

蘭姆酒                              10g【可以用新鮮檸檬汁替代】

 做法：

1.          蛋糕模內掃油，放入烘焙紙。(掃油使烘焙紙不會向內收縮)

2.          乳酪用快速打30秒。

3.          加入糖用快速打1分鐘。

4.          加入全蛋打1分鐘。(蛋起乳化作用)

5.          加入蛋黃打約44秒。

6.          加入玉米粉、蘭姆酒、動物性鮮奶油，打勻。

7.          乳酪漿倒入蛋糕模內，入爐前櫈幾下。

8.          蛋糕放焗爐尾2果層。

9.          上火220下火220 烘焙20-25分上色後。

10.      調整成 上火200下火200 烘焙10-15分鐘。 貼士：

l   6吋乳酪漿重500克

l   8吋乳酪漿重650克-700克，太多會烤不熟。

鳥結糖 Nougat (內附食譜)

我好鍾意食鳥結糖，自小就想知道點整，十多年前買左本書有食譜，今日終於的起心動手做。

我做左1/3的份量都有二十幾粒，分左3份，2份拿回娘家。

兩父子都唔食，又係我一個人食晒。

可能蛋白份量少，打得唔好，切左一半就決定雪一雪先再切，雪左好切啲。

糖，不癡牙，冇牙都食得，軟身，下次要減糖，但阿媽話唔甜，居然老人家會話唔甜。

我用的是模具係製作雪花酥的套裝模，是活動底，外尺寸：27cm x 18.5cm x 24cm x 3cm (高)。

我用以下的1/3份量，做左半底雪花酥套裝模。

鳥結糖 Nougat

食譜來自：專業糕點製作

材料：1盤家庭式焗爐盤

粟膠                570克

砂糖                450克

牛油                60克

蛋白                1 1/2隻

什果仁           740克 (焗至金黃色)

 做法：

1.          粟膠加入3/4砂糖及牛油，同煮。

2.          間中攪拌，煮至約120度。

3.          同時，蛋白打起加1/4砂糖。

4.          打至起勾。

5.          將熱粟膠糖注入蛋白內，用木匙攪勻，邊落邊攪。

6.          加入什果仁粒，拌勻。

7.          放在墊上焗爐紙的方形盤上，蓋上一張焗爐紙，用木棍輾平，冷卻。