小山園抹茶奶油曲奇 (內附食譜)

我焗緊 〝金桶奶油香草曲奇〞就整埋抺茶味，〝呂昇達〞老師仲有朱古力味，但我地唔食朱古力味，所以我冇整。

我整完抺茶味再唧花，就容易左好多，唧完再左右扭下就完成。

老師整晒3隻味先唧，麵糰已放了一段時間，但我焗爐細，整完一隻味就要唧，再入爐，如果即整即唧就會難，記得整完麵糰擺放一陣先唧花。

小山園抹茶奶油曲奇

食譜來自：https://www.youtube.com/watch?v=uRbDfD9-2NY

材料：

金桶奶油                    200g

糖粉                            45g

玉米粉                        60g

抹茶粉                        10g

低筋麵粉                    180g

製作方式：

1.     玉米粉、糖粉、低筋麵粉、抹茶粉，過篩，備用。

2.     全部材料加入用低速攪拌約30秒至1分鐘均勻。

3.     枱上舖膠墊，灑上高筋麵粉，放上麵糰。(如做一種味道可省略此步驟)

4.     稍為搓成糰，然後包裹。(不會很黏，軟軟的)

5.  上火160 下火160， 放中層烘焙20分鐘。

製作餅乾注意事項：

·         金桶奶油已經是有鹽奶油，所以製作餅乾請不要再添加額外的鹽。

·         餅乾的甜度已經經過修正，請不要還沒做過就隨便更改配方，先做一次看看這真的很好吃。

·         全用低筋麵粉口感好很韌，用玉米粉增加酥鬆感。

·         手粉係高筋麵粉。

金桶奶油香草曲奇 (內附食譜)

 我一見到〝呂昇達〞老師整這款曲奇已經好想整，買左金桶牛油，跟住就今日整。

貫徹老師的作風，又快又簡單。

今次係用曲奇槍整，之前用過失敗左，所以整既時候個心都好驚。

金桶帶鹹，所以食落有點鹹味，好鬆化，就好似熊仔罐曲奇咁。

曲奇槍心得：

• 起初唧唔到，跟住好難唧到完整，後來發覺麵糰擺耐左會好好多，所以麵糰擺最少20分鐘才好唧花。
• 唧花後再左右扭一扭先拎起唧花槍。

金桶奶油香草曲奇

食譜來自：https://www.youtube.com/watch?v=uRbDfD9-2NY

 材料：

金桶奶油                200g

糖粉                       45g

香草濃縮醬            2g（或者是新鮮香草夾半條）

玉米粉                    70g

低筋麵粉                180g

做法：

1.     玉米粉、糖粉、低筋麵粉過篩，備用。

2.     全部材料加入用低速攪拌約1分鐘均勻。

3.     枱上舖膠墊，灑上高筋麵粉，放上麵糰。(如做一種味道可省略此步驟)

4.     稍為搓成糰，然後包裹。(不會很黏，軟軟的)

5.  上火160 下火160， 放中層烘焙20分鐘。

製作餅乾注意事項：

·         金桶奶油已經是有鹽奶油，所以製作餅乾請不要再添加額外的鹽。

·         餅乾的甜度已經經過修正，請不要還沒做過就隨便更改配方，先做一次看看這真的很好吃。

·         全用低筋麵粉口感好很韌，用玉米粉增加酥鬆感。

·         手粉係高筋麵粉。

金沙骨 (內附食譜)

之前都寫過金沙骨，但今次係用〝Philips Airfryer XXL HD9860/91〞整。

小王子唔喜歡食肉，佢都食左半條，佢話個汁好味。

用同一溫度，但時間縮短左一半，又唔駛中途反轉。

由於個鍋大不用怕買大件左放唔落個鍋，而且整6條都可以一次過氣炸，又省時。

舊的又要浸又要用力省，呢個容易清潔。

金沙骨

材料：

金沙骨            488克

醃料：

叉燒醬            2湯匙

海鮮醬            2湯匙

糖                    1茶匙

水                    1湯匙

蜜糖                適量

做法：

1.      金沙骨洗淨，瀝去水份。

2.      將金沙骨加入醃料內，醃過夜。

3.      用200度氣炸8分鐘。

4.      金沙骨表面塗上蜜糖。

5.       用200度氣炸1分鐘，即成。

貼士：

l   金沙骨唔塗蜜糖都一樣咁好食。

Philips Airfryer XXL HD9860/91

我舊的氣炸鍋甩塗層需要買過一個新的，因為我每星期都會用，平時帶飯的肉類就係靠氣炸鍋幫手。

我諗緊買飛利浦好，抑或去Gmarket買一個呢？經過上次係日本買V仔回來電壓唔啱要用變壓器，我就決定唔係外地買電器。

飛利浦一定啱香港規格，但係大個並有點貴。

Gmarket就平，見肥仔的都是加個轉插就用得，我又問左係Gmarket買左個氣炸鍋的朋友，佢話換左個3腳頭就用得，我仲問埋佢有冇水線，佢話好似有，咁就掂。

我係Gmarket睇中一個，除左氣烤之外還有5個功能，仲可以望到入面，唔駛成日打開來睇。

突然同事通知我飛利浦攪抽獎活動叫我試下，咁我就試下，要post用緊的氣炸鍋和要換新的原因，十月尾公佈結果，唔中就11月去Gmarket買個。

我估唔到我係20個得獎其中一個，只要收到個鍋，然後寫2個post，其中一個post係氣炸谷，另一個post係自己Facebook 或氣炸谷，不過其中一個post要用新的function (Smart Sensing)就可以。

這是推動我買〝Bosch MUM5〞廚師機另一原因，因為我都要買個架擺個氣炸鍋，咁就買埋廚師機，加上又減價。

免費遊海洋公園

今日公司同事慶祝結婚周年，她訂了海洋公園旁的萬豪酒店，因買套票，所以有2大一小的海洋公園入場卷贈送，她的老公不想入園，她就送給我。

尋日先話比小王子聽去海洋公園，小王子今天要逃學了，不去學日文。

我地約好早上10點半在海洋公園門口等，佢check-in完就過來搵我，佢將coupon和預約卷都給我，然後佢地就回酒店hea下。

今日的預約已滿，仲超多人，因為我地拎住coupon和預約卷冇阻擋，好快就到門口排隊入園，好快就入到去了。

一入到去就見到威威，小王子立即說：「佢都來過我學校架！」(幼稚園K3)

我決定坐海洋列車過對面岸，然後坐纜車回來。

小王子唔想坐海洋列車，因為上年〝海洋公園@K3旅行日〞坐過一次佢好驚，佢怕好大隻八爪魚，佢今次又唔驚啵！

尋日知道可以入來就話要去睇企鵝，又問我企鵝點叫，阿仔我唔知啵！

見到企鵝個樣幾開心。

睇完出到去見到精品又有企鵝立即話要買，我緊係唔買住喇！一陣見到另一隻又要買咪好唔得掂，睇定啲先。

我地再去北極之旅，但已經冇北極熊了，有海豹和海象，咁啱係牠們的開餐時間。

精品店另一邊睇雪狐，但冇咩特別。

老公一個人睇，佢好enjoy，但我就覺得悶囉！

小王子就係後邊玩，我就緊係陪小王子喇！

然後行去海洋劇場，來到已經是尾聲了。

畏高既老公居然提意去坐摩天輪，這是今天第一次玩機動遊戲。

玩完摩天輪就去醫肚，每次入來都係食麥當勞，沿路來有啲小食亭都冇開，老公話會唔會麥當勞都冇開呢？唔係掛，冇開就大劑了。

好在麥當勞有開，但真係貴過出面好多，小王子食得好開心。

頭先等位發生小插曲，我與小王子等緊位，老公去搵其他位，我等的位是一家三口，男的是外國人，女的是亞洲人，男的將垃圾清理去掉的時候，突然從我身後有2個姐姐(女庸)坐下，我來不及反應，外國男人走回來話佢地，走既時候仲叫我坐，我真的很感謝他。

之後果2個姐姐都有望下望下，我咪又望返佢囉！

醫了肚仔就去睇鯊魚。

小王子問左好多次可唔可以玩，每檔獎品都唔靚，佢好想玩最後都同佢玩左。

小王子好勁中左2個獎品，佢都話送晒比姨姨，就係今日送入場卷的同事。

頸巾就唔好送了，因為大人用不着，留返你自己用。

我地坐纜車返去對面岸，終於可以鬆一鬆，因為今日真係好熱，朝早在家又好凍，天氣難測。

纜車站好懷舊，我好鍾意舊野。

小王子見到電車立即跑上去，都唔理我地。

香港老大街

我地再去睇熊貓，今次終於唔係瞓覺和用個pat pat對住我地。

小熊貓掛住瞓覺，有人吹口哨，所以有一隻起左身。

離遠同熊貓合照先

呢隻係仲係到食竹葉，我見佢不停食冇停。

我地去到威威天地了，坐小火車勁多人，這是今天最後的機動遊戲。

小朋友有遊戲玩去不同的攤位玩完吸印仔，儲夠印仔就可以換貼紙。

小王子等緊入公園玩，而家有限時和人數，中場仲有消毒。

小王子玩到要除衫，因為真係好熱。

最後買左小熊貓和烏龜公仔，我地每間店都有入去睇，係得門口呢間有小熊貓。

我見小熊貓好得意拎比小王子睇，佢唔鍾意，我放低後比個細路女拎左，跟住佢又話想要，話頭先未諗清。

我問小女孩影左幅相，然後問店員仲有冇？店員入去搵，拎左3隻出來，小王子好開心，這款商品是買一送一。

Bosch MUM5

今天是忙碌的日子。 

上次〝韓式炸雞‧九巴口罩〞訂左個廚師機，約左今日下午3點至6點送貨。

今日好忙，早上09:00-09:30要返到小王子學校訂ipad，未9點就到了，但忘記左帶表格，好在學校預先print左一份以防大頭蝦的如我冇帶，一切好順利。

我9點半前都回到家，小王子已起身，過一陣又要帶佢去學晝晝了。

我收到電話廚師機1030-1130會送到，好在老公要在家等維修。

前幾日厠所沖水制壞了，約左1030-1100來整。

我帶小王子去晝晝前幫老公去郵局取件先，因尋日去郵局未開。

我等取件時收到老公電話廚師機已送到，但維修師傅未到。

這2日我都唔得閒同廚師機開光，要等到下星期了。

原來都好多配件，減價覺得好抵，老公又支助我一半。

廚師機想買好多年，諗左好耐，今日終於擁有，以後整包就唔駛手軟，仲快好多添！

失敗嚤囉酥 (內附食譜)

我和阿婆都鍾意食嚤囉酥，成日都想整，有日係網上搵到食譜，記下，今日終於動手。

我懷著一定成功的心情去整，搓皮時不能成糰，我自行加水，終成糰。

包餡時由於個皮有點乾，所以比較難包。

包好入爐，望入爐時有啲皮爆緊，唔緊要有啲冇爆，爆左都食得既。

出爐拿上手，點解咁硬架！心中有點不開心，知道失敗了。

放涼後品嚐，餡都似既，係個皮唔得，餡可以再甜啲，因為冇甜味。

好在我近日又搵到一個食譜，搵日試另一個。

雖然失敗，但都分享食譜，如有高手路過可以指教一下，謝謝！

嚤囉酥

 

食譜出自:懷舊老餅店 (http://hy51952247.mysinablog.com/index.php?op=ViewArticle&articleId=3142046)

 

皮料：

砂糖                         4.5克

菜油                         3克

雞蛋                         2克

牛油                         3克 

泡打粉                     1克

食用梳打粉             1/2克

清水                         10克

低筋面粉                 90克

 

餡料：

砂糖                         30克

菜油                         10克

芝麻                         5克

糕粉                         60克

清水                         50克

裝飾：

瓜子仁                     5克

做法：

1.      預熱焗爐180度。

2.      皮料搓勻成面糰，分成小粒。

3.      餡料搓勻成糰，分成小粒。

4.      將一份餅皮包入一份餡料，搓成半圓形。

5.      無搓半圓，只搓左圓形。

6.      掃上蛋漿，放上瓜子仁。

7.      用180度烘20分鐘，完成。