火腿炒公仔麵 (內附食譜)

炒公仔麵一直想挑戰，但好似好難，所以一直唔敢試。

上次係娘家第一次挑戰，由於第一次所以份量全部隨意。

今晚在家慢慢整，可以寫低份量，小至子話好好食，食左一碗仔。

公仔麵太肥，所以我冇食，我問老公啲麵會唔會淋，佢話OK。

火腿炒公仔麵

材料：1人前

火腿 (切條)                 4片

出前一丁公仔麵          1個

公仔麵味粉                  1/2包

洋蔥 (切絲)                 56克 (約半碗)

甘筍 (切絲)                 53克 (約半碗)

青蔥 (切段)                 適量

老抽                              幾滴(可以不加)

做法：

1.      下油炒香洋蔥，盛起備用。

2.      下油炒甘筍，加1湯匙水炒，盛起備用。

3.      下油炒火腿，加入洋蔥、甘筍炒勻。

4.      公仔麵煮2分鐘，將麵夾去(3)中炒勻，下青蔥。

5.      將老抽、味粉加入(4)炒約1-1.5分鐘，即可上碟。

貼士：

l   味粉不用加水稀釋，因為將麵加入去時已帶水份。

l   老抽可以不加，其實都夠色。

母親節禮物

頭先洗緊碗小王子入來廚房送左呢個手作比我，佢話可以裝電話和錢。

我話係咪老師幫你整架？佢話佢自己係學校整架！

今次第一次收到母親節禮物。

瑞士卷 (內附食譜)

之前係facebook既群組內見到這個瑞士卷食譜，已經想整，所以我安排左係今早整。

今次個餡係牛油忌廉，整完又唔駛放雪櫃，真係好方便，但係我唔知點解焗到個面有點脆，所以不能卷，只係切件食，小王子仲不停讚，叫我要再整。

我心心不忿，所以下午再整多次，今朝用130度焗，今次改用165度焗，可以卷到，但就冇群組既成員整得咁靚。

我煮個麵糊都有少少問題，下次要再挑戰。

瑞士卷

焗盤：28cm X 28xm

麵糊材料：

雞蛋黃               5個

牛奶                   50克

油                       50克

麵粉                   60克

麵糊做法：

1.      油及牛奶加熱至70度熄火。

2.      然後加入麵粉拌匀後，再逐次加入蛋黃，攪勻至無顆粒，備用。

蛋白霜材料：

蛋白                   5個

糖                       50克

蛋白霜做法：

1.      打到軟硬性，不要太硬性，這樣做出來卷時會有小裂痕的，拉起來有小小的勾。

2.      蛋黃麵糊分3次加入已打發的蛋白中拌勻。

3.      倒入已舖牛油紙的焗盤中。

做法：

1.          150度預熱20分鐘 / 165度預熱20分鐘。

2.          130度焗50-55分鐘 / 165度焗30分鐘。

3.          出爐後即撕開四週的纸放涼，並蓋上另一張牛油纸防乾燥。

4.          待蛋糕涼至有小許餘温，便可搽已打發的忌廉捲起成蛋卷了。

牛油忌廉做法：

有鹽牛油(室温)  90g

糖粉                   20g

雲呢拿香油       數滴

1.      做法：
把以上材料用電動打蛋器打至發白及蓬鬆，備用。

啫喱糖@改良版

我逢星期日都會回娘家吃晚餐，有時氹小朋友食飯或者食快啲，都會話食完去買雪糕或雪條，但食得多都唔健康，所以今日就整左啫喱糖，食譜係facebook既整野食group到搵到的。

我脫模時整爛左3隻，就送左比小王子食，佢仲想食，要留明天大家一齊食，我估唔到好受歡迎，好快就食晒，不過，我都留左5隻係家中雪櫃。

這個食譜可以做左約20粒，我個啲模都比較大的。

啫喱糖@改良版

材料：

啫喱粉                   1盒

魚膠粉                   20克

粟膠                       10克

熱水                       300克

做法：

1.          先將啫喱粉、魚膠粉、粟膠放入碗，加熱水，再座熱水，慢慢攪勻。

2.          見到全部材料溶晒，待暖倒入模，放入雪櫃2個鐘，脫模就食得。

貼士：

l   脫模唔可以心急同太大力，啫喱糖入公仔模，一定要用牙籤戒左邊先，慢慢抆大，糖就會同模分離，公仔模要揀軟身模。

最後的禮物@老豆

上年11月老豆開始入醫院，之後出出入入，到12月入左就冇再出院了，

我每個星期日都會去探佢，阿媽就日日去。

今年2月去左心臟科ICU，排到做手術，

但其間老豆氣喘，所以被迫中止，之後情況越來越差。

3月12日

夜晚10點幾收到阿媽電話，老豆情況轉差我地要全部去晒醫院，立即飛的去。

老豆冇乜意識，又反晒眼，醫護人員都以為唔得，最後都撐過來。

3月13日

早上約11點收到姑娘電話，老豆又轉差最好全部到醫院，我和老公各自回家，

然後接小王子再去醫院，因為我地住得遠，若有事老豆都可以見到小至子，最後都係冇事。

4月8日

星期六係老豆舊歷生日，阿媽怕老豆捱唔到，所以提早今日大家去醫院慶祝。

老豆都冇精神，意識好似好迷糊咁。

4月9日

早上阿媽又話老豆情況轉差去緊醫院，去到又好啲，

肥阿哥lunch時去過醫院，下午3點有會開走了，

老豆係4點幾走了，肥仔上去見老豆最後一面。

5月2日

今日老豆做事了，尋日整左〝莎利蛋糕〞和〝古早味蛋糕〞，

這2款都係之前老豆住院時我整過的，而〝莎利蛋糕〞老豆仲成條食晒。

阿媽話出面買既蛋糕太乾你食不到，食就會濁喉咳，阿媽話我整既濕潤。

今天能為你做的只有這麼多，不用掛心我地了，安心的走，我地會照顧阿媽。

尋日專登再整比你，我的心意希望你收到。

5月3日

今早自家製〝蔥花蝦米腸〞，老豆這是最後能為你做的。今日送你上山，你安心走。

蔥花蝦米腸 (內附食譜)

我十多年前買左塊腸粉布，但一直冇用，而家見好多人整腸粉都唔駛用，所以唯有繼續珍藏。

這個食譜既份量我整左一半，預備材料既時候先發現冇澄麵，改埋用木薯粉。

蒸完再卷埋都係半透明，平時係白色架啵！心諗唔通呢個食譜唔得，好在我仲有另一個，點知放涼後就變左白色，試過味都滑，但就馬蹄粉味重。

我鍾意食齋腸，所以冇落蝦米和蔥。

蔥花蝦米腸

食譜來自：香港01~蔥花蝦米腸

材料：(12-15條，30分鐘)

粘米粉                               75克

馬蹄粉                               50克

木薯粉                               10克

澄麵                                        10克

粟粉                                       10克

水                                               550克

油                                               5克

蔥                                               適量

蝦米                                       適量

工具：

·         直膠刮

·         平底不锈鋼盤

做法：

1.      蝦米浸疌切粒，蔥切碎，備用。

2.      把所有粉類放入大碗中，加入清水拌勻，至完全沒有粉粒。

3.      粉漿閒置約半小時，加入油拌勻。

4.      燒熱一鍋水，放入已掃油的平底盤溫熱。

5.      倒入一湯匙粉漿，平鋪於盤上，放入花蔥花與蝦米粒，加蓋蒸1分半鐘。

6.      取出後，以膠刮把腸粉皮捲好，盛起。

教煮提示：

·         粉漿閒置室溫，待水粉完全融合後才加油，較易吸收。

·         盤需夠熱和平，才能把薄薄的粉漿凝住，鋪得均勻。

·         蒸時必須加蓋，否則皮會龜裂，捲起硬實，口感欠佳。

古早味蛋糕 (內附食譜)

我忘記食譜出處在那，如果食譜主人見到打聲招呼可以嗎？

家人、親戚和朋友都讚好食，雖然要用一小時去焗，但都值得的。

古早味蛋糕 

食材 ：（5-6人） 1小時以上

蛋白                          6隻

糖                                 85克

蛋黃                         6隻

菜油                         80毫升

低筋麵粉          90克

牛奶                        70毫升

鹽                               ½茶匙

做法：

1.      用電動打蛋器打發蛋白，有泡沫時下糖，打發至乾成發泡(Stiff Peak)，將碗倒轉而蛋白霜不掉下就可以。

2.      用微波爐將油加熱90秒，或將油放在煲內加熱一分鐘。然後篩入麵粉和鹽，拌勻。再下蛋黃和牛奶，拌勻至沒有粉粒。(第2個步驟全程用手動打蛋器)

3.      分三次加入蛋白霜，輕力拌勻。

4.      將蛋糕糊倒入鋪有烘焙紙的烤盤內，用刀在糊內劃數圈，然後再將蛋糕模摔數下（*這可令氣泡跑出）將蛋糕放入一個大盤內，再注入熱水，大約1/3 的高度，然後放入已預熱150度C焗爐，焗約1個小時即成！（＊如用較小的焗盤，焗的時間會較短）

5.      蛋糕出爐後，在桌上重摔幾次，待涼後切件享用 （*不用倒扣的）。

貼士：

·         我用的蛋糕盤是8吋方形盤

輕盈莎利蛋糕 (內附食譜)

每次整這個蛋糕都會被讚，而且用料健康，所以以前都會常常整，但有左小王子時間少左，都冇乜機會整。

每次焗完都漲漲的，但放涼後就扁左，今次出爐立即櫈幾下，放涼後仍然漲卜卜的。

輕盈莎莉蛋糕

食譜來自：自家製手工蛋糕~Hand-made Cake

材料：(2個4吋長方模或錫紙模18cmX15.5cmX4.5cm~1個)

材料：

蛋黃                                                          2隻

低脂牛奶                                         40克 (我用全脂奶)

砂糖                                                               20克

粟粉                                                               10克

橄欖油                                                     10克

泡打粉                                                   1克

低筋麵粉                                        50克

鹽                                                                           1克

蛋白                                                                2隻

砂糖                                                                 15克

果醬 (唧面用)                        少許 (可以不用)                              

做法：

1.      先以170度預熱焗爐。

2.      將20克砂糖及鹽加入蛋黃以手牞打蛋器攪拌均勻。

3.      再倒入油及牛奶拌勻。

4.      將已過篩的粉類加入蛋黃糊內攪勻備用。

5.      將蛋白打至起泡後將15克砂糖分次加入繼續打至挺身，用膠刮刀分出1/3蛋白放入蛋黃內混合拌勻。

6.      再將蛋黃糊分2-3次倒入蛋白糊內以膠刮刀快手拌勻，再倒入模具內約8乘高度，輕輕拍數下將麵糊內的空氣拍出。

7.      果醬放入小唧袋在麵糊中間唧一行直線，以170度焗約30分鐘。

8.      焗好取出倒扣待涼便可。

小貼士：

·         唧上果醬是可以令蛋糕烘焗時做出較直美觀的裂痕，可用任何味道的果醬外亦可用乳酪代替。